I riro na mâua ei luko—I teie nei, e mamoe mâua!

I to mâua Sakina tamahine-iti-raa ra, e feia tapiri mâua. Mea rahi e mea pautuutu o Sakina, area o vau ra, mea nainai ïa e te pararai. E pinepine mâua i te tatamaˈi, i te hoê râ mahana, mea huru ino to mâua taputôraa. Mai reira mai, aita mâua i paraparau faahou te tahi i te tahi, aita atoa i aroha faahou te tahi i te tahi. I te pae hopea, ua reva mâua e piti atoa ra e aita mâua i farerei faahou.

I te matahiti 1994, ua haamata vau i te haapii i te Bibilia e te mau Ite no Iehova, e ua taui mǎrû atura to ˈu huru taata. E maha matahiti i muri aˈe, a haere ai au i ta matou mahana tairururaa taa ê i Bujumbura, i Burundi, ua maere au i te farereiraa ia Sakina. Ua oaoa vau e to reira oia, mea huru toetoe rii râ to mâua aroharaa. Ia maoro rii aˈe i taua mahana ra, ua maere roa vau i te iteraa ˈtu ia ˈna i roto i te feia e bapetizohia ra! Ua taui roa atoa oia. E ere faahou oia i te vahine taputô ra ta ˈu i tatamaˈi pinepine. Mea faahiahia mau te iteraa ia ˈna ia haapapu i mua i te taata e ua pûpû oia ia ˈna iho na te Atua na roto i te fariiraa i te bapetizoraa i roto i te pape!

I to ˈna tiaraa mai mai raro mai i te pape, ua haere oioi au e tauahi ia ˈna e ua omuhumuhu vau i roto i to ˈna tariˈa e: “Te haamanaˈo ra oe i to tâua taputô-noa-raa?” “E,” o ta ˈna ïa i parau mai, “te haamanaˈo ra vau, tei mutaa ihora râ tera. E taata apî au i teie nei.”

Te oaoa nei mâua e piti atoa ra e ua itea mai ia mâua te parau mau bibilia o te tahoê e ua taui mâua i to mâua huru taata e au i to te luko ei huru taata e au i to te mamoe a te Tiai mamoe Rahi ra te Atua ra o Iehova. Oia mau, e taui te parau mau bibilia i te mau oraraa.