“Te hinaaro nei te Atua ia riro matou mai ia outou”

NA ROTO i te tururaa i te mau mana faatere “i te Fatu nei,” e nehenehe te mau Kerisetiano e tiaturi e e ‘haapopouhia mai’ ratou “[ei] feia i rave i te maitai.” (Petero 1, 2:13-15) Te reira ta te mau Ite no Iehova i Afirika Apatoa i farerei aita i maoro aˈenei i te tairururaa mataeinaa ta ratou i faatupu i roto i te hoê fare haapiiraa tuatoru.

I te mahana matamua o te tairururaa, ua faaineine aˈera te mau mutoi paruru o te fare haapiiraa ia ratou iho no te mau rahiraa pǔpǔ taata faahuehue e te turu ore mai ta ratou hoi i farerei na e te tahi atu mau huru haaputuputuraa. I te mea e aita ratou i haamatau aˈenei e te mau Ite no Iehova, e ohipa maere e te oaoa atoa ïa te tiai maira ia ratou!

Ei tuhaa o ta ratou ohipa hiˈopoa matauhia i te mau uputa, ua paheru te mau mutoi paruru i te mau pereoo atoa o te tomo mai e o te haere atu i rapaeau i te aua. Ua maere roa ratou i to ratou aroharaahia ma te auhoa, ma te faaoromai, e ma te faatura, noa ˈtu e ua faataupupu te mau paheruraa i te mau tia. Aita hoê aˈe parau patoi, aimârô e te faaino. “Mea taa ê vetahi atu mau taata ratere,” o ta te hoê tia o te mau mutoi paruru ïa i tapao, “e feruriraa haehaa to outou e te tura aueue ore o ta matou paatoa e ite maitai ra.”

I to te raatira o te mau mutoi paruru iteraa no nia i te haerea turu o te mau Ite no Iehova, ua faaoti aˈera oia e aita e faufaa e paheru i te mau pereoo, “no te mea,” o ta ˈna ïa i parau “ua haapii-maitai-roa-hia outou.” I te hopearaa, ua faatiahia te mau pereoo e te mau papie tapearaa pereoo “JW” (“Jehovah’s Witnesses”: Ite no Iehova) tei tapirihia ia tomo mai ma te ore e paheruhia.

I te hopearaa o te tairururaa, ua na ô atura te raatira o te mau mutoi paruru e te hinaaro nei oia e ia hoˈi oioi faahou mai te mau Ite no Iehova. “Aita matou i ite aˈenei i teie mau huru taata haerea maitai,” o ta ˈna ïa i faahiti. “Te hinaaro nei te Atua ia riro matou mai ia outou.” E faaitoitoraa hau teie haapopouraa no te mau Kerisetiano mau e e ‘haerea maitai noa’ to ratou e tia ˈi, ‘ia haamaitai [te mau taata] i te Atua no te mau ohipa maitatai o ta ratou e hiˈo ra.’—Petero 1, 2:12.