Te faarururaa i te tautooraa o te hopoia metua

TE RAVERAA i te mau tamarii i teie mahana, to te mau matahiti o te taurearearaa iho â râ, e tautooraa rahi mau ïa no te mau metua. Te faaite ra te vea ra La Gazette no Montréal, i Kanada, e ua riro te tamatamataraa i te ava e i te raau taero ei “ohipa matau na te mau taurearea.” Te haapapu ra oia e e “hopoia na te mau metua ia ara maitai i te mau tauiraa i roto i te haerea o [ta ratou] mau taurearea.”

Eaha te tia i te mau metua ia imi o te nehenehe e faaite mai i taua mau fifi o te taurearea ra? I roto i te mau tapao faaara i te pae tino, te pae o te mau manaˈo horuhoru, e te pae totiale itehia mai e te Fare vanaa no te tamarii e te Fare Rapaauraa i te taurearea i te pae feruriraa no Marite, te vai ra ïa te rohirohi-tamau-raa, te tauiuiraa o te huru taata e te huru itoito, te faaea-maoro-raa i roto i te piha, te haerea tatamaˈi, e te ofatiraa i te ture.

Nafea te mau metua e nehenehe ai e paruru i ta ratou mau tamarii i taua tamatamataraa atâta ra e i te mau faahopearaa ino ta te reira e horoa mai? Te tiaturi ra te Taote ra o Jeffrey L. Derevensky, no te Fare haapiiraa tuatoru McGill, e e nehenehe te mau fifi e iti mai a muri aˈe maoti te aparauraa tahaa e te faaitoitoraa i te faatura te tahi i te tahi i te roaraa o te mau matahiti haapiiraa i te hoê tamarii. Te na ô atoa ra La Gazette e noa ˈtu e e hiti mai te hoê hinaaro ia noaa hau atu â te tiamâraa i roto i te taurearearaa, e titau noâ te mau taurearea i “te aratairaa, te turu, te faanahoraa e te here no ǒ mai i to ratou mau metua ra.” Te faahaamanaˈo maira teie mau manaˈo i te hoê Maseli o te Bibilia o te na ǒ ra e: “E haapii i te tamaiti i tana eˈa ia haere ra; e ia paari oia ra, e ore e faarue i taua eˈa ra.” (Maseli 22:6) Te aˈo ra te Atua i te mau metua ia riro ei hiˈoraa, ei hoa, ei feia aparau, e ei orometua haapii.—Deuteronomi 6:6, 7.