“A tapea maite i te mea e vai ra ia outou ra”
Ua poro te hoê pǔpǔ Ite i te hoê o na motu e 30 i roto i te Haaputuraa o te mau Motu no Heleni. A poro noa ˈi e piti o ratou i tera fare e tera fare na te hoê aroâ, ua farerei aˈera raua i te hoê mutoi o tei parau atu ia raua e ia apee mai ia ˈna i te fare mutoi. I muri iti noa ˈˈe i to ratou tapaeraa ˈtu i te fare mutoi, taˈi mai ra te niuniu paraparau. O te perepitero o te oire. “Ua faaroo vau e tei te oire te mau Ite no Iehova,” ta te perepitero ïa i parau atu. Ua pahono atu te mutoi e: “E, e piti tei ǒ nei ia ˈu ra.” Ua parau atura te perepitero e: “E haere oioi atu vau i reira.” No te toparaa reo o te tauaparauraa, ua haapeapea rii atura teie nau taeae.
I to ˈna râ taeraa mai, ua ata te perepitero, ua aroha ia ratou, e ua parahi atura i pihai iho i te mutoi. A tamau noa ˈi te tauaparauraa, ua haamata aˈera te mutoi i te riri area te perepitero ra, te faaea noa ra oia ma te mǎrû e te haapeapea ore. Ua parau te perepitero i te mutoi e eiaha e hamani ino i te mau Ite, e ua na ô atoa ˈtu oia e: “E nehenehe ta raua e pahono i te mau uiraa atoa no te mea te fanaˈo nei raua i te hoê faaineineraa na roto i te Haapiiraa o te Taviniraa Teotaratia. E mea ohie aˈe i te haamou i te ao nei i te faataui i te faaroo o te hoê o te mau Ite no Iehova.”
A poro ai raua i te poipoi aˈe, ua farerei faahou nau taeae i te perepitero e ua ani atu e: “No te aha oe i hamani maitai mai ai ia mâua i te roaraa o te tauaparauraa i te fare mutoi?” Ua parau te perepitero ia raua e ua ite o ˈna e rave rahi Ite i Syros e ua taio oia i Te Pare Tiairaa e te A ara mai na! e rave rahi matahiti i te maoro. Inaha, ua rave oia e rave rahi taime i te vea ra Te Pare Tiairaa, ma te faatapuni i te reira i roto i te hoê vairaa parau e ua faaohipa oia i te reira no te horoa i ta ˈna oreroraa parau i te fare pure. Ua tapao oia e: “Eita vau e manaˈo e e noaa te ora mai te peu e aita e vai ra ia ˈu ta outou mau pueraa vea. Na te reira e horoa mai nei i te hoê tiaturiraa ia ˈu.”
I muri iho, ua parau te perepitero i te mau Ite e: “E tia ia ˈu ia parau atu ia orua i te hoê mea. A tapea maite i te mea e vai ra ia outou ra. Eiaha e taiva e e faarue i te reira. Te mea o ta ˈu e parau atu nei ia orua i teie nei o te oreroraa parau maitai aˈe ïa aitâ vau i horoa aˈenei, e aita vau e parau ra i teie mau parau i mua noa i to ˈu utu; te hinaaro nei râ vau e parau ma to ˈu mafatu taatoa.”