Te oraraa ma te atâta

“Aita e mea ta outou e rave i te mau mahana atoa—tae noa ˈtu te taotoraa—e ere i te mea atâta a riro atu ai ei mea hopea o to outou oraraa.”—Te vea ra Discover.

UA FAAAUHIA te oraraa i te haereraa na te hoê vahi ua pue noa te ofai paaina, no te mea e nehenehe te pepe aore ra te pohe e tupu i te mau taime atoa, e pinepine, ma te ore e faaara mai. E ere hoê â mau mea atâta i tera e tera fenua. Te vai ra te mau ati purumu, te tamaˈi tivira, te oˈe, te SIDA, te mariri ai taata, te maˈi mafatu, e e rave rahi atu â mau mea. I te fenua Afirika i raro mai i te Sahara, ei hiˈoraa, o te SIDA te taparahi taata numera hoê, aita i maoro aˈenei, “e 2,2 mirioni taata tei pohe, 10 ïa taime te numera o tei pohe i te mau tamaˈi tivira atoa i Afirika,” ta te U.S.News & World Report ïa e parau ra.

I te hoê â taime, te haamâuˈa ra te ao ehia miria no te faaroa ˈtu â i te oraraa e no te faaiti i te ati o te maˈi e te paruparu. E nehenehe te mau manaˈo e rave rahi tei faaitoitohia, mai te mau peu tamaaraa e inuraa au noa e te faaetaetaraa i te tino, e horoa mai i te tahi mau faahopearaa maitatai. Te vai nei râ te hoê pu haamaramaramaraa e au ia tiaturihia no nia i te mau tuhaa faufaa atoa o te oraraa o te nehenehe e tauturu ia outou ia fanaˈo i te hoê oraraa papu e te atâta ore aˈe. O te Bibilia taua pu ra. E mau aveia to roto nafea ia faaruru i te mau tapitapiraa rau atoa o te haafifi ra i to tatou ea e to tatou maitairaa. Parau mau, aita te Bibilia e faahohonu ra i te mau fifi atoa. Te horoa ra râ oia i te mau faaueraa tumu maitai roa no te aratai ia tatou i roto i te mau tumu parau mai te mau peu tamaaraa, te maitairaa o te tino, te huru feruriraa, te taatiraa o te tino, te ava, te avaava, tei parauhia e mau raau taero mǎrû, e e rave rahi atu â mau mea.

Ua î atoa te oraraa o te rahiraa i te mau fifi i te pae moni. I ǒ nei atoa, e nehenehe te Bibilia e tauturu mai. Aita noa te Bibilia e faaitoito ra i te hoê manaˈo paari i te moni e te tapura moni, te faaite atoa ra râ nafea ia riro ei rave ohipa aore ra ei paoti ohipa maitai aˈe. No te faaohie noa, e aratai papu te Bibilia, eiaha noa no te panoonoo ore i te pae moni e te maitairaa o te tino, no te oraraa atoa râ. E hinaaro anei outou e ite nafea te Bibilia e au ai ia faaohipahia i teie mahana? A tamau na i te taio.