Upootiaraa i te Tiripuna e au i te pǎpǎ ture a te hau
UA NOAA i te mau Ite no Iehova i Heremani te hoê upootiaraa faahiahia i te Tiripuna e au i te pǎpǎ ture a te hau i Karlsruhe. Ua rave hoi ratou i te hoê taahiraa avae faufaa no nia i te haamanaraa i ta ratou taatiraa.
E hau atu i te 100 matahiti i teie nei to te mau Ite no Iehova pororaa i Heremani. Ua ora mai ratou i te hamani-ino-raa uˈana a te mau Nazis e te mau Communistes, na faatereraa haavî e piti o te senekele 20. Mai te matahiti 1990 mai, ua imi te mau Ite e ia haamanahia ratou ei taatiraa e au i te ture a te hau. I muri aˈe i te horoaraahia e piti faaotiraa maitai e te faaoreraahia hoê, ua horo faahou te mau Ite i te Tiripuna e au i te pǎpǎ ture a te hau, o tei horoa i ta ˈna faaotiraa i te 19 no Titema 2000.
Faaotiraa i rave-tahi-hia no te mau Ite no Iehova
Ua horoa na haava e hitu atoa ra i te hoê faaotiraa maitai no te mau Ite. Ua faaore te mau haava i te hoê faaotiraa i horoahia e te Tiripuna faatereraa a te hau i te matahiti 1997 e ua faaue ratou i taua tiripuna ra e hiˈo faahou i te aniraa a te mau Ite.
Ua faaohipa te Tiripuna e au i te pǎpǎ ture a te hau i taua taime maitai ra no te faataa i te taairaa faufaa i rotopu i te Hau e te mau pǔpǔ faaroo. “E ere na ta ˈna mau tiaturiraa, na to ˈna râ haerea e faataa” eaha te tiaraa o te hoê haapaoraa.
Ua tapao atoa te tiripuna e ia rave te mau Ite i te “tiaraa amui ore Kerisetiano,” “aita [ïa ratou] e ofati ra i te manaˈo tumu o te demotaratia” e “aita [ratou] e hinaaro ra e mono i te demotaratia na roto i te tahi atu huru faatereraa.” No reira, eita te oreraa e maiti i te pae poritita i te otoheraa no te ore e farii i te aniraa a te mau Ite e ia haamanahia ratou i mua i te ture.—Ioane 18:36; Roma 13:1.
Ua tapao atoa te tiripuna e e nehenehe te hoê taata faaroo—e Ite anei aore ra no te tahi atu haapaoraa—e farerei i te hoê huru tupuraa eita te mau aniraa a te Hau e tuati i te mau titauraa a to ˈna faaroo. Mai te peu e e pee oia i to ˈna manaˈo haava na roto i te “auraroraa i te mau tiaturiraa faaroo hau aˈe i te ture,” e nehenehe te Hau e faariro i te reira ei mea tia i roto i te taotiaraa o te tiamâraa i te pae haapaoraa.—Ohipa 5:29.
Ua paraparau-rahi-hia te faaotiraa a te tiripuna i roto i te mau vea. Te vai ra te hoê parau faataa o te haavaraa fatata i roto i te mau vea atoa i Heremani. Ua haapuroro te mau afata teata e te mau radio rarahi atoa i te mau parau faataa aore ra te mau uiuiraa. Aita te iˈoa o Iehova i faatianianihia aˈenei mai teie te huru i Heremani.
[Faaiteraa i te fatu o te hohoˈa i te api 8]
AP Photo/Daniel Maurer