Na Ture Ahuru

UA ITEA mai i te epikopo Beretane no Gloucester e, hau atu i te afaraa o te mau ekalesiatiko no to ˈna mataeinaa epikopo, o tei ore i nehenehe e faahiti aau i na Ture Ahuru, e 10 % o ratou o tei ore i ite e teihea roa te papairaahia i roto i te Bibilia. E 450 ïa matahiti i teie nei. Ua maitai mai anei te huru tupuraa? Aita roa ˈtu—mai tei faaitehia mai e te hoê titorotororaa i ravehia iho nei e te vea ra Sunday Times i nia i te mau ekalesiatiko no te Ekalesia Beretane.

I nia e 200 ekalesiatiko i uiuihia, e 34 % anaˈe o tei nehenehe e faahiti aau i na Ture Ahuru taatoa. I rotopu i te toea ra, ua manaˈo hoê e ua rahi roa te mau opaniraa, e ua haafaufaa ore te tahi atu i teie mau ture ma te parau e aita e tano faahou ra e te mau fifi morare no teie nei tau.

Ua ite anei outou i na Ture Ahuru aore ra teihea roa i roto i te Bibilia? Ua papaihia i roto i te Exodo, te piti o te buka o te Bibilia, i na irava matamua 17 o te pene 20. No te aha outou e ore ai e taio i te reira? Te vai nei te hoê ravea ohie roa no te tatuhaa i teie mau ture. Te faahiti ra na ture matamua e maha i ta tatou haamoriraa i te Atua, te haamatara ra te pae i te oraraa utuafare, no nia te mau numera ono tae atu i te iva i to tatou mau taairaa e to tatou taata-tupu, e te ahuru, e mea otahi ïa inaha, te turai ra oia ia tatou ia maimi i to tatou iho mafatu, ia hiˈopoa i te mau manaˈo e turai ra ia tatou. Teie te hoê haapotoraa e faataa ra e nafea te mau Kerisetiano ia faaohipa i te mau faaueraa tumu.

Ture matamua: A faatae i te haamoriraa i to tatou Poiete anaˈe ra. Te piti: Eiaha e faaohipa i te mau hohoˈa no te haamori. Te toru: A faatura e a faahanahana i te iˈoa o te Atua i te mau taime atoa. Te maha: A faaherehere i te taime no te haamau i te feruriraa i nia i te mau ohipa pae varua, ma te ore e nevaneva. Te pae: E te mau tamarii, a faatura i to outou mau metua. Te ono: Eiaha e taparahi pohe. Te hitu: A haapae i te faaturi. Te vau: Eiaha e eiâ. Te iva: A faaite i te parau mau. Te ahuru: A haapae roa i te nounou.

Ua riro na na Ture Ahuru ei tuhaa no te mau ture i horoahia ia Mose ra. Area te mau faaueraa tumu o ta ratou e faataa ra, aita ïa to ratou e tau. (Roma 6:14; Kolosa 2:13, 14) No reira te mau pǐpǐ a Iesu i faahiti ai e i faaohipa ˈi i na Ture Ahuru ei faahororaa. (Roma 13:8-10) Auê te oraraa i te oaoa aˈe—e i te maitai aˈe—i teie mahana, ahiri e e faatura e e faaohipa te taatoaraa i teie mau faaueraa tumu i faauruahia mai e te Atua!