Te parau nei e rave rahi e e faaroo to ratou

“MEA faahiahia mau o Iesu! Mea faahiahia roa oia, atira ˈtu ai!” o ta te hoê ïa vahine faaroo no Beresilia i parau. Eita mau â e nehenehe e huna i te puai o te iˈoa o Iesu. I te roaraa o te aamu, ua ineine na te taata i te mauiui e i te pohe no ˈna.

Ua poro na te mau aposetolo ra o Petero e o Ioane ‘ma te iˈoa o Iesu’ i Ierusalema. No to raua na reiraraa, ua tapeahia e ua rutuhia raua. Tera râ, ‘haere atura raua mai te aro atu o te sunederi ra ma te oaoa, i te mea no to ˈna iˈoa i manaˈohia ˈi raua e au ia raua taua hamani ino ra.’—Ohipa 5:28, 41.

O Anitipa te tahi atu Kerisetiano i te senekele matamua i haafaufaa na i te iˈoa o Iesu. I roto i te Apokalupo, te buka hopea o te Bibilia, ua faahiti o Iesu ia ˈna ei “ite mau no ˈu ra, o tei taparahihia i roto ia outou, i te parahiraa o Satani ra.” (Apokalupo 2:13) Ua patoi o Anitipa, e te tahi atu mau Kerisetiano no Peregamo, i te huna i to ratou faaroo i te Mesia. Ua tapea maite o Anitipa i te iˈoa o Iesu noa ˈtu e e nehenehe oia e pohe!

Tau afa senekele i muri iho, i te matahiti 155 T.T., ua faaruru atoa o Polycarpe, o tei parau e e Kerisetiano oia, i te hoê â tamataraa i to ˈna faaueraahia ia faaino i te Mesia. Teie ta ˈna pahonoraa: “E 86 matahiti i teie nei to ˈu taviniraa Ia ˈna, e aita Oia i rave ino mai ia ˈu. Nafea ïa vau e nehenehe ai e faaino i ta ˈu Arii i faaora mai hoi ia ˈu?” No to ˈna patoiraa i te huna i te Mesia, ua taninahia o Polycarpe i te auahi.

Ua ineine te mau aposetolo, o Anitipa, e vetahi atu i te haapapu i ta ratou faaiteraa no nia i te Mesia na roto i te pohe! E te mau taata ïa i teie mahana?

Te iˈoa o Iesu i teie mahana

Te tamau noa ra te iˈoa o Iesu i te faahoruhoru i te mafatu. I Marite Latino, ua maraa mai te mau ekalesia e parau ra e te tiaturi ra ratou ia Iesu i te hoê faito teitei roa ˈˈe i na matahiti tau ahuru i mairi aˈenei. I roto atoa i te mau oire iti roa ˈˈe, te vai ra te hoê ekalesia Penetekose. I te hoê â taime, te puai noa ˈtura te mana politita o taua mau ekalesia ra. I roto i te Apooraa e te Apooraa rahi i Beresilia, ei hiˈoraa, e 31 parahiraa e faaohipahia ra e te mau melo o taua mau ekalesia ra.

O Iesu atoa te pu faufaa roa o te hoê pǔpǔ faaroo apî i te mau Hau Amui no Marite. Te parau nei to ˈna mau taata e e Feia tapea ratou i te Parau tǎpǔ. Ua tapao te vea ra Time i te matahiti 1997 ra e ua maraa te numera o te feia i haere na i ta ratou mau putuputuraa mai i te 4 200 i te matahiti 1991 i nia i te 1,1 mirioni i te matahiti 1996. Te na ô ra te hoê o ta ratou mau himene e: “Auê tei ia Iesu ra te re, o ˈna to ˈu Faaora e a muri noa ˈtu.”

Tera râ, e ere te mau manaˈo atoa i horoahia na nia i te iˈoa o Iesu, i te mau manaˈo maitatai. Ua tupu pinepine noa na te tamaˈi na nia i to ˈna iˈoa. Ua haapohehia na te mau ati Iuda, ua taparahi-pohe-hia te mau etene, ua haamauiuihia, ua tâpûpûhia, e ua taninahia te feia aimârô i te auahi i nia i te raau—te taatoaraa na nia i te iˈoa o Iesu. E aita i maoro roa aˈenei, ua riro te pororaa evanelia ei ohipa tapihoo matauhia. Ua riro teie mau mea atoa ei faaohiparaa hairiiri e te au ore i te iˈoa o Iesu e te auraa mau o taua iˈoa ra!

Hau atu â, te hiti maira te tahi mau uiraa tano maitai: Eaha te titauhia ra no te tuu i te faaroo i roto i te iˈoa o Iesu? E eaha te manaˈo o te mau Ite no Iehova no nia i te reira? E pahono mai te tumu parau i muri nei i teie nau uiraa.