Aamu

Te fanaˈoraa taa ê e apiti i roto i te maraaraa i muri aˈe i te tamaˈi

FAATIAHIA E FILIP HOFFMANN

No hope noa ˈtura te Piti o te Tamaˈi rahi i te avaˈe Me 1945. I te avaˈe Titema, ua haere mai o Nathan Knorr, o te tiaau ra i te ohipa pororaa a te mau Ite no Iehova na te ao atoa, i Danemata e ta ˈna papai parau e 25 matahiti o Milton Henschel. Ua tarahuhia te hoê piha rahi no taua tere e anaanatae-aˈena-hia ra. No matou te feia apî, mea au roa te oreroraa parau a Taeae Henschel no te mea hoê â to ˈna matahiti e to matou e ua maiti oia ei tumu parau na ˈna: “E haamanaˈo i tei Hamani ia oe i to apîraa ra.”—Koheleta 12:1.

I ROTO i taua tere ra, ua haapii matou e te tupu ra te mau mea oaoa iti rahi no te faahaere i te ohipa pororaa na te ao atoa i mua e e nehenehe matou e apiti atoa ˈtu i roto. (Mataio 24:14) Ei hiˈoraa, ua iritihia te hoê haapiiraa apî i te Hau Amui no te faaineine i te mau tane e te mau vahine apî no te ohipa mitionare. Ua haapapu Taeae Knorr e mai te peu e e titauhia matou, e rave matou i “te hoê noa titeti no te haere atu” e aita matou i ite ihea matou e tapae ai i te pae hopea. Noa ˈtu râ, ua faaî te tahi pae o matou i te aniraa.

Hou vau a faatia ˈtu ai i to ˈu oraraa i muri aˈe i te Piti o te Tamaˈi rahi, e hoˈi au i to ˈu fanauraa i te matahiti 1919 ra. Ua tupu te tahi mau mea na mua ˈˈe e i te tau o te tamaˈi tei ohipa maitai i nia i to ˈu oraraa.

Te parau mau bibilia na roto mai i te hoê tamarii ino

A hapû ai o Mama ia ˈu—ta ˈna matahiapo—ua pure oia e, ia noaa ta ˈna e tamaiti, e riro mai au ei mitionare. To roto to ˈna tuane i te Feia haapii Bibilia, mai tei matauhia na te mau Ite no Iehova, i faariro na râ to ˈna mau fetii ia ˈna ei tamarii ino. To pihai iho to matou fare ia Copenhague, e ia faatupu te Feia haapii Bibilia i ta ratou mau tairururaa tamatahiti i reira, e titau manihini Mama ia Tonton Thomas o te faaea ra hoi i te vahi atea, i ǒ matou. I te matahiti 1930, ua haapapu to ˈna ite maere i te Bibilia e ta ˈna haaferuriraa tano i te manaˈo o Mama e riro mai ei Taata haapii Bibilia.

Mea hinaaro na Mama te Bibilia. A haapao ai i te faaueraa i roto i te Deuteronomi 6:7, ua haapii Mama ia mâua to ˈu tuahine ‘ia parahi noa oia i roto i te fare, ia haere noa na te eˈatia ra, ia taoto, e ia tia noa oia i nia.’ Ia maoro aˈe, ua haamata vau i te rave i te pororaa i tera e tera fare. Mea au roa na ˈu e tauaparau no nia i te mau tumu parau mai te nephe pohe ore e te po auahi ta te mau ekalesia e haapii ra. I manuïa na vau i te faaite na roto i te Bibilia e mea hape taua mau haapiiraa ra.—Salamo 146:3, 4; Koheleta 9:5, 10; Ezekiela 18:4.

I te tahoêraa to ˈu utuafare

I muri aˈe i te tairururaa no 1937 i Copenhague, te hinaarohia ra te tauturu taime poto i te fare vairaa buka a te amaa a te mau Ite no Iehova no Danemata. No hope noa ˈtura ta ˈu haapiiraa i te hoê fare haapiiraa tuatoru no te tapihooraa e aita ta ˈu e hopoia, no reira vau i pûpû ai i ta ˈu tauturu. I te otiraa te ohipa i te fare vairaa buka ra, ua anihia vau e tauturu i te piha ohipa a te amaa. Aita i maoro aˈe, ua faarue au i te fare e ua haere atu i te amaa i Copenhague, noa ˈtu e aita vau i bapetizohia ˈtura. Ua tauturu mai te amuiraa i te mau mahana atoa e te mau Kerisetiano paari ia haere au i mua i te pae varua. I te matahiti i muri mai, i te 1 no Tenuare 1938, ua faataipe au i ta ˈu pûpûraa na te Atua ra o Iehova na roto i te bapetizoraa i roto i te pape.

I te avaˈe Tetepa 1939, ua haamata te Piti o te Tamaˈi Rahi. E, i te 9 no Eperera 1940, ua haru te mau nuu Heremani ia Danemata. I te mea e ua vaiihohia te tiamâraa huru rahi na to Danemata, ua nehenehe ia matou e tamau i ta matou ohipa pororaa.

Tupu mai nei te hoê ohipa faahiahia. Ua riro mai Papa ei Ite itoito e te taiva ore, o tei faahope ïa i to matou oaoa ei utuafare. No reira, i to ˈu, e na Danemata e maha atoa, titau-manihini-raahia e haere i te 8raa o te piha haapiiraa i Gileada, ua turu mai to ˈu utuafare taatoa. Ua haamata te haapiiraa e pae avaˈe i Tetepa 1946 i te aua haviti i pihai noa mai ia South Lansing i te tuhaa fenua o New York.

Gileada e te haapaariraa i muri mai

Maoti te haapiiraa no Gileada i noaa ai te mau hoa apî faahiahia. I te hoê ahiahi, a ori haere ai mâua Harold King no Beretane mai, na te aua, ua paraparau mâua ihea râ mâua e tonohia ˈi ia hope ta matou haapiiraa. “Aita vau e manaˈo ra eita vau e ite faahou i te mau mato uouo no Dover,” o ta Harold ïa i parau. Ua tano ta ˈna parau, ua titauhia râ 17 matahiti hou oia a ite faahou atu ai i taua mau mato ra, e e maha matahiti e te afa o te reira to ˈna vairaa i roto i te tapearaa e te moemoe i Taina!a

I muri aˈe i to matou faatuiteraahia, ua tonohia vau i Texas, Hau Amui, e tavini ei tiaau ratere i te mau amuiraa Ite no Iehova no te tauturu ia ratou i te pae varua. Ua farii-maitai-hia vau. No te mau taeae i Texas, mea faahiahia te fariiraa i te hoê taurearea no Europa no mahiti noa maira mai roto i te Haapiiraa no Gileada. I muri aˈe râ e hitu noa avaˈe i Texas, ua titauhia vau i te pu rahi a te mau Ite no Iehova i Brooklyn, New York. I reira, ua tuu Taeae Knorr ia ˈu i roto i te mau piha ohipa ma te faaueraa e haapii i te tereraa ohipa o te mau tuhaa atoa. I muri aˈe, i to ˈu hoˈiraa i Danemata, ua tia ia ˈu ia faaohipa i ta ˈu i haapii, a haapapu ai e te ravehia ra te mau mea atoa mai i ǒ Brooklyn. Te hinaarohia ra e faatuea i te mau haaraa i roto i te mau amaa na te ao atoa ia manuïa ˈtu â. I muri aˈe, ua tono Taeae Knorr ia ˈu i Heremani.

Faaauraa i te mau faaueraa i te mau amaa

I to ˈu tapaeraa i Wiesbaden, i Heremani, i Tiurai 1949, e rave rahi oire e vai huˈahuˈa noa râ. Te feia e aratai ra i te ohipa pororaa, e mau tane ïa tei hamani-ino-hia mai te taime i haru ai o Hitler i te mana i te matahiti 1933. Ua faaea te tahi pae e vau e tae atu i te hoê ahuru matahiti aore ra hau atu i roto i te mau tapearaa e te mau aua faatîtîraa! Ua ohipa vau e taua mau tavini a Iehova ra e toru matahiti e te afa. Ua haamanaˈo mai to ratou hiˈoraa otahi i te hoê manaˈo o te taata tuatapapa Heremani ra o Gabriele Yonan tei papai e: “Ahiri e aita te hiˈoraa o teie pǔpǔ Kerisetiano tei tapea maite i raro aˈe i te faatereraa haavî a te National Socialiste, e tia ïa ia tatou—i muri aˈe ia Auschwitz e te Taparahiraa a te mau Nazis—ia feaa e nehenehe anei e faaohipa i te mau haapiiraa Kerisetiano a Iesu?”

Hoê â ta ˈu ohipa i te amaa ra e i Danemata: e hopoi mai e e faatuea i te mau tereraa ohipa apî a te faanahonahoraa. I te taaraa iho â i te mau taeae Heremani e e ere te mau faatanoraa i te faainoraa i ta ratou ohipa—ua tae mai râ te taime e haa piri atu â ˈi te mau amaa taa ê e te pu rahi—ua anaanatae ratou e ua î i te varua maitai e haa amui.

I te matahiti 1952, ua tae mai te hoê rata mai te piha ohipa mai a Taeae Knorr tei faaue mai e haere i te amaa no Berne, i Helevetia. Te tonohia ra vau e haamata ei tiaau o te amaa i reira i te 1 no Tenuare 1953.

Mau oaoaraa apî i Helevetia

I muri rii aˈe i to ˈu taeraa ˈtu i Helevetia, ua farerei au ia Esther i te hoê tairururaa, e aita i maoro ua momoˈahia mâua. I te avaˈe Atete 1954, ua faaue mai Taeae Knorr e haere atu i Brooklyn i reira te faaiteraahia mai eaha ta ˈu ohipa apî e te oaoa iti rahi. I te mea e ua rahi roa e ua aano roa te mau amaa na te ao atoa, ua avarihia te hoê faanahoraa apî. Ua vahihia te ao ei tuhaa fenua ta te hoê tiaau tuhaa fenua e haapao tataitahi. Ua horoahia mai e piti tuhaa fenua: Europa e te tuhaa e haaati ra i te miti Mediteranea.

Aita i maoro i muri aˈe i to ˈu tere poto i Brooklyn, ua hoˈi au i Helevetia e faaineine no te ohipa tuhaa fenua. Ua faaipoipo mâua Esther, e ua apee mai oia ia ˈu i roto i te taviniraa i te amaa no Helevetia. I roto i to ˈu tere matamua, ua tae au i te mau fare mitionare e te mau amaa no Italia, Heleni, Kupero, i te mau fenua no te pae Hitia o te râ no Ropu, i te pae miti no Afirika Apatoerau, i Paniora e i Potiti—13 ïa fenua i te taatoaraa. I muri aˈe i to ˈu hoˈiraa i Berne, ua tere â vau i te tahi atu mau fenua no Europa i te pae tooa o te râ mai o te Paruru auri. I roto i te matahiti matamua o to mâua faaipoiporaa, ua haere ê au e ono avaˈe e tavini i te mau taeae Kerisetiano.

Tauiraa o te mau huru tupuraa

I te matahiti 1957, ua itea mai ia Esther e ua hapû oia, e i te mea e aita te hoê amaa i haamauhia no te mau metua e tamarii ta ratou, ua faaoti mâua e haere i Danemata i reira to Papa farii-maitai-raa ia faaea mâua ia ˈna ra. Ua haapao o Esther i to mâua tamahine o Rakel e i to ˈu metua tane, area o vau ra, te tauturu ra ïa i te raveraa i te ohipa i te amaa no patu-noa-hia ˈtura. Ua tavini au ei orometua haapii i roto i te Haapiiraa no te taviniraa i te Basileia no te mau tiaau amuiraa e ua tamau atoa ei tiaau tuhaa fenua.

No te ohipa tuhaa fenua, e titauhia te mau tau ratereraa roa, o te faaatea maoro ïa ia ˈu ma te peapea i to mâua tamahine. Ua tupu iho â te tahi mau faahopearaa. I te hoê haereraa, i Paris na vau no te tahi taime no te haamau i te hoê fare neneiraa iti. Ua haere mai o Esther e o Rakel na nia i te pereoo auahi e hiˈo ia ˈu e ua tae mai raua i te Gare du Nord. Ua haere atu mâua o Léopold Jontès no te amaa hoi oia, e farerei ia raua. Te tia noa ra o Rakel i nia i te hoê taahiraa avae o te pereoo, hiˈo atura ia Léopold, i muri iho ia ˈu, e hiˈo faahou atura ia Léopold, e inaha tauahi atura ia Léopold!

Ua tupu te tahi atu tauiraa rahi i to ˈu faarueraa, i te 45raa o to ˈu matahiti, i te taviniraa taime taatoa no te rave i te ohipa imiraa no te aupuru i to ˈu utuafare. Ma to ˈu ite ei tavini Ite no Iehova, ua noaa ia ˈu te hoê ohipa ei tiaau tapihooraa. I muri aˈe i to ˈu raveraa i te ohipa fatata e iva matahiti na tauâ taiete ra e te otiraa te tau haapiiraa a Rakel, ua faaoti matou e farii i te faaitoitoraa e haere i te vahi e hinaaro-rahi-aˈe-hia te feia poro i te Basileia.

A hiˈopoa ˈi i te mau ravea i Norevetia, ua ui au i te hoê piha imiraa ohipa e noaa anei te hoê ohipa. E ere te pahonoraa i te mea faaitoito roa. Mea iti roa te ravea no te hoê taata e 55 matahiti. Noa ˈtu râ, ua papai au i te amaa i Oslo e ua tarahu i te hoê fare i pihai i te oire o Drøbak ma te tiaturi e e noaa mai iho â te hoê ohipa. Ua noaa mai iho â, e haamata ˈtura te hoê tau taviniraa i te Basileia oaoa roa i Norevetia.

Te mau taime maitatai roa ˈˈe, i to ta matou ïa amuiraa haereraa i apatoerau e poro i te tuhaa fenua tufa-ore-hia. Ua tarahu matou i te mau fare i roto i te hoê aua puhaparaa, e i te mau mahana atoa, ua haere matou e hiˈo i te mau fare faaapu atea i nia i te mau mouˈa haviti roa. Mea oaoa roa te faaiteraa i te Basileia o te Atua i taua feia farii maitai ra. E rave rahi papai tei pûpûhia, mea tiai râ hoê matahiti no te mau farerei-faahou-raa. Aita râ te taata i haamoe ia matou! Te haamanaˈo noa râ Esther e o Rakel i te taime i hoˈi atu ai matou e i tauahihia ˈi matou mai te mau fetii i maoro i te moeraa. I muri aˈe e toru matahiti i Norevetia, ua hoˈi matou i Danemata.

Te mau oaoaraa o te oraraa utuafare

Aita i maoro, ua momoˈahia Rakel ia Niels Højer, te hoê pionie itoito. I muri aˈe i to raua faaipoiporaa, ua tamau noa o Niels e o Rakel ei pionie e ia tamariihia ˈtu raua. Ua riro o Niels ei tane e ei metua tane maitai o te haapao maitai i to ˈna utuafare. Oioi roa i te hoê poipoi, ua rave oia i ta ˈna tamaiti na nia i to ˈna pereoo taataahi, haere atura i te pae miti e mataitai i te hitiraa mahana. Ua ui te hoê taata tapiri i te tamaiti eaha ta raua i rave i ǒ. Ua pahono oia e: “Te pure ra mâua ia Iehova.”

Tau matahiti i muri aˈe, te mataitai ra mâua Esther i te bapetizoraa o to mâua na mootua paari roa ˈˈe e piti, o Benjamin e o Nadja. I roto i te feia mataitai, te vai ra o Niels tei tia taue mai i mua ia ˈu. Ua hiˈo mai oia a na ô ai e, “Eita te mau tane mau e taˈi.” Teie râ, i muri noa ˈˈe mai, era mâua e taˈi ra te tahi i nia i te tahi. Mea oaoa mau te noaaraa te hoê hunoa tane e nehenehe ta oe e ata e e taˈi na muri iho!

Te faatano-noa-raa ˈtu â i te mau huru tupuraa

Ua tae mai te tahi atu â haamaitairaa i to mâua Esther titauraahia e hoˈi e tavini i te amaa no Danemata. I taua râ taime ra, te faaineinehia ra te paturaa i te hoê amaa rahi roa ˈtu â i Holbæk. Ua noaa ia ˈu te fanaˈoraa e apiti i roto i te tiaauraa i te ohipa paturaa tei rave-paatoa-hia e te mau rima tauturu tamoni ore. Noa ˈtu te hoê tau toetoe roa ino, i te hopea matahiti 1982, ua oti te rahiraa o te paturaa, e ua oaoa matou paatoa i te tomoraa i roto i te mau fare i faarahihia e i haamaitaihia!

Aita i maoro, to roto vau i te piha ohipa, mea mauruuru roa hoi na ˈu te reira, area o Esther ra, to nia ïa i te niuniu paraparau. Teie râ, ia maoro aˈe, ua tâpûhia oia no te tamau i te tauupu haavare, e hoê matahiti e te afa i muri aˈe, ua tâpûhia to ˈna vairaa au. Noa ˈtu te manaˈo maitai i faaitehia mai e te pǔpǔ rave ohipa o te amaa, ua faaoti mâua e mea maitai aˈe no te taatoaraa ia faarue mâua i te amaa. Ua haere mâua i roto i te amuiraa to reira to mâua tamahine e to ˈna utuafare.

I teie nei, e ere te ea o Esther i te mea maitai. E nehenehe mau râ ta ˈu e parau e i te roaraa o te mau matahiti atoa i tavini amui ai mâua, i roto i te mau tauiraa e rave rahi o te mau huru tupuraa, ua riro oia ei turu e ei hoa faahiahia mau. Noa ˈtu e te ino noa ˈtura to mâua ea, te apiti noa râ mâua ma te taotiahia i roto i te ohipa pororaa. Ia feruri au i to ˈu oraraa, e haamanaˈo vau ma te mauruuru i te mau parau a te papai salamo: “Na oe, e tau Atua, i haapii mai ia ˈu mai to ˈu apîraa mai â.”—Salamo 71:17.

[Nota i raro i te api]

[Hohoˈa i te api 24]

Te huri ra i te hoê utaa papai i te amaa no Heremani e patuhia ra i te matahiti 1949

[Hohoˈa i te api 25]

I roto i to ˈu mau hoa ohipa, te vai ra te mau Ite mai teie feia i hoˈi mai mai te mau aua faatîtîraa

[Hohoˈa i te api 26]

E o Esther i teie nei e i to mâua faaipoiporaa i te Betela no Berne, Atopa 1955