A faaite i te here i nia i te feia e hinaaro ra i te tauturu
E HOPOIA e e haamaitairaa taa ê ta te mau Kerisetiano e faaite i te here i nia i to ratou mau taeae e mau tuahine e hinaaro ra i te tauturu. (Ioane 1, 3:17, 18) Teie ta te aposetolo Paulo i papai: “E hamani maitai tatou i te taata atoa, ia rahi atu râ i to te fetii faaroo ra.” (Galatia 6:10) Ua ite iho nei te hoê taeae, o tei tavini na ia Iehova fatata e maha ahuru matahiti te maoro, i te here o te fetii taeae kerisetiano i te maˈiraahia ta ˈna vahine e i to ˈna poheraa i muri iho. Te papai ra oia e:
“I te mea hoi e e haapao na vau i ta ˈu vahine i te fare i to ˈna maˈiraahia, aita vau i nehenehe e rave i te ohipa fatata e piti avaˈe te maoro. Auê au i te tamahanahanahia i to te mau hoa i roto i te amuiraa tautururaa mai ia mâua! E rave rahi moni tei horoahia mai na mâua—‘no te aufau i te mau haamâuˈaraa hau,’ mai ta te mau rata e faaite ra—e ua aufau te reira i te tarahu, te uira e te pape, e te tahi atu mau haamâuˈaraa.
“E piti hebedoma na mua ˈˈe ta ˈu vahine e pohe ai, ua haere mai ta matou tiaau haaati e faaitoito ia mâua. Ua pata atoa oia i te mau hohoˈa o ta te amuiraa e mataitai i te hopea hebedoma. Ua nehenehe mâua e faaroo i te mau putuputuraa na roto i te niuniu paraparau—e tae noa ˈtu i te mau putuputuraa no te taviniraa arataihia e te tiaau haaati. I te hoê putuputuraa, ua ani oia i te feia poro atoa i amui mai no te taviniraa ia parau amui e ‘iaorana’ i ta ˈu vahine. No reira, noa ˈtu e eita ta ˈna e nehenehe e amui atoa ˈtu, aita roa ˈtu râ oia i moemoe.
“I roto hoê hora i muri aˈe i to ˈna poheraa, ua tae mai fatata te mau matahiapo atoa i te fare. Hau atu i te hanere taeae e tuahine tei haere mai i taua noa mahana ra. Ua fa ‘semeio’ mai te maa i nia i te airaa maa navai maitai no te feia atoa i tae mai. Eita ta ˈu e nehenehe e taio faahou i te rahiraa ô, tapao aroha, parau tamahanahana, e te mau pure i pûpûhia mai na ˈu. Auê hoi te reira i te faaitoito ia ˈu e! I muri iho, ua tia ia ˈu ia ani i te mau taeae ia ore e horoa faahou mai i te maa e te tauturu no te tamâraa i te fare!
“Ihea hoi tatou e ite ai i teie mau tapao aroha, tapitapi, e te here haavare ore, maoti râ i roto i te faanahonahoraa a Iehova? I teie mahana, e nehenehe te rahiraa o te taata e taio i nia i to ratou rima i te rahiraa o to ratou mau hoa mau. Area tatou ra, ua haamaitai mai Iehova ia tatou na roto i te hoê fetii rahi o te mau taeae e te mau tuahine pae varua!”—Mareko 10:29, 30.