‘Ua mǎtaˈu raua i te Atua mau’

A FAATÎTÎHIA ˈi te mau Iseraela i Aiphiti, ua farerei na vahine faafanau Hebera ra e piti, o Sipera e o Pua, i te hoê tupuraa peapea mau. Ei tamataraa i te faataime te maraaraa rahi o te nunaa ê, ua faaue o Pharao i taua nau vahine ra: “Ia rave orua i to orua na toroa [faafanau] i te mau vahine ati Hebera na, . . . e e tamaroa ra, e rave orua i te reira ia pohe.”—Exodo 1:15, 16; MN.

Ua “mǎtaˈu” o Sipera e o Pua “i te Atua [mau],” ua faaitoito ïa raua e “aore aˈera i rave i ta te arii o Aiphiti i parau mai ia raua ra.” Noa ˈtu te ati e tupu mai no to raua tiaraa itoito, ua faaora raua i te mau tamarii tamaroa. “Ua hamani maitai maira” Iehova “i na [vahine faafanau] ra” e ua haamaitai ia raua no taua mau ohipa faaoraraa ra.—Exodo 1:17-21; MN.

Te faaite nei teie aamu i te mauruuru o Iehova i te feia e tavini ia ˈna. E nehenehe oia e hiˈo i te ohipa a Sipera e a Pua, noa ˈtu te itoito, ei ohipa maitai noa i nia i te taata. Inaha, aore e vahine feruriraa maitai e hinaaro e haapohe i te mau tamarii! Teie râ, aita Iehova i haamoe i te mau ohipa hairiiri ta te tahi mau taata i rave no to ratou mǎtaˈu i te taata. Ua ite oia e aita noa taua mau vahine faafanau ra i turaihia e te maitai o te taata, oia atoa râ e te mǎtaˈu i te Atua e te paieti.

E nehenehe mau â tatou e mauruuru i te tavini i te hoê Atua e haafaufaa i ta tatou mau ohipa haapao maitai! Parau mau, peneiaˈe aita tatou i faaruru atura i te hoê tamataraa o te faaroo mai tei farereihia e Sipera e o Pua. Teie râ, ia haapao maite tatou no te mau ohipa tia—i te fare haapiiraa anei, i te vahi raveraa ohipa, aore ra i roto i te mau tupuraa ê—eita Iehova e haafaufaa ore i to tatou here taiva ore. E “faautua” râ oia “i te feia i imi papu ia ˈna ra.” (Hebera 11:6) Oia mau, “e ere te Atua i te Atua parau-tia ore, a haamoe ai oia i ta outou ohipa i rave, e to outou hinaaro i to ˈna ra iˈoa, i faaite-papu-hia e outou na, outou i tauturu i te feia moˈa, e te tauturu noa na hoi outou.”—Hebera 6:10.