Oraraa faaterehia e te mau tiaturiraa niu ore
E FAREREI outou i te hoê taata a faarue ai outou i to outou fare. E tote to outou avae i nia i te hoê ofai. E himene te hoê manu i te ahiahi. E moemoeâ noa outou i tauâ mea ra. E mau tupuraa rii e te atâta ore teie no te taata e rave rahi. No te tahi râ mau nunaa i Afirika Tooa o te râ, e nehenehe te reira e hiˈohia mai te tahi mau tapao, mau tohu, aore ra mau poroi no ǒ mai i te ao varua ra. E manaˈo te taata e ua fatata roa mai te hoê oraraa fanaˈo aore ra te hoê ati, tei te tapao ïa e to ˈna tatararaa.
Parau mau, te vai atoa ra te mau tiaturiraa niu ore i rapaeau i te fenua Afirika. Noa ˈtu e ua ora na ratou i roto i te hoê nunaa atua ore e rave rahi matahiti i te maoro, te paturu noa ra te tahi pae o te feia no Taina e no te mau repupirita o te mau hau amui Soviétiques i te mau tiaturiraa niu ore. I te mau fenua tooa o te râ, mea rahi o te hiˈo i to ratou tohuraa tapao, o te riaria i te Mahana pae 13, e o te ape i te mau mimi ereere. Te mau maramarama no te pae apatoerau no te tahi mau nunaa no apatoerau roa, e tohu ïa o te tamaˈi e te maˈi. I Inidia, te parare nei te maˈi SIDA i te feia faahoro pereoo rarahi, te manaˈo ra ratou e e tia ia ratou ia rave i te peu taatiraa ia vai hau noa ratou i te mau mahana veavea. I Tapone, te manaˈo ra te mau rave ohipa i roto i te eˈa na raro i te fenua e e tohu ino ia tomo te hoê vahine i roto i te hoê eˈa na raro i te fenua aitâ i oti. Mea rahi atoa te mau tiaturiraa niu ore i roto i te haa tuaro faanahohia. Ua parau roa te hoê taata hauti i te paˈiraa popo e maoti to ˈna oomoraa i te totini ereere eiaha râ te totini uouo, i manuïa noa ˈi o ˈna. Te vai ra ˈtu â.
E o outou? Te vai ra anei te tahi mǎtaˈu huna e te taa ore i roto ia outou? Te taiâ ra anei outou i te hoê “tiaturiraa, te tahi faito tiaturiraa, aore ra peu e au ra e aita e tatararaa tano”? E nehenehe ta outou pahonoraa e faaite mai e te faaterehia ra anei to outou oraraa e te tiaturiraa niu ore, no te mea tera te auraa o te parau ra tiaturiraa niu ore.
Te taata o te vaiiho e ia ohipa te tiaturiraa niu ore i nia i ta ˈna mau faaotiraa e ta ˈna tereraa ohipa matauhia i te mau mahana atoa, te vaiiho ra ïa oia e ia faaterehia oia e te hoê mea aita e taa maitai ra ia ˈna. E haerea paari anei? E tia anei ia tatou ia auraro i taua mana papu ore e te ino atoa ra? E paruparu atâta ore anei te tiaturiraa niu ore aore ra e fifi atâta?