“O te huriraa interlinéaire maitai roa ˈˈe o te Faufaa Apî e vai nei”
O TE parau ïa ta te Orometua ra o Jason BeDuhn i faahiti no nia i te hoê huriraa parauhia interlinéaire (huriraa i raro aˈe i te reni), Te Tatararaa Interlinéaire o te Basileia o te mau Papai Heleni (Beretane). Te faataa ra oia e:
“No oti noa ˈtura te hoê haapiiraa ta ˈu i horoa na te Pu tuatapaparaa i te faaroo a te Fare tuatoru Indiana, i Bloomington, [Hau Amui no Marite] . . . E haapiiraa ïa no nia i te mau Evanelia. Ua tauturu mai outou na roto i te mau Tatararaa Interlinéaire o te Basileia o te mau Papai Heleni ta ta ˈu mau taurearea haapii e faaohipa atoa nei ei buka haapiiraa. Ua riro mau â teie mau buka iti ei tauturu faufaa roa no ta matou haapiiraa e ua au roa ta ˈu mau taurearea haapii i te reira.”
No te aha te Orometua BeDuhn e faaohipa ˈi i te Interlinéaire o te Basileia i roto i ta ˈna mau tuhaa haapiiraa tuatoru? Teie ta ˈna pahonoraa: “No te haapoto noa, o te huriraa interlinéaire maitai roa ˈˈe o te Faufaa Apî e vai nei. E orometua aravihi au i te pae no te Bibilia, tei matau maitai i te mau buka haapiiraa e te mau mauhaa e faaohipahia nei no te mau tuatapaparaa Bibilia no teie nei tau, e, e tia atoa ia parau e, e ere au i te Ite no Iehova. Tera râ, e ite oioi noa vau e papai maitai roa tera, e ua rave ta outou ‘Tomite Huriraa i te Bibilia a te Ao Apî’ i te hoê ohipa maitai roa. No te tano rahi e te papu maitai o ta outou huriraa interlinéaire Beretane, e tia i te taata taio ia feruri maite i nia i te mau taa-ê-raa i te pae no te reo, te ihotumu, e te mau manaˈo i rotopu i te ao reo Heleni e to tatou nei ao. Ua riro ta outou ‘Tatararaa a te Ao Apî’ ei huriraa maitai roa, tei pee maite i te auraa mau e tei ape i te mau faahaperaa matauhia, ma te huri maitai roa i te reo Heleni. I roto e rave rahi mau tuhaa, o te huriraa faahiahia roa ˈˈe ïa i te mau huriraa manuïa roa ˈˈe e faaohipahia nei i teie tau.”
Te nenei nei te mau Ite no Iehova i Te Tatararaa Interlinéaire o te Basileia o te mau Papai Heleni no te tauturu i te feia e here nei i te Parau a te Atua ia haamatau i te papai Heleni tumu a te Bibilia. Te vai nei Te Faufaa Apî na roto i te reo Heleni Tumu i te pae aui o te api (haaputuhia e B. F. Westcott e F. J. A. Hort). I raro aˈe i te mau reni o te papai Heleni, ua tuuhia te hoê huriraa o tera taˈo e tera taˈo ia au i te auraa mau. I te hiti api i te pae atau, ua tuuhia te Tatararaa a te Ao Apî o te mau Papai Moˈa, ia nehenehe outou e faaau te huriraa interlinéaire e te hoê huriraa na roto i te reo Beretane no teie nei tau.