Ua ‘mau papu oia e tae noa ˈtu i te hopea’

I TE pataraahia te hoê hohoˈa video i te matahiti 1993 i te mau melo apî o te pu rahi a te mau Ite no Iehova, ua faaite o Lyman Alexander Swingle i to ˈna mau manaˈo hohonu no nia i te taviniraa ia Iehova: “Ia pohe oe i roto i te ohipa!”a

Ua rave noa o Taeae Swingle, e 90 matahiti, i te mea ta ˈna i faaitoito na ia vetahi ê e rave. Ua ‘mau papu oia e tae noa ˈtu i te hopea.’ (Mataio 24:13) Noa ˈtu to ˈna mauiui, ua haere oia i te hoê apooraa a te Tino Aratai a te mau Ite no Iehova, e melo hoi oia, i te Mahana toru 7 no Mati. I te Mahana piti i muri mai, ua ino roa oia, e i te hora 4 mairi 26 minuti i te aahiata, i te 14 no Mati, ua parau to ˈna taote e ua pohe oia.

Ua haamata o Lyman Swingle i ta ˈna taviniraa i te pu rahi o te ao atoa nei a te mau Ite no Iehova i Brooklyn, i New York, i te 5 no Eperera 1930. Ua tavini oia i reira fatata e 71 matahiti i te maoro. Ua haa na mua o Lyman i te tuhaa tahoêraa buka, i muri iho, i te piha neneiraa, e ua tauturu atoa oia i te hamani i te inita. Inaha, ua haa o Taeae Swingle fatata e 25 matahiti i roto i te piha hamaniraa inita. Ua tavini atoa râ oia fatata e 20 matahiti i te maoro ei melo o te tuhaa papairaa i te pu rahi. I na matahiti hopea 17 o to ˈna oraraa, ua haa oia i roto i te Piha haapao faufaa.

E taata poro mǎtaˈu ore o Lyman i te Basileia o te Atua. I te mau matahiti matamua o ta ˈna taviniraa i Brooklyn, ua matau raua to ˈna hoa piha o Arthur Worsley i te tere na nia i te hoê o te mau pahi a te mau Ite i nia i te Anavai Hudson. Ma te faaohipa i te matini haapurororaa, ua faaite raua i te poroi o te Basileia na te mau oire i te tahatai e rave rahi hopea hebedoma i te maoro.

Ua fanauhia o Taeae Swingle i te 6 no Novema 1910, i Lincoln, Nebraska, i muri iti noa ˈˈe râ, ua haere te utuafare e faaea i Salt Lake City, i Utah. I reira, i te matahiti 1913, ua riro mai to ˈna mau metua ei Feia haapii Bibilia, te iˈoa tahito o te mau Ite no Iehova. I te roaraa o te mau matahiti, ua farii mai te utuafare Swingle e rave rahi taeae orero ratere no te pu rahi mai a te mau Ite i Brooklyn, e ua ohipa maitai teie mau taeae i nia ia Lyman. I te matahiti 1923, i te 12raa o to ˈna matahiti, ua bapetizohia oia ei taipe o ta ˈna euhe i te Atua.

I muri aˈe i to ˈna taviniraa hau atu i te 26 matahiti i Brooklyn ei taata taa noa, ua maitai rahi roa to Lyman oraraa i to ˈna faaipoiporaa ia Crystal Zircher i te 8 no Tiunu 1956. Mea piri roa raua, e ua rave amui raua i te taviniraa e tae noa ˈtu i to Crystal poheraa i te matahiti 1998. Fatata e toru matahiti na mua ˈtu, ua roohia o Crystal i te fifi i te pae o te roro e ua paruparu roa ino to ˈna tino. Ua riro to Lyman utuuturaa ia Crystal ei hiˈoraa o te haapao maitai o tei faaitoito i te feia atoa i matau ia raua, te feia iho â râ i ite ia Lyman ia turai ma te here i te parahiraa turai na te hiti purumu i te mau vahi tapiri a faaite ai o Crystal i Te Pare Tiairaa e te A ara mai na! i te feia e hahaere ra.

E taata huna ore e te hamani maitai o Taeae Swingle e mea herehia oia e te feia i matau ia ˈna. Mai to ˈna metua tane e to ˈna metua vahine, e tiaturiraa niuhia i nia i te Bibilia to ˈna e ora i pihai ia Iesu Mesia i roto i te Basileia i te raˈi, e te tiaturi nei tatou e i teie nei, ua tupu taua tiaturiraa no ˈna ra.—Tesalonia 1, 4:15-18; Apokalupo 14:13.

[Nota i raro i te api]

[Hohoˈa i te api 31]

Ua haa Taeae Swingle fatata e 25 matahiti i roto i te piha hamaniraa inita

[Hohoˈa i te api 31]

Mea piri roa o Lyman e o Crystal