Aita i tui te roo o to ratou iˈoa
AITA te Bibilia e faahiti ra i te iˈoa o te feia i patu na i te pare haama ra o Babela. Te na ô ra te faatiaraa e: “Ua na ô ihora ratou, Tatou e patu i te tahi oire no tatou, e te tahi pare, e ia puta noa ˈtu te upoo i nia i te raˈi ra, ia [“tui te roo o,” MN] to tatou iˈoa, o te purara ê noa ˈtu tatou e ati noa ˈˈe te fenua atoa nei.”—Genese 11:4.
O vai ma hoi “ratou”? Ua tupu taua ohipa nei tau 200 matahiti i muri aˈe i te Diluvi. I taua taime ra, te ora ra ïa o Noa, tei naeahia tau 800 matahiti, i rotopu i te mau tausani o to ˈna ra huaai. Hoê anaˈe reo to ratou e ua ora amui ratou i taua pae fenua ra ta Noa e ta ˈna mau tamaiti i parahi i muri aˈe i te Diluvi. (Genese 11:1) I te hoê taime, ua haere atura te hoê pǔpǔ o teie huiraatira rahi i te pae hitia o te râ e “ite atura i te hoê [“peho,” MN] vahi papu i te fenua ra o Sinara.”—Genese 11:2.
E manuïa-ore-raa rahi
I roto i taua peho nei to te pǔpǔ faaotiraa e patoi atu i te Atua. Mea nafea ïa? Inaha, ua faaite te Atua ra o Iehova i ta ˈna opuaraa, ia ˈna i faaue i te tane e te vahine matamua ‘ia fanau, e ia rahi roa, e faaî i te fenua.’ (Genese 1:28) Ua horoa faahou oia i teie faaueraa ia Noa e ta ˈna mau tamaiti i muri aˈe i te Diluvi. Ua parau atu hoi te Atua ia ratou e: “O outou râ, ia rahi te tamarii, e ia rahi outou; ia rahi to outou huaai i nia i te fenua, e ia rahi roa outou i reira.” (Genese 9:7) Ei patoiraa i te aratairaa a Iehova, ua patu atura te nunaa i te hoê oire ia ore ratou ia ‘purara ê e ati noa ˈˈe te fenua atoa nei.’
Ua haamata atoa ˈtura teie mau taata i te patu i te hoê pare “ia tui te roo o to [ratou] iˈoa.” Taa ê atu râ i ta ratou i opua, aita ratou i faaoti i te faatiaraa o teie pare. Te faaite ra te Bibilia e ua faahuenane o Iehova i to ratou reo, ia ore ratou ia taa faahou i te tahi e te tahi. Te na ô ra te faatiaraa i faauruahia mai e: “I reira to Iehova haapurararaa ia ratou i nia i te fenua atoa e ati noa ˈˈe, aore aˈera ratou i patu i taua oire ra.”—Genese 11:7, 8.
Te ite-papu-hia ra te manuïa-ore-raa taatoa o teie opuaraa i te mea e, aita roa ˈtu ‘i tui te roo,’ aore ra i itehia, te iˈoa o te feia patu. Inaha, aita i itehia e o vai to ratou iˈoa e ua tumâ-roa-hia mai roto mai i te aamu o te taata nei. Eaha râ no Nimeroda, te hina a Noa? E ere anei o ˈna te raatira o teie orureraa i te Atua? Aita anei i tui te roo o to ˈna iˈoa?
O Nimeroda—E taata orure hau teoteo
Papu maitai, o Nimeroda te raatira. Te faataa ra te Genese pene 10 ia ˈna mai te hoê ‘taata rahi haharu [“tei patoi atu ia,” MN] Iehova.’ (Genese 10:9) Te parau atoa ra te mau Papai e “riro atura oia ei taata mana i te ao nei.” (Genese 10:8) E taata tamaˈi o Nimeroda, e taata haavî uˈana. O ˈna te taata faatere matamua i tia mai i muri aˈe i te Diluvi, na ˈna iho hoi i faaarii ia ˈna. E taata patu atoa o Nimeroda. Te parau nei te Bibilia e ua haamau oia e vau oire, o Babela atoa te tahi.—Genese 10:10-12.
No reira, e mea papu maitai e ua amui atoa ˈtu o Nimeroda—e taata patoi i te Atua, e arii no Babela, e e taata patu oire—i roto i te paturaa i te pare no Babela. Aita anei to ˈna iˈoa i tui te roo? No nia i te iˈoa ra o Nimeroda, ua papai te taata tuatapapa i te pae Hitia o te râ ra o E. F. C. Rosenmüller e: “No roto mai te iˈoa ra o Nimeroda ia [ma·radhʹ], ‘ua orure hau oia,’ ‘ua hapa oia,’ ia au i te auraa o te taˈo Hebera.” I muri iho, te faataa ra o Rosenmüller Tane e “e ite-pinepine-hia na teie peu matauhia a te feia no Hitia o te râ ma, oia hoi ia pii i to ratou mau taata teitei i te mau iˈoa i horoahia i muri aˈe i te poheraa, e no reira ˈtura, i te tahi mau taime, e tuea maitai te mau iˈoa e te mau ohipa i ravehia.”
E rave rahi feia tuatapapa o te farii nei e e ere te iˈoa ra o Nimeroda i te hoê iˈoa i horoahia i te fanauraa. Maoti râ, te manaˈo nei ratou e e iˈoa teie i horoahia i muri iho, tei tano maitai i to ˈna huru orure hau i muri aˈe i te ite-papu-raahia teie nei huru. Ei hiˈoraa, te na ô ra o C. F. Keil e: “Te haapapu ra te iˈoa iho, o Nimeroda no roto mai ia [ma·radhʹ], ‘e orure hau tatou,’ i te tahi patoiraa uˈana i te Atua. No te mea e e iˈoa taa ê roa teie, na te mau taata o to ˈna tau ïa i horoa, e riro mai nei ei iˈoa topa no ˈna.” I roto i te hoê nota i raro i te api, te faahiti ra o Keil Tane i te taata tuatapapa aamu ra o Jacob Perizonius o tei papai e: “Te tiaturi nei au e, teie nei taata [o Nimeroda], ei taata auau taehae tei haaatihia e te hoê pǔpǔ hoa, no te faaitoito i te tahi pueraa ia orure hau, aita ˈtu ïa parau i roto i to ˈna vaha, parau tei tataipitihia e ana, maoti râ ‘nimeroda, nimeroda,’ oia hoi ‘E orure hau anaˈe! E orure hau anaˈe!’ No reira, i muri aˈe, ua faahitihia oia e vetahi ê, o Mose atoa hoi, i taua parau nei ei iˈoa topa no ˈna.”
Papu maitai, aita i tui te roo o te iˈoa o Nimeroda. Te iˈoa i horoahia no ˈna i to ˈna fanauraa, aita ïa i itehia. Ua tumâhia mai roto mai i te aamu, mai te iˈoa atoa o te feia i pee ia ˈna. Aita oia i vaiiho mai i te tahi huaai o tei amo i to ˈna iˈoa. Maoti hoi i te fanaˈo i te hanahana e te roo teitei, ua roohia oia i te hoê roo haama mau. Ua tapao te iˈoa ra o Nimeroda ia ˈna e a muri noa ˈtu, ei taata orure hau teoteo o tei aa ˈtu ma te maamaa i te Atua ra o Iehova.