O Cyrille e o Méthode—Mau taata huri Bibilia tei hamani i te hoê piapa

“Mea bapetizohia to matou nunaa e aita râ ta matou e orometua haapii. Eita e taa ia matou te reo Heleni eita atoa te reo Latino. . . . Eita e taa ia matou te mau leta parau e to ratou auraa; no reira, a tono mai i te mau orometua haapii na matou ia faaite mai ratou i te mau parau o te mau Papai e to ratou auraa.”—Ratislav, tamaiti hui arii no Moravie, 862 T.T.

I TEIE mahana, e nehenehe na taata e hau atu i te 435 mirioni e parau i te mau reo hoê â tumu e te reo Slave e taio i te Bibilia na roto i to ratou reo tumu.a I nia i te reira, e 360 mirioni te faaohipa i te piapa a Cyrille. Teie râ, a 12 senekele aˈenei, aita hoê aˈe parau papai aore ra e piapa na roto i te reo o to ratou mau tupuna. O Cyrille e o Méthode, e taeae pae tino raua, na taata i tauturu i te faaafaro i taua huru tupuraa ra. E manaˈo te mau hoa o te Parau a te Atua e e ohipa ê roa te mau tutavaraa apî e te mǎtaˈu ore a teie na taeae i roto i te tuatapaparaa o te parururaa e te haaparareraa i te Bibilia. O vai ma na taata ra, e eaha te mau fifi ta raua i faaruru?

“Te philosopho” e te tavana

Ua fanauhia o Cyrille (827-869 T.T., o Constantin to ˈna iˈoa matamua) e o Méthode (825-885 T.T.) i roto i te hoê utuafare fanauraa teitei i Tesalonia, i Heleni. Toopiti reo e paraparauhia ra i taua tau ra i Tesalonia, te reo Heleni e te hoê amaa o te reo Slave. Maoti paha te mau Slaves e rave rahi e te taairaa piri i rotopu i te mau melo huiraatira e te mau oire rii Slaves e haaati ra, i noaa ˈi ia Cyrille e ia Méthode te ite papu i te reo Slave no apatoa. Ua tapao atoa te hoê taata i papai i te aamu o Méthode e e Slave to raua metua vahine.

I muri aˈe i te poheraa to ˈna metua tane, ua haere o Cyrille e faaea i Constantinople, te oire pu o te Hau emepera no Byzance. I reira, ua haere oia i te fare haapiiraa tuatoru a te Hau emepera e ua amui e te mau orometua haapii faahiahia. Ua riro oia ei taata haapao buka i Sainte-Sophie, te fare taa ê roa ˈˈe a te ekalesia no te pae Hitia o te râ ma, e i muri aˈe, ei orometua haapii i te philosophia. Inaha, no ta ˈna mau ohipa aivanaa, ua topahia o Cyrille i te iˈoa pii ra Te philosopho.

I taua area taime ra, ua pee o Méthode i te toroa a to ˈna metua tane—tiaauraa poritita. Ua raea ia ˈna te toroa archonte (tavana) i te hoê mataeinaa no Byzance i pihai i te otia fenua mea rahi te Slaves e faaea ra i reira. Teie râ, ua haere oia e faaea i roto i te hoê fare monahi i Bitunia, i Asia Iti. Ua haere atu o Cyrille ia ˈna ra i te matahiti 855 T.T.

I te matahiti 860 T.T., ua tono te patereareha no Constantinople i na taeae ei mitionare i te fenua ê. Ua tonohia raua i te mau Khazars ra, te hoê nunaa e faaea ra i te pae apatoerau hitia o te râ o te mer Noire e te feaa noa râ i roto i te haapaoraa Mahometa, ati Iuda, e te Kerisetianoraa. A haere atu ai oia i ǒ, ua faaea o Cyrille maa taime iti i Cherson, i Crimée. Te tiaturi nei te tahi mau aivanaa e i reira to ˈna haapiiraa i te reo Hebera e Samaria e to ˈna huriraa i te hoê tarame Hebera na roto i te reo o te mau Khazars.

Te hoê titauraa no Moravie mai

I te matahiti 862 T.T., ua hapono o Ratislav, tamaiti hui arii no Moravie (i teie tau o te Tchéquie hitia o te râ, te Slovaquie tooa o te râ, e te Honegeria tooa o te râ ïa), i te rata aniraa e itehia ra i te paratarafa matamua na te emepera no Byzance o Michel III—ia tono oia i te mau orometua haapii i te mau Papai. Ua haamatau-aˈena-hia te feia reo Slave no Moravie i te mau haapiiraa a te ekalesia e te mau mitionare no te basileia Franc no Hitia o te râ mai (o Heremani e o Auteteria i teie nei). Te haapeapea ra râ o Ratislav no te mana poritita e ekalesiatiko o te mau opu Heremani. Te tiaturi ra oia e e tauturu te mau taairaa faaroo e o Constantinople ia tapea to ˈna nunaa i te tiamâraa poritita e faaroo.

Ua faaoti te emepera e tono ia Méthode e ia Cyrille i Moravie. I te pae aivanaa, haapiiraa e i te pae o te reo, ua ineine maitai na taeae no te amo i teie ohipa mitionare. Te faaite maira te hoê taata papai aamu mau no te senekele 9 e ua na ô te emepera i to ˈna faaitoitoraa ia raua e haere i Moravie e: “No Tesalonia orua e piti atoa ra i te fanauraahia, e mea ite roa to Tesalonia atoa i te reo Slave.”

Ua mahiti mai te hoê piapa e te hoê huriraa bibilia

I te roaraa o te mau avaˈe hou te revaraa, ua faaineine o Cyrille i te ohipa mitionare na roto i te hamaniraa i te hoê piapa papai na te mau Slaves. Ua parauhia e e tariˈa maitai roa to ˈna no te mau taˈiraa reo. No reira, ma te faaohipa i te mau leta Heleni e Hebera, ua tamata oia i te taai i te hoê leta i te taˈiraa reo taitahi o te reo Slavon.b Te tiaturi nei te tahi feia maimi e ua rave aˈena oia tau matahiti no te haamau i te niu o taua piapa ra. E te vai noa râ te papu ore no nia i te huru mau o te piapa ta Cyrille i feruri.—A hiˈo i te tumu parau tarenihia “Na Cyrille aore ra e glagolitique?”

I taua area taime ra, ua haamata o Cyrille i te hoê porotarama huriraa Bibilia ma te vitiviti. Ia au i te tutuu, ua haamata oia na roto i te huriraa i te pereota matamua o te Evanelia a Ioane mai te reo Heleni i roto atu i te reo Slavon, ma te faaohipa i te piapa no hamani-noa-hia ˈtura: “I te matamua ra i vai na te Logo . . .” Ua haere o Cyrille i mua na roto i te huriraa i na Evanelia e maha, te mau episetole a Paulo, e te buka Salamo.

Ua haa anei oia o oia anaˈe? Ua tauturu paha o Méthode i roto i taua ohipa ra. Hau atu â, te na ô ra te buka ra The Cambridge Medieval History e: “Mea ohie ia feruri e ua tauturuhia [o Cyrille] e vetahi ê, mea papu iho â ïa e o te mau Slaves tumu tei fanaˈo i te haapiiraa Heleni te feia matamua roa. Ia hiˈopoa tatou i te mau huriraa tahito roa ˈˈe, . . . te vai ra te haapapuraa rahi roa ˈˈe o te hoê ite hohonu roa i te reo Slavon, o te tia ia parauhia e no ǒ mai i te mau hoa ohipa e Slaves mau ratou.” Na Méthode i faaoti i te toea o te Bibilia i muri aˈe, mai ta tatou e ite mai.

“Mai te mau oreba ia aˈuaˈu i te hoê nesa”

I te matahiti 863 T.T., ua haamata o Cyrille e o Méthode i ta raua ohipa mitionare i Moravie, ua fariihia hoi raua ma te mahanahana i reira. Ta raua ohipa, o te haapiiraa ïa i te piapa Slavon no hamani-noa-hia ˈtura i te hoê pǔpǔ feia tumu, taa ê atu i te huriraa i te Bibilia e te mau buka rituria.

E ere roa ˈtu râ i te mea ohie. Ua patoi uˈana te pǔpǔ ekalesiatiko Franc no Moravie i te faaohiparaa o te reo Slavon. Te mau ra ratou i te hoê haapiiraa na roto e toru reo, a onoono ai e o te mau reo Latino, Heleni e Hebera anaˈe te nehenehe e fariihia i roto i te haamoriraa. Ma te tiaturi e noaa te turu a te pâpa i ta ratou reo papai no haamau-noa-hia ˈtura, ua tere atu na taeae i Roma i te matahiti 867 T.T.

I roto i to raua tere, ua farerei faahou o Cyrille e o Méthode i te hoê pǔpǔ ekalesiatiko Latino o te turu i te haapiiraa na roto e toru reo, i Venise. Te faaite maira te hoê taata no te Anotau no Ropu tei papai i te aamu o Cyrille e ua tuhi te mau epikopo, te mau perepitero, e te mau monahi no reira ia ˈna “mai te mau oreba ia aˈuaˈu i te hoê nesa.” Ia au i taua aamu ra, ua pahono atu o Cyrille na roto i te faahitiraa i te Korinetia 1, 14:8, 9 e: “E ia ore hoi ia taa te oto o te pu ra, na vai e faaineine ia ˈna iho e haere i te tamaˈi? Oia atoa outou, ia ore to outou vaha ia parau i te parau itea ra, eaha ihora e itea ˈi te parau i parauhia ra? e riro outou i te parau noa i roto i te reva.”

I to na taeae tapaeraa ˈtu i Roma i te pae hopea, ua farii maite roa te pâpa Adrien II ia faaohipa raua i te reo Slavon. Tau avaˈe i muri aˈe, tei Roma noâ raua, ua maˈihia o Cyrille e mea ino roa. Aita i tia e piti avaˈe i muri aˈe, ua pohe oia i te 42raa o to ˈna matahiti.

Ua faaitoito te pâpa Adrien II ia Méthode e hoˈi e haa i Moravie e na te pae o te oire o Nitra, i tei riro i teie nei o Slovaquie. No to ˈna hinaaro e haapapu i to ˈna mana i nia i taua vahi ra, ua horoa te pâpa i te mau rata faatiaraa e faaohipa i te reo Slavon na Méthode e ua nomino aˈera ia ˈna ei arii epikopo. I te matahiti 870 T.T. râ, ua haru te epikopo Franc o Hermanrich, ma te tauturuhia e te tamaiti hui arii o Svatopluk no Nitra, ia Méthode. Ua tapeahia oia e piti matahiti e te afa i te maoro i roto i te hoê fare monahi i Heremani apatoa e hitia o te râ. I te pae hopea, ua faaue tei mono ia Adrien II, te pâpa Jean VIII, ia tuuhia o Méthode, ua faahoˈi ia ˈna i roto i to ˈna mataeinaa epikopo, e ua haapapu e te turu ra oia i te faaohiparaa o te reo Slavon i roto i te haamoriraa.

Ua tamau noa râ te patoiraa a te pǔpǔ ekalesiatiko Franc. Ua manuïa o Méthode i te parururaa ia ˈna iho i mua i te mau pariraa i te hairesi, e i te pae hopea, ua noaa ia ˈna te hoê parau faatia taa ê a te pâpa Jean VIII no te faaohipa i te reo Slavon i roto i te ekalesia. Mai ta te pâpa no teie tau o Ioane Paulo II i faˈi, ua ora o Méthode “i roto i te mau tere, te mau ereraa, te mauiui, te riri e te hamani-ino-raa, . . . e tae noa ˈtu i te hoê tau tapearaa mauiui.” Te mea huru ê, oia ua tupu te reira i te rima o te mau epikopo e mau tamaiti hui arii e paturu maite ra ia Roma.

Ua hurihia te taatoaraa o te Bibilia

Noa ˈtu te patoiraa tuutuu ore, ua oti ia Méthode, ma te tauturuhia e tau taata papai haapoto, i te huri i te toea o te Bibilia na roto i te reo Slavon. Ia au i te tutuu, ua rave oia i teie ohipa i te rahi i roto noa e vau avaˈe. Aita râ oia i huri i te mau buka apokirifa a te mau Maccabées.

I teie mahana, e ere i te mea ohie ia faataa ma te tano i te faito maitai o te huriraa a Cyrille e a Méthode. Tau noa hohoˈa parau papai e vai râ no te tau fatata i te taime o te huriraa matamua. Ia hiˈopoa ratou i taua mau hohoˈa matamua varavara ra, e tapao te mau aivanaa ihi reo e mea tano roa te huriraa e mea au roa e te haapeu ore. Te parau ra te buka Our Slavic Bible e “i tia na” i na taeae “ia hamani i te mau taˈo e te mau parau apî e rave rahi . . . E ua na reira raua ma te huru tano maere mau [e] ua haamahora i te reo Slave o te taoˈa-rahi-hia i te mau taˈo ma te ore i itehia aˈenei.”

Te hoê tufaa vai maoro

I muri aˈe i te poheraa o Méthode i te matahiti 885 T.T., ua tiavaruhia ta ˈna mau pǐpǐ mai Moravie atu e te feia patoi Francs. Ua imi ratou i te haapuraa i Bohême, i Poronia apatoa, e i Bulgarie. Ua faahaerehia ïa te ohipa a Cyrille e a Méthode i mua e ua haaparare-mau-hia ïa. Ua ruperupehia, ua faaaanohia te reo Slavon tei tuuhia na roto i te huru papai e te vai maoro aˈe e na taeae, e ua faarauhia i muri aˈe. I teie mahana, te vai ra 13 reo taa ê e e rave rahi reo amaa i roto i te reo Slave.

Hau atu â, te mau hotu i noaa mai maoti te mau tutavaraa mǎtaˈu ore a Cyrille e a Méthode e huri i te Bibilia, o te mau huriraa Slaves rau ïa o te mau Papai e vai ra i teie mahana. Te faufaahia nei te mau mirioni taata e paraparau ra i teie mau reo i te Parau a te Atua na roto i to ratou iho reo. Noa ˈtu te patoiraa uˈana, e parau mau â teie mau parau: ‘E tia i te parau a to tatou Atua i te vai-maite-raa’!—Isaia 40:8.

[Nota i raro i te api]

[Tumu parau tarenihia i te api 29]

Na Cyrille aore ra e glagolitique?

Ua faatupu te huru mau o te piapa ta Cyrille i feruri i te mârôraa rahi, no te mea aita i papu i te mau aivanaa ihi reo eaha mau râ taua piapa ra. Ua niu-maite-hia te piapa parauhia e na Cyrille i nia i te piapa Heleni, ma te mau leta hau 12 aˈe i ferurihia no te faahohoˈa i te mau taˈiraa reo Slavon aita to roto i te reo Heleni. Teie râ, i roto i te tahi mau parau papai Slavon matamua, ua faaohipahia te hoê piapa ê roa, parauhia e glagolitique, e o teie piapa ta te mau aivanaa e rave rahi e manaˈo ra e na Cyrille i hamani. Te itehia ra e no roto mai te tahi mau leta glagolitiques i te papai taaihia Heleni aore ra Hebera. No roto mai paha te tahi i te mau leta no te Anotau no Ropu ma te mau periota e te mau tapao, e mau haaraa apî râ e te taa ê te rahiraa. E au ra e e haaraa apî e te taa ê roa te glagolitique. Teie râ, ta Cyrille tei riro mai ei mau piapa Rusia, Ukraine, Serbie, Bulgarie, e Makedonia no teie tau, e oia atoa ei 22 reo hau, e ere hoi te tahi pae i te reo Slavon.

[Hohoˈa—Leta na Cyrille e glagolitique]

[Hohoˈa fenua i te api 31]

(Hiˈo i te papai)

Baltique

(Poronia)

Bohême (Tchéquie)

Moravie (Tchéquie Hitia o te râ, Slovaquie Tooa o te râ, Honegeria Tooa o te râ)

Nitra

BASILEIA HITIA O TE RÂ O TE MAU FRANCS (Heremani e Auteteria)

ITALIA

Venise

Roma

Mediteranea

BULGARIE

HELENI

Tesalonia

(Crimée)

Mer Noire

Bitunia

Constantinople (Istanbul)

[Hohoˈa i te api 31]

Te hoê Bibilia Slavon na roto i te piapa a Cyrille no 1581

[Faaiteraa i te tumu]

Bibilia: Narodna in univerzitetna knjiz̆nica-Slovenija-Ljubljana