Tahoêhia i roto i te huru oraraa maitai roa ˈˈe
Mai te peu e e maraa noa te numera o te huiraatira i nia, fatata roa ïa e ono miria taata i nia i te fenua. Noa ˈtu no ǒ mai te rahiraa i te hoê â tupuna, aita te rahiraa e ite ra e e melo ratou no te hoê utuafare rarahi e e hopoia ta ratou i mua i te hoê Poiete î i te here e te paari mau. Te haapapu ra te amaharaa e te au-ore-raa i rotopu i te mau nunaa, te mau nunaa taata e te mau hiroa tumu ma te riaria i teie huru tupuraa peapea mau.
IA HIˈOHIA te mau huru tupuraa o teie ao, e riro paha te tahoêraa na te ao nei ei fa o te ore e nehenehe e raeahia. Te na ô ra te buka ra The Columbia History of the World e: “No nia i te uiraa faufaa roa oia hoi nafea ia ora amui, aita hoê aˈe manaˈo apî to teie nei ao, aita roa ˈtu.”
Teie râ, aita te parau o te tahoêraa i rotopu i te mau taata e noho ra i te fenua nei e titau ra i te hoê manaˈo apî. Ua faaitehia te eˈa o te tahoêraa i roto i te mau Papai Moˈa. Ua niuhia te reira i nia i te haamoriraa i te Poiete o te fenua e te mau mea ora atoa e vai ra i nia iho. Te vai aˈena ra te tahoêraa mau i te pae o te feruriraa, te opuaraa, e te huru oraraa i roto i te nunaa o te Atua. Ua hau atu ratou i te 5 mirioni e te afa i roto e 233 fenua e ua tahoê ratou no to ratou tiaturiraa e o to te Atua huru oraraa te eˈa maitai roa ˈˈe. Mai te papai salamo, te pure ra ratou e: “E haapii mai oe, e Iehova, i to oe ra eˈa, e haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.”—Salamo 86:11.
Ua faaite-atea-hia teie tahoêraa o te mau taata i roto i te haamoriraa mau na te peropheta ra o Isaia. Ua papai o ˈna e: “E riro ia tae i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa, e faateiteihia ïa i nia ˈˈe i te mau aivi; e tairuru atoa mai te mau etene atoa ra i reira. E rave rahi te taata e haere ma te parau e, E haere mai, e haere tatou i nia i te mouˈa o Iehova, i te fare o te Atua o Iakoba; e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira. I na Ziona ˈtu hoi te ture i te revaraa ˈtu, e te parau a Iehova, i na Ierusalema ˈtu ïa.”—Isaia 2:2, 3.
Mea otahi roa te tahoêraa a te mau Ite no Iehova. Te amu ra ratou i te hoê â maa i te pae varua i tera e tera hebedoma, i roto hau atu i te 87 000 amuiraa na te ao atoa nei. (Mataio 24:45-47) Ua faaite râ te mau Ite i to ratou tahoêraa i roto i te tahi atu ravea—ma te putuputu i ta ratou tairururaa e toru mahana “E aratai te eˈa o te Atua i te ora” faatupuhia na te ao atoa nei mai te ropuraa o te matahiti 1998 e tae roa mai i te omuaraa o te matahiti 1999. I roto i na fenua 13, ua farii atoa teie mau tairururaa i te mau pǔpǔ rahi tia no te tahi mau fenua ěê e ua parauhia teie mau tairururaa ei mau tairururaa nunaa. Area te tahi ra, ua parauhia ïa e tairururaa mataeinaa. Tera râ, ua pûpû pauroa teie mau tairururaa i te hoê â porotarama o te mau taoˈa pae varua maitatai.
Auê te au ia hiˈo i te mau tia oaoa, e te nehenehe maitai o tei putuputu mai i roto i te mau piha apooraa e te mau tahua taaro ia haapiihia ia ratou e Iehova! E rave rahi tei manaˈo mai te hoê tia o tei tae i te tairururaa nunaa i tupu i Michigan, Hau Amui no Marite. Ua parau oia e: “Mea oaoa roa ia hiˈohia to tatou mau taeae no te mau fenua atoa—te Repubilita Tekolovakia, Barbade, Nigeria, Honederia, Beretane, Holane, Etiopia, Kenya, e te tahi atu mau fenua—ia farii ratou ia ratou iho! Mea au roa ia hiˈo i te mau taeae ia ora i roto i te tahoêraa, ma te manii i te roimata oaoa no to ratou here ia ratou iho e to ratou Atua, o Iehova.” E tuatapapa te tumu parau i muri iho i te porotarama o te tairururaa o ta te mau mirioni taata i nia i te fenua i fanaˈo.
[Faaiteraa i te fatu o te hohoˈa i te api 3]
Mountain High Maps® Copyright © 1997 Digital Wisdom, Inc.