E aruehia te hoê haerea nehenehe

UA HAAPOPOU te vea Italia ra La Gazzetta del Mezzogiorno i te mau Ite no Iehova no to ratou neneiraa i te tumu parau “Matera—Te oire o te mau fare nohoraa hamanihia i roto i te hoê afaa taa ê mau.” Ua faahitihia teie tumu parau i roto i te vea ra A ara mai na! o te 8 no Tiurai 1997 (Farani), o tei nenei-rahi-hia i roto e rave rahi reo. I teie nei, te hurihia ra te A ara mai na! na roto e 81 reo e ua hau atu i te 19 mirioni vea i neneihia na te ao nei. Ua faataa te vea Italia e ua faatupu te A ara mai na! i te hoê numera faahiahia mau o te tau veavea “no nia i te faaiteiteraa i te aamu e i te tufaa faahiahia o te oire [o Matera].”

Ua arue te vea Italia i te mau Ite na roto i te Tairururaa Mataeinaa “Te faaroo i roto i te Parau a te Atua” tei tupu i Matera i te matahiti 1997. Ua faataa te vea e ua faatae te mau Ite i te poroi “i na 4 000 taata i te Tahua XXI Settembre [o te oire] i ropu i te tau veavea e i raro aˈe i te ǎhu o te mahana; ua haapao maitai ratou i te vai-mâ-raa, ma te peni faahou â, e ma te haamaitai i te tuhaa faufaa o te pû o te mau tuaroraa (te vahi haumitiraa iho â ra) ma te ore roa e tamoni, ma te aufau i te mau haamâuˈaraa no te hoo mai i te tauihaa hinaarohia e ratou iho.”

Te tutava nei te mau Ite no Iehova ia riro ratou ei feia tapiri maitatai. (Mataio 22:37-39) Te pee atoa nei ratou i te aˈoraa a te mau Papai: “Ia maitai [to] outou [haerea] i rotopu i te mau [nunaa] . . . ia hiˈo râ ratou i ta outou [mau ohipa] maitai, ia haamaitai ratou i te Atua i te mahana e roohia mai ai ra.”—Petero 1, 2:12; MN.