No te aha e ore ai e amui atu e o ratou?

E 73 matahiti to Ndjaukua Ulimba, e i te matahiti mairi aˈenei ua rave tamau oia i te hoê tere tau 450 kilometera i te atea. Ua na raro noa oia i te haere, e ua titau te reira ia ˈna i te hoê roaraa 16 mahana.

Ua rave teie taata paari i teie tereraa roa no te apiti atu i te hoê o te mau tairururaa a te mau Ite no Iehova tei tupu i te mau matahiti atoa. I muri aˈe i te tairururaa, ma te oaoa rahi e te itoito i te pae varua, ua na raro atu â oia i te hoˈi i te fare—te tahi atu â 16 mahana. Mea hoona anei te tutavaraa? E, papu maitai! Ua rave â o Ndjaukua Ulimba i teie tereraa matahiti tau matahiti i te maoro.

Tei rotopu teie taata Afirika i na taata 15 mirioni tiahapa no roto mai hau atu i te 230 fenua o tei haere i te mau tairururaa a te mau Ite no Iehova i te matahiti i mairi aˈenei. Parau mau, aita te rahiraa i haere mai na raro e rave rahi mahana i te vahi tairururaa. Ua tae mai te rahiraa na nia i te pereoo, te pereoo uta taata, te pereoo auahi, aore ra na nia i te manureva. Hoê anei oe e o ratou?

I te matahiti 1998, e tupu faahou te mau tairururaa na te ao atoa nei, te rahiraa i roto ïa i te mau area avaˈe veavea (aore ra ia paˈurâ anaˈe). Mai te peu e e te oraora maitai noa râ oia i te pae tino, papu maitai e e rave o Ndjaukua Ulimba i taua â tereraa roa no te amui atu. E fanaˈo o ˈna e te tahi atu mau mirioni taata i te hoê porotarama tano maitai, o te haapuai i te faaroo, e o te horoa atoa i te itoito. No te mau taata atoa e amui mai, e riro te tairururaa ei tuhaa faufaa roa i roto i te matahiti. Te titau-manihini-atoa-hia ˈtu nei outou ma te mahanahana ia tae mai. E oaoa roa te mau Ite no Iehova o to outou vahi i te faaite atu ia outou i te vahi tairururaa fatata roa ˈˈe no outou.