Te faatia ra te feia poro i te Basileia

Na te Atua i faatupu i Alaska

I RARO aˈe i te hoê tapoˈi hiona e te pape toetoe paari, te tiai noa ra te hoê huero nainai roa i te taime e tupu maitai ai oia. I roto i na avaˈe poto roa e toru o te tau veavea i Alaska, e nehenehe te hoê huero chou e 3 milimetera noa te aano, e naea-roa-hia e 40 kilo! Oia mau, e nehenehe teie fenua ta te mau taata e rave rahi i manaˈo na hoi e e fenua ano, hotu ore e te toetoe, e faahotu i te maa e rave rahi.

E parau mau iho â râ no te aua pae varua i Alaska. I ǒ nei, i te fenua o te tau toetoe maoro, te tamau noa nei te mau Ite no Iehova i te ueue i te huero o te Basileia. Mai i roto i te tahi atu mau vahi o te fenua nei, na te Atua e faatupu nei i te huero i roto i te mau mafatu hotu maitai.—Korinetia 1, 3:6, 7.

● A tere ai oia na nia i te hoê pereoo uta tamarii, ua ite atu te hoê tamahine Ite o Vanessa te iˈoa i te hoê tamahine haapii, o Ann, o tei parahi noa o ˈna anaˈe. E mata peapea to Ann, no reira ua ani aˈera o Vanessa ia Ann ia parahi mai i pihai iho ia ˈna. Ua tano iho â o Ann i te peapea! Inaha, ua pohe to ˈna metua vahine i te maˈi mafatu, e aita i maoro i muri iho, o to ˈna metua tane ïa tei pohe i te mariri ai taata. No reira o Ann i haere mai ai e faaea e to ˈna mau fetii i Alaska.

A poro ai oia i te hoê Mahana maa, ua tapea o Vanessa i te fare o to ˈna hoa apî e ua vaiiho atura na ˈna i te vea iti ra Te haapao mau ra anei te Atua ia tatou? I te Monire i muri iho i te fare haapiiraa, ua imi atura o Ann i te tamahine Ite. E rave rahi uiraa Bibilia ta Ann, o ta Vanessa ïa i pahono atu. “Teihea roa ta outou pureraa?” o ta Ann ïa i ani mai. I taua po ra, ua haere mai o Ann i ta ˈna putuputuraa matamua i roto i te hoê Piha no te Basileia.

Aita i maoro roa to teie tamahine otare 17 matahiti iteraa mai e rave rahi “metua tane” e “metua vahine,” mai ta Iesu i tǎpǔ na. (Mataio 19:29) Auê ïa taime putapû e, i te iteraa ˈtu ia Ann, e potii oaoa e te ataata maitai, ia faataipe i to ˈna pûpûraa ia ˈna iho no Iehova na roto i te bapetizoraa i roto i te pape i te Tairururaa Mataeinaa “Te mau vea o te hau a te Atua”!

● I te mau vahi atea o te fenua rahi no te Poro toetoe Apatoerau no Alaska—e mau hanere kilometera medebara toetoe e faataa ê ra i te mau oire iti—ua faaohipahia na te manureva e piti matini a te Taiete Watch Tower no te ueue i te mau huero o te Basileia i roto hau atu i te 150 oire iti. Tera râ, ia nehenehe te taata e tupu maitai i te pae varua na roto i te hoê haapiiraa Bibilia tamau, e tia ïa ia papai i te rata. No te mea e e ere te papairaa i te rata i te ohipa ohie no e rave rahi, e tia ïa i te hoê orometua haapii Bibilia ia imi i te mau ravea atoa no te faaaraara noa i te anaanatae o te taata haapii. Nafea e manuïa ˈi?

Ua faatere o Kathy i te hoê haapiiraa Bibilia o tei haere i mua e o Edna, noa ˈtu e e 600 kilometera raua te atea i te tahi e te tahi! Aita noa o Kathy i papai i te mau uiraa no roto i te buka, ua faaineine râ oia i te hoê api parau e mau uiraa to nia iho, e ua vaiiho atoa oia i te tahi area ia nehenehe o Edna e papai i te mau pahonoraa. I muri aˈe i to Edna papairaa i te mau pahonoraa, e pahono atu na o Kathy ma te papai i te mau tatararaa mai te peu e e titauhia no te haapapu i te tahi vahi. Te na ô ra o Kathy e: “Ua faataa vau i te ahiahi Mahana toru no ta mâua ‘haapiiraa,’ e ua tamata vau i te tapea noa i teie porotarama mai ta ˈu e rave e te tahi atu haapiiraa. Ua hapono atoa ˈtu vau ia Edna i te hoê vehi rata titirohia e to ˈu iˈoa e te vahi nohoraa i nia iho. No te mea e e titauhia e piti hebedoma ia tapae te rata, e au ïa e mea taere roa te hoê haapiiraa na roto i te papairaa rata.”

A feruri na i te oaoa o Kathy e o Edna i to raua farereiraa i te tairururaa mataeinaa i Anchorage i muri aˈe hoê ahuru avaˈe to raua haapiiraa na roto i te rata! Ua oaoa atoa te mau Ite i te rururaa mai te feia haapii Bibilia e te tahi atu feia anaanatae no te mau oire iti atea e rave rau no Alaska.

Noa ˈtu e, ia hiˈohia, e mea taere te tupuraa i te tahi mau taime, te oteo oioi nei vetahi mau “huero” ia tanohia ratou i te maramarama o te parau mau. I roto i te faito au noa, hau atu i te hoê hanere feia arue apî ia Iehova o te bapetizohia nei i te mau matahiti atoa i Alaska! Te parau nei tatou e, “Mauruuru, e Iehova” no te faatupuraa i te huero!