Ei faarǔrǔraa i te vero

I NIA roa i te mau mouˈa o te mau Alpes i Europa, e nehenehe outou e ite i te hoê raau iti paari parauhia te rhododendron ferrugineux. E pinepine, e tupu teie raau iti i roto i te mau uru aihere haehaa meumeu i raro i te repo no te paruru ia ratou i te mataˈi puai o te mau vahi teitei. E haafifi te vero tamau i te mau raau no te mau Alpes, no te mea e topa to ratou anuvera, e mǎrô te reva e te repo, e e matara mai to ratou mau aˈa.

E pinepine, e ora ˈtu te rhododendron ferrugineux i te faainoraa a te vero, no te mea e tupu oia i roto i te mau afâ mato. Noa ˈtu e aita i rahi te repo i teie mau vahi, e riro te mau afâ mato ei parururaa i te vero e e nehenehe te raau e tapea mai i te pape. I te rahiraa o te matahiti, fatata eita teie mau raau e itehia, i te tau veavea râ, e faaunauna teie mau rhododendrons i te mau mouˈa i to ratou mau tiare uteute oraora.

Ua faataa te peropheta Isaia e e nomino te Atua i te mau “[tamaiti hui] arii” e e riro ratou taitahi ei “faarǔrǔraa i te vero.” (Isaia 32:1, 2; MN) I raro aˈe i te aratairaa a te Arii, te Mesia ra o Iesu, e riro teie mau tamaiti hui arii, aore ra tiaau, mai te mau mato aueue ore o te mau papu i te mau taime hepohepo aore ra mauiui roa. E horoa ratou i te tamaru papu i mua i te ati e te tauturu na te feia veve ia tapea maite ratou i ta ratou pape pae varua no roto mai i te Parau a te Atua.

E nehenehe te vero o te hamani-ino-raa, o te toaruaru, aore ra te maˈi e tairi i te hoê Kerisetiano, a oriorio atu ai to ˈna faaroo ia ore oia e paruruhia. E nehenehe te mau matahiapo Kerisetiano e pûpû i te parururaa na roto i te faaroo-maitai-raa i to ˈna mau fifi, i te horoaraa i te mau aˈoraa bibilia, te faaitoitoraa e te tauturu mau. Mai to ratou Arii nominohia, te Mesia ra o Iesu, e hinaaro ratou e tauturu i te feia i “faarue-taue-hia.” (Mataio 9:36) E e hinaaro ratou e tauturu ia vetahi ê o tei faainohia e te vero o te haapiiraa hape. (Ephesia 4:14) E nehenehe teie tauturu i te taime au e riro ei mea faufaa roa.

“Ua faaruru vau i te hoê tau peapea mau i roto i to ˈu oraraa i to te tahi mau hoa rahi faarueraa i te parau mau e, i to to ˈu metua tane tupuraahia i te tapahi o te roro i te hoê â taime,” ta Miriam ïa e faataa ra. “No te tamata i te faaruru i to ˈu hepohepo, ua haamata vau i te haamatau i te hoê tamaroa no teie nei ao. I muri iti noa ˈˈe, no to ˈu manaˈo e mea faufaa ore au, ua faaara vau i te mau matahiapo o te amuiraa e ua faaoti au e faarue i te parau mau, i te mea e ua papu ia ˈu e eita ta Iehova e nehenehe e here ia ˈu.

“I taua taime faufaa roa ra, ua haamanaˈo mai te hoê matahiapo aumauiui i tera mau matahiti i tavini ai au ei pionie tamau. Ua parau mai oia ia ˈu e ua popou noa oia i to ˈu haapao maitai, e ua ani oia ma te mǎrû e ia vaiiho vau i te mau matahiapo ia tauturu ia ˈu, ia haapapu faahou mai ratou ia ˈu i te here o Iehova. Ua riro to ˈna anaanatae î i te here i taua taime faufaa roa ra mai te hoê ‘faarǔrǔraa’ no ˈu i roto i te vero pae varua ta ˈu e faaû ra. I roto hoê avaˈe, ua tâpû vau i to ˈu taairaa e to ˈu hoa, e te tamau noa nei au i te haere na te eˈa o te parau mau mai reira mai.”

E mauruuru te mau matahiapo ia ite ratou i te mau hoa Kerisetiano ia ruperupe i te pae varua, maoti te parururaa ta ratou e horoa ra i te taime au. E te horoa maira teie mau “faarǔrǔraa” i te hiˈoraa atea o te tauturu pae varua rahi ta tatou e fanaˈo i te roaraa o te Faatereraa Mireniuma a te Mesia.