No te aha e faahotu ai i te maitai morare?

AITA i maoro aˈenei, ua reva o Kunihito, te hoê taata Tapone e 50 e e tiahapa matahiti, e faaea i te mau Hau Amui.a Tau hebedoma i muri aˈe i to ˈna taeraa ˈtu, ua farerei oia i te hoê tupuraa o tei nehenehe e haafifi i to ˈna toroa. Te faatia ra o Kunihito: “I te aniraa mai ta ˈu tiaau ohipa e e nehenehe anei ta ˈu e haapao i te hoê hopoia taa ê, ua papu roa ia ˈu e e farii atu vau. No te mea râ e ua arataihia vau ia hiˈo i te iteraa i to tatou mau otia ei maitai morare, ua pahono vau e: ‘Aita i papu ia ˈu e e maraa anei ia ˈu, e tamata râ vau i te rave maitai roa ino i te reira.’ I te manaˈo o ta ˈu tiaau ohipa Marite, e au ra e te ere ra vau i te aravihi e te tiaturi. I to ˈu faarooraa i te reira, ua taa aˈera ia ˈu e mea hinaarohia ia rave au i te tahi mau faatanoraa.”

I to ˈna apîraa, e tamahine haapii maitai roa o Maria, e noho ra i te oire no New York, o tei hinaaro noa e tauturu i to ˈna mau hoa haapiiraa. E hoa haapiiraa o Juan o tei ani na i te tauturu a Maria i te tahi taime. Ua faahinaaro e ua tamata atoa râ oia i te faahoruhoru ia ˈna. Noa ˈtu to ˈna hinaaro e vai mâ noa i te pae morare, ua hema o Maria i te mau faahinaaroraa a Juan e ua topa ˈtura i roto i te peu taatiraa tia ore.

Mea fifi roa iho â ia faaite i te maitai morare i roto i te hoê ao ua rau te taˈere e mea viivii i te pae morare. No te aha ïa e faahotu ai i te maitai morare? No te mea e mauruuru te Atua i te hoê haerea maitai morare, e e hinaaro iho â te rahiraa o tatou i ta ˈna farii maitai.

Te aˈo ra te Parau a te Atua, te Bibilia, i ta ˈna mau taata taio ia faahotu i te maitai morare. Ei hiˈoraa, ua papai te aposetolo Paulo e: “Te vai na te tahi maitai [morare] e te tahi mea haamaitai ra, e haamanaˈo i taua mau mea ra.” (Philipi 4:8; MN) E te faaitoito maira te aposetolo Petero ia ‘faaitoito hua tatou i te apiti to tatou faaroo i te [maitai morare].’ (Petero 2, 1:5; MN) Eaha râ te maitai morare? E haapiihia anei te reira i roto i te hoê piha haapiiraa? Nafea tatou e faahotu ai i te reira?

[Nota i raro i te api]