Te vai ra anei te tahi tiaturiraa e e faaorahia tatou?
Ua parauhia e o te senekele 20 te senekele o tei haamanii rahi roa ˈˈe i te toto ta te huitaata i ore i ite aˈenei. O te ohipa ino, te tamaˈi, te aroraa i rotopu i te mau opu taata, te raau taero, te haerea parau-tia ore, e te haavîraa uˈana iho â râ tei parare i te roaraa o na tau ahuru matahiti i mahemo. Ua faaruru atoa te taata i te oto e te mauiui no te maˈi, te matahiti rahi, e te pohe. O vai ïa o te ore e hinaaro ia matara te mau fifi rahi roa e vai ra i roto i te ao i teie mahana? Ia hiˈo tatou i te tau no a muri aˈe, te vai ra anei te tahi tiaturiraa e e faaorahia tatou?
A HIˈO na i te orama ta te aposetolo Ioane i fanaˈo fatata e 2 000 matahiti aˈenei. Ua papai oia e: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:3, 4) Ua tohu atoa te peropheta Isaia e: “E na ˈna e haamou roa i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa ra, e faaore hoi i te faaino i to ˈna taata i nia i te fenua atoa nei: o Iehova hoi teie e parau nei.”—Isaia 25:8.
A feruri noa na ia tupu anaˈe te mau parau tǎpǔ a te Atua! E faaorahia, aore ra e faatiamâhia, te huitaata i te faatîtîraa e te haavîraa uˈana, e i te mau tumu o te mauiui e o te ati. Inaha, eita atoa te maˈi, te matahiti rahi, e te pohe e haamauiui ia tatou! Te tǎpǔ ra te Parau a te Atua, te Bibilia, i te ora mure ore i roto i te mau huru tupuraa tia roa i nia i te fenua. (Luka 23:43; Ioane 17:3) E te reira, no te taata atoa ïa e hinaaro atu. ‘E hinaaro te Atua ia ora te taata atoa, e ia noaa ia ratou te ite i te parau mau.’—Timoteo 1, 2:3, 4.
No te fanaˈo râ i te mau parau tǎpǔ a te Atua, mea titauhia ia maramarama tatou i te tuhaa a Iesu Mesia i roto i to tatou faaoraraa e ia faahotu tatou i te faaroo ia ˈna. Ua parau Iesu iho e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) No nia i te tuhaa faufaa roa a Iesu Mesia i roto i teie ohipa, ua parau te aposetolo Petero e: “Aore roa hoi e ora ia vetahi ê, aita ˈtu hoi e iˈoa i faaitehia mai i te taata i raro aˈe i teie nei raˈi, e ora ˈi tatou nei.” (Ohipa 4:12) Ua aˈo atu te aposetolo Paulo e to ˈna hoa o Sila i te hoê taata e: “E faaroo i te Fatu ia Iesu Mesia, e e ora ïa oe e to fetii atoa.”—Ohipa 16:30, 31.
Oia, o Iesu Mesia “te Tumu o te ora,” e e nehenehe tatou e faaorahia na roto noa ia ˈna. (Ohipa 3:15) Nafea râ te hoê taata e nehenehe ai e riro ei taata faufaa roa i roto i to tatou faaoraraa? Ia maramarama maitai tatou i ta ˈna tuhaa i roto i taua ohipa ra, e puai ïa to tatou tiaturiraa i te faaoraraa.
[Faaiteraa i te fatu o te hohoˈa i te api 2]
Api 3: Mau manureva topita: USAF photo; mau tamarii e pohe poia ra: UNITED NATIONS/J. FRAND; pahi tamaˈi e paapaa ra i te auahi: U.S. Navy photo