Te faafaitoraa i te ohipa e te faaanaanataeraa

“E AHU nehenehe te faaanaanataeraa, eita râ e nehenehe e ahu tamau noa ˈtu.” Na roto i teie mau taˈo, te faataa maitai ra te hoê taata papai aore i faaite i to ˈna iˈoa i te faufaa o te faaanaanataeraa. Te faaite nei râ oia e e tia ia faafaitohia te reira e te mau ohipa faufaa.

Ua faahiti atoa te taata papai Bibilia i faauruahia o Solomona i taua tumu parau ra. Ua haapapu teie arii paari i na huru faito ore e piti te tia ia apehia. Na mua roa, ua parau oia e: “E tipae noa te maamaa i o ˈna pue rima; e ua amu i to ˈna ihora tino.” (Koheleta 4:5) Oia mau, e nehenehe te hoê taata e vevehia no to ˈna hupehupe. Ei faahopearaa, e nehenehe e fifihia te oraora-maitai-raa e tae noa ˈtu te ora o te taata faatau. I te tahi aˈe pae, te vai ra vetahi o te ineine i te faatusia i te mau mea atoa no te hoê ohipa rohirohi. Te faataa ra o Solomona e e “mea faufaa ore . . . e te amu i te mataˈi” ta ratou rohiraa tuutuu ore i roto i te ohipa.—Koheleta 4:4.

No reira mau ïa o Solomona i faaitoito ai ia faito noa: “E maitai rahi te rima hoê ia î i te maa ma te hau, i na rima atoa e piti ia î, ma te peapea e te amu i te mataˈi ra.” (Koheleta 4:6) E tia i te hoê taata ia ite i te mea “maitai no ˈna i ta ˈna ra mau ohipa”—oia hoi, ia rave oia i tera e tera taime no te fanaˈo i tei noaa ia ˈna. (Koheleta 2:24) E tia ia apitihia te ohipa imiraa i te tahi atu mea o te oraraa. E tia ia horoahia i te hoê pae o to tatou taime no to tatou utuafare. Ua haapapu o Solomona e e ere te ohipa imiraa ta tatou hopoia matamua, ia tavini râ i te Atua. (Koheleta 12:13) E huru hiˈoraa faito noa anei to outou no nia i te ohipa?