“Na vai te hupe nei i fanau?”

I TE SENEKELE 19, ua faahohoˈa te hoê taata papai vea i te hupe i “te vai piru o te fenua, faatupuhia e te mataˈi.” Ua parau to tatou Poiete i te patereareha o te tau tahito ra o Ioba e: “Na vai te [“hupe,” MN] nei i fanau?” (Ioba 38:28) Ua faahaamanaˈo te Atua ia Ioba e no ǒ mai i te Atua ra te hupe faahiahia roa.

Taa ê atu to ˈna teatea hua, to ˈna haviti mai te ofai piru ra, ua taaihia te hupe i roto i te Bibilia e te haamaitairaa, te faahoturaa, te auhuneraa, e te faaherehereraa o te ora. (Genese 27:28; Deuteronomi 33:13, 28; Zekaria 8:12) I te tau veavea i Iseraela, te hoê tau mǎrô, ua faaora mai “te hau i mairi i nia ia Heremona” i te ururaau i nia i te fenua, e oia atoa to ˈna mau taata. Te faatupu noa nei â te ururaau i nia i te mouˈa Heremona e te hiona teitei i te mâˈiraa o te mau au pape i te po e e haamairi i te hupe rahi. Ua faaau te papai salamo ra o Davida i te haumârûraa faatupuhia e teie hupe i te mau taime au o te parahiraa ma te tahoê e te mau hoa haamori ia Iehova.—Salamo 133:3.

Ua riro te mau faaueraa a te peropheta ra o Mose no Iseraela ei tamârǔraa, mai te hupe. Ua parau oia e: “Tau reo mai te hau e tohua ra; mai te tuâ ûa i nia i te raau rii tupu ra, e mai te ûa rahi i nia i te matie ra.” (Deuteronomi 32:2) I teie mahana, te faaite nei te mau Ite no Iehova i te parau apî maitai faaora no nia i te Basileia o te Atua i te hopea o te fenua. (Mataio 24:14) Te haaparare nei te Atua i teie titau-manihini-raa: “E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17) Te farii nei te mau mirioni taata no te mau nunaa atoa i teie tamârǔraa pae varua no ǒ mai te Atua ra, o te tapea noa i to tatou ora e a muri noa ˈtu.