Te ohipa ra anei te mau puai iino?

“Ua aninia te ao, mai te huru ra e te tamata maite ra te mau puai tahutahu i te ponao i te mau uputa hororaa atoa.”—Jean-Claude Souléry, papai vea.

‘Te turai ra te manaˈo e aita e tauturu i te taata ia tiaturi e te ohipa ra te hoê ino iti rahi.’—Josef Barton, taata tuatapapa.

UA TURAI te ohipa totoaraa riaria roa i tupu i te 11 no Tetepa 2001 i te taata e rave rahi ia feruriruri. I roto i te vea Beretane Financial Times, ua parau Michael Prowse e: “Aita e animara e rave aore ra e nehenehe e rave i te hoê ohipa aroha ore roa mai tera.” Ia au i te hoê tumu parau o te vea New York Times, taa ê atu i tei titauhia no te faanaho i te vavahiraa, “mea faufaa atoa ia feruri i te riri iti rahi i vai na i ravehia ˈi te reira. E na nia ˈˈe teie riri i te mau tamaˈi matauhia, aita e taotiaraa, aita e faaturaraa i te mau parau faaau.”

Ua feruri maite te taata no te mau faaroo rau e te ohipa ra paha te tahi mana ino. Teie ta te hoê taata tapihoo no Sarajevo, tei ite mata i te mau ohipa riaria no te riri i te opu fetii ê i Bosnie, i parau: “I muri aˈe hoê matahiti tamaˈi i Bosnie, te tiaturi nei au e na Satani e faatere ra i te tupuraa atoa. E ohipa maamaa mau â teie.”

I to ˈna uiraahia e te tiaturi ra anei oia i te Diabolo, ua pahono te taata tuatapapa ra o Jean Delumeau e: “E nafea hoi au e patoi ai i te mana o te ino ia hiˈo vau i te mau mea e tupu nei e tei tupu na mai to ˈu iho â fanauraahia mai: Te Piti o te Tamaˈi rahi o tei haapohe e hau atu i te 40 mirioni taata; o Auschwitz e te mau aua o te pohe; te haamouraa nunaa i Cambodge; te haavîraa a te faatereraa a Ceaucescu tei haamanii i te toto; te haamauiuiraa i haamauhia ei huru faatereraa i te mau fenua e rave rahi i te ao nei. Mea roa roa te tapura o te ohipa riaria. . . . No reira, te tiaturi nei au e e tano ia parau tatou e e mau ohipa ‘diabolo’ teie, eiaha no te mea e na te hoê Diabolo e tara e e avae amaha to ˈna e faatupu ra i te reira, na te hoê râ Diabolo e taipe oia no te varua e te mana o te ino e ohipa ra i roto i te ao.”

Mai ia Jean Delumeau, mea rahi te taata e parau ra e e mau ohipa “diabolo” riaria teie e tupu nei i teie tau i roto i te huitaata, mai te tuhaa utuafare e tae roa i te tuhaa nunaa rau. Eaha ïa te auraa? O te mau mana papu ore o te ino anei te tumu o tera mau ohipa riaria, aore ra te vai ra anei te tahi mau puai iino e turai nei i te taata ia rave i te mau ohipa iino riaria roa o te na nia ˈˈe i te ino matauhia o te taata? Te arataihia ra anei tera mau mana e te hoê arii o te ino—o Satani te Diabolo?

[Faaiteraa i te fatu o te hohoˈa i te api 3]

Mau tamarii: U.S. Coast Guard photo