Mau uiraa a te feia taio
Ua ite anei Abela e mea hinaarohia te hoê tusia animara no te fanaˈo i te farii maitai a te Atua?
Mea poto roa te aamu bibilia o Kaina e o Abela o te pûpû ra i ta raua ô. I roto i te Genese 4:3-5, te taio nei tatou e: “E tae aˈera i te tau i haapaohia ra, ua hopoi atura Kaina i te maa o te fenua nei ei ô na Iehova. E ua hopoi atoa hoi Abela i te hoê mamoe maitai e te poria no roto i te nǎnǎ ra; ite maira Iehova ia Abela e ta ˈna ô; area o Kaina e ta ˈna ô, aore ïa oia i ite mai.”
Aita te Bibilia e parau ra e hou teie ohipa, ua horoa Iehova i te tahi haamaramaramaraa taa maitai no nia i te mau tusia aore ra teihea huru tusia ta ˈna e farii. E au ra ïa e ua pûpû o Kaina e o Abela i te ô ta raua iho i maiti. Ua opanihia raua ia tomo i roto i te nohoraa paradaiso matamua o to raua na metua; ua haamata raua i te ite i te mau faahopearaa o te hara; e ua atea ê raua i te Atua. I roto i to raua huru tupuraa hara e te aroha, eita e ore e ua hinaaro roa raua e fariu i nia i te Atua no te ani i te tauturu. Na raua iho i hinaaro e pûpû i te hoê ô na te Atua no te fanaˈo i ta ˈna farii maitai.
Te faahopearaa, ua farii te Atua i ta Abela ô, eiaha râ ta Kaina. No te aha? No te mea anei e ua pûpû o Abela i te ô e tano e aita o Kaina? Eita ta tatou e nehenehe e haapapu e o te huru ô anei te tumu, i te mea e aita i parauhia ia raua eaha te fariihia e eaha o te ore e fariihia. Peneiaˈe râ e e mea maitai na ô e piti. Ia au i te Ture ta Iehova i horoa na te nunaa Iseraela, e pûpûhia i roto i te mau tusia e fariihia eiaha noa te mau animara aore ra te mau vaehaa animara, te huero roti atoa râ, te mau rǔrǔ kerite, te faraoa ota, te maa euhia, e te uaina. (Levitiko 6:19-23; 7:11-13; 23:10-13) E au ra e e ere no te mau mea anaˈe ta Kaina e ta Abela i pûpû ei tusia i farii ai te Atua hoê e i patoi ai i te tahi atu.—A hiˈo i te Isaia 1:11; Amosa 5:22.
Tau senekele i muri aˈe, ua parau te aposetolo Paulo e: ‘No te faaroo i maitai roa ˈi ta Abela tusia i pûpû i te Atua i ta Kaina; i parauhia mai ai oia e e taata parau-tia, o te Atua i faatia mai i taua taoˈa horoa na ˈna ra i taua faaroo ra.’ (Hebera 11:4) No reira, no te faaroo i faariro ai te Atua ia Abela ei taata parau-tia. Te faaroo râ i te aha? Te faaroo ïa i ta Iehova parau fafau e e horoa mai oia i te Huero, o ‘te haaparuparu i te afii o te ophi’ e o te haamau faahou i te hau e te huru tia roa ta te taata i fanaˈo na. Na roto i te parau ra e e ‘haaparuparuhia’ te Huero i te “poro avae,” ua feruri paha o Abela e mea titauhia ia pûpû oia i te hoê tusia e manii ai te toto. (Genese 3:15) Atira noa ˈtu, e parau mau e no te faaiteraa o Abela i te faaroo i ‘maitai roa ˈi ta ˈna tusia i ta Kaina.’
Oia atoa, ua patoihia o Kaina e ere no te mea ua hape ta ˈna tusia, no te mea râ e ua ere oia i te faaroo, mai ta ta ˈna mau ohipa i faaite mai. Ua parau maitai o Iehova ia Kaina e: “Ia rave oe i te parau maitai ra, eita anei e itehia mai?” (Genese 4:7) Aita te Atua i patoi ia Kaina no to ˈna mauruuru ore i ta ˈna tusia. ‘No te mea râ e e parau iino ta ˈna iho’—mai te feii, te riri, e te taparahiraa taata i te pae hopea—ua patoi te Atua ia Kaina.—Ioane 1, 3:12.