Ua faahitihia te iˈoa o te Atua i Iseraela

E RAVE rahi senekele aˈenei ua opani etaeta roa te faaroo ati Iuda i to ˈna mau melo ia faahiti i te iˈoa o te Atua, Iehova. Ia au i te Mishna, eita te mau taata atoa e faahiti i te iˈoa o te Atua “e parahi i roto i te ao o te haere mai ra.”—Sunederi 10:1.a

I te 30 no Tenuare 1995, ua faahiti te rabi rahi tahito o te mau Séfarade no Iseraela ma te opua mau i te iˈoa o te Atua. Ua na reira o ˈna i to ˈna faahitiraa i te hoê tikkun, te hoê pure faatitiaifaroraa Kabbale. E faahitihia teie pure ia nehenehe te Atua e faahoˈi mai i te hoê faito o te autahoêraa i roto i te ao taatoa nei, tei haafifihia e te mau mana ino, ia au i te feia haamori. Ua faataa te vea ra Yedioth Aharonoth no te 6 no Febuare 1995 e: “E ohipa lituria no te hoê puai o te ore e nehenehe e tiaturihia i te mea e te faahitihia ra ta ˈna mau taˈo i roto noa i te hoê buka iti o te ore e hoohia i te mau taata atoa.” Te manaˈohia ra e ia tiaorohia te iˈoa o te Atua na roto i teie auraa, e horoa te reira i te hoê puai taa ê i te aniraa.

Mea papu maitai e te faaue ra te Bibilia i te mau tavini o te Atua ia faaohipa i te iˈoa o te Atua, Iehova. (Exodo 3:15; Maseli 18:10; Isaia 12:4; Zephania 3:9) I roto i te mau papai Hebera tumu o te Bibilia, fatata 7 000 taime te faahitiraahia teie iˈoa. Teie râ, te faaara atoa ra te Bibilia eiaha e faaohipa ma te tano ore i te iˈoa o te Atua. Te na ô ra te toru o te Ture Ahuru e: “Eiaha oe e faahiti faufaa ore noa i te iˈoa o to Atua ra o Iehova; e ore hoi Iehova e faatia ia ˈna i tei faahiti faufaa ore noa i to ˈna ra iˈoa.” (Exodo 20:7) Nafea ïa e nehenehe ai e faahiti faufaa ore i te iˈoa o te Atua? Te parau ra te hoê faataaraa a te Jewish Publication Society e, e ere anaˈe te “faaohiparaa ma te feruri ore” i te iˈoa o te Atua te ô atu i roto i te parau Hebera ra tei hurihia e te mau taˈo “faahiti faufaa ore,” e ô atoa ˈtu râ “te faahitiraa i te mau pure faufaa ore.”

Nafea ïa tatou e hiˈo ai i te pure faatitiaifaroraa tikkun Kabbalistique? Nohea mai te reira? I te mau senekele 12 e 13 T.T., ua haamata te hoê huru faaroo ati Iuda taa ê, parauhia Kabbale, i te riro mai ei faaroo matauhia e te taatoaraa. I te 16raa o te senekele ua faaô o Isaac Luria, te hoê rabi, i te tukkunim i roto i te lituria Kabbalistique. Ua faaohipahia te iˈoa o te Atua mai te hoê ohipa nehenehe maere mau e te puai taa ê, e ua riro te reira ei tuhaa no te haamoriraa Kabbalistique. Te manaˈo ra anei outou e e faaohiparaa tano teie i te iˈoa o te Atua?—Deuteronomi 18:10-12.

Noa ˈtu eaha ta outou e pahono atu i teie uiraa, e farii outou e ua riro te faahitiraa i te iˈoa o te Atua i mua i te taatoaraa i Iseraela no teie tau, ei tupuraa matau-ore-hia. Teie râ, ua faaite atea te Atua iho e: “Ei te reira mahana outou e parau ai e, Haamaitai outou ia Iehova; e tiaoro atu i to ˈna iˈoa; e faaite i te taata i ta ˈna mau ravea puai; e faaite outou i te teitei o to ˈna ra iˈoa. E himene outou ia Iehova, i te mau ravea maitai hau ê na ˈna ra. Ua faaite-paatoa-hia te reira i te fenua atoa ra.”—Isaia 12:4, 5.

Auaa râ, i Iseraela, e mai i roto atoa e 230 fenua e ati aˈe teie ao, te tutava ra te mau Ite no Iehova i te tauturu atu i to ratou mau taata-tupu ia noaa ia ratou te ite papu no nia ia Iehova. Te tiaturi nei ratou e e haere mai e rave rahi atu â mau taata no te haafaufaa i te auraa o teie mau papai mai te Salamo 91:14: “No te mea, te hinaaro maira oia ia ˈu [Iehova], e faaora vau ia ˈna; e faateitei au ia ˈna i nia, no te mea te haapao ra oia i to ˈu nei iˈoa.”

[Nota i raro i te api]

[Hohoˈa i te api 28]

I ǒ nei i Négueb, ua faaitehia te iˈoa o Iehova e ta ˈna ra Parau e to ˈna nunaa

[Hohoˈa i te api 29]

Te faaite ra teie hohoˈa i te iˈoa o te Atua