E mau po taoto ore o tei faatupu i te mau faahopearaa maitatai
AITA atoa vetahi mau arii i taoto i te po. O te ohipa ïa i roohia i nia i te arii puai no Peresia ra o Ahasueru i te senekele 5 H.T.T. Peneiaˈe e ua haapeapea oia e ua moehia paha ia ˈna te tahi ohipa, ua faaue atura oia e ia taiohia mai te mau buka vairaa parau a te arii. Ua itea ihora oia e te vai ra te hoê tavini haapao maitai, o Moredekai, o tei haamanuïa ore i te hoê opuaraa no te haapohe, aita râ oia i haamauruuruhia na. Ua faaoti ihora o Ahasueru e faatitiaifaro i reira iho i taua ohipa i moehia ra. Te faaite ra te mau faahopearaa maitatai o ta ˈna mau ohipa i nia i te nunaa o te Atua e, o te Atua te tumu o taua po taoto ore ra a te arii.—Esetera 6:1-10.
Te vai ra te tumu i haamanaˈo ai te amuiraa a te mau Ite no Iehova no te oire o Hermanus i te pae miti no Afirika Apatoa, i taua aamu Bibilia ra. E putuputu na ratou i roto i te hoê piha tarahu. E rave rahi matahiti to ratou tamata-noa-raa i te hoo mai i te tahi fenua no te patu i ta ratou iho Piha no te Basileia. E inaha, i te matahiti 1991 ra, ua pûpû maira te Apooraa Oire i te hoê fenua hau roa ˈtu i te maitai.
Teie râ, ua patoi vetahi e ia hoohia ˈtu teie nei fenua i te mau Ite no Iehova. I muri aˈe i te hoê faataimeraa e rave rahi avaˈe te maoro, ua faaarahia maira te amuiraa e, ua faaotihia te hoê opaniraa e toru matahiti i nia i te hooraa i te fenua i te mau ekalesia, e no reira, ua faaorehia ˈtura taua hooraa fenua ra. I te avaˈe Me 1993, ua papai faahou atura te amuiraa no te ani i te apooraa ia hiˈopoa faahou i ta ˈna faaotiraa. Ua pahonohia mai e te hoê rata hoê anaˈe pereota e na ô ra e te mana noa ra taua opaniraa ra.
I te avaˈe Atopa o taua matahiti ra, aita te taoto o te hoê o te mau melo apooraa oire i topa. No reira, ua heheu atura teie vahine i te mau parau haaputu tahito a te apooraa no te hiˈo e te vai ra anei te tahi mau parau te tia ia hiˈopoahia. Topa ˈtura to ˈna mata i nia i te rata i papaihia e te mau Ite e ani ra i te apooraa ia hiˈopoa faahou i ta ˈna faaotiraa. Ua opua ˈtura oia e tuu i taua parau nei i roto i te tabula tauaparauraa no ta ratou putuputuraa i muri iho. Ua hinaaro hoi oia e faahiti e ua ani te mau Ite no Iehova i te hoê fenua, hou te opaniraa e tuuhia ˈi i nia i te hooraa i te fenua i te mau ekalesia.
I muri aˈe, ua horoahia maira i te amuiraa taua fenua noâ ra tei pûpûhia mai i te matahiti 1991 ra! Tei nia ïa i te purumu rahi, ohie roa ia tomo mai no te mau melo o te amuiraa e no te feia anaanatae. Ua patu ratou i te hoê Piha no te Basileia nehenehe roa, e ua pûpûhia no Iehova i te 5 no Atopa 1996.
Noa ˈtu e te tatarahapa nei te amuiraa i te po taoto ore a taua melo apooraa ra, e nehenehe râ teie vahine e tamǎrûhia i te manaˈoraa e aita atoa na te taoto o te Arii Ahasueru i topa. E mea maitai te hopearaa i roto i na tupuraa e piti nei. Oia mau, te mauruuru nei te amuiraa no Hermanus i te fanaˈoraa i ta ratou iho Piha no te Basileia, te hoê pu no te haamoriraa mau e no te haapiiraa teotaratia i roto i teie oire au-roa-hia i te pae miti.—Hebera 10:24, 25.