Te faatia ra te feia poro i te Basileia
Te faarururaa i te mau fifi i “te fenua o te tupuraa manaˈo-ore-hia”
UA ANI te aposetolo Paulo i te mau Kerisetiano no Korinetia i te senekele matamua ra e: “E ia ore hoi ia taa te oto o te pu ra, na vai e faaineine ia ˈna iho e haere i te tamaˈi? Oia atoa outou, ia ore to outou vaha ia parau i te parau itea ra, eaha ihora e itea ˈi te parau i parauhia ra?”—Korinetia 1, 14:8, 9.
I Papua Niu Guinea, o tei piihia i te tahi mau taime te Fenua o te Tupuraa manaˈo-ore-hia, te farerei ra te mau Ite no Iehova i te mau haafifiraa riaria ia poro i te poroi maramarama o te Bibilia. Te poro ra ratou i te feia e paraparau ra e hau atu i te 700 reo taa ê e ua rau atoa ta ratou mau peu. Te faaruru atoa ra te mau Ite i te mau vahi mouˈa, e aita e purumu, e te ohipa ino e maraa ra. Taa ê noa ˈtu i teie mau fifi, te vai atoa ra te patoiraa a te tahi mau pǔpǔ faaroo e, i te tahi mau taime, a te feia toroa o te fare haapiiraa.
Noa ˈtu râ, na roto i te haapiiraa maitai i te pae varua e te mau pueraa papai e rahi noa ˈtura no te haapii i te Bibilia na roto i te mau reo no reira, te faaineinehia ra te mau Ite no te faaite haere i te parau apî maitai mai te hoê oto pu papu. E pinepine te taata i te farii, mai ta te mau faatiaraa i muri nei e faaite maira:
• I te haamataraa o te hoê matahiti haapiiraa apî, ua hinaaro te hoê orometua haapii e ite e no te aha te mau tamarii a te mau Ite no Iehova e ore ai e aroha i te reva aore ra e himene i te himene aiˈa. Ua ui atura oia ia Maiola, te hoê tamahine haapii 13 matahiti, e Ite bapetizohia oia. Ua horoa ˈtura o Maiola i te hoê faataaraa maramarama tei niuhia i nia i te mau Papai. Ua farii te orometua haapii i ta ˈna haaferuriraa i te mea hoi e no roto mai i te Bibilia. Ua faaite-atoa-hia ta ˈna faataaraa i te toea o te mau rave ohipa o te fare haapiiraa.
I muri iho, i te faaueraahia i te mau tamarii haapii ia papai i te hoê parau haapiiraa, ua maiti o Maiola i te tumu parau o te Toru Tahi. O ta ˈna te parau haapiiraa numera hoê i roto i te piha, e ua ani te orometua haapii ia ˈna e nohea mai ta ˈna mau haamaramaramaraa. Ua faaite atura oia ia ˈna i te buka ra E nehenehe oe e ora e a muri noa ˈtu i roto i te paradaiso i nia i te fenua nei na roto i te reo Beretane. Ua faaite atura te orometua haapii i te buka ra i mua i te piha taatoa, e e rave rahi tamarii tei hinaaro i te tahi na ratou. I te mahana i muri iho, ua opere o Maiola 14 buka e e 7 vea na to ˈna mau hoa haapiiraa, e ua haamata oia i te mau haapiiraa Bibilia e e toru o ratou. Te tapao a Maiola, e riro mai ïa ei tavini ma te taime taatoa.
• I roto i te hoê oire iti i te pae miti i pihai iho ia Port Moresby, ua faaruru te hoê pǔpǔ Ite no Iehova moemoe i te patoiraa mai te omuaraa o te mau matahiti 1970 mai â. Tera râ, ua fanaˈo iho nei ratou i te tauturu a te hoê taata manaˈo-ore-hia. I te hoê mahana, ua ani te hoê epikopo o te Ekalesia Amui i reira, e taata tumu oia no Papua Niu Guinea tei haere i te haapiiraa na te ara, i te feia i putuputu mai i roto i te fare pure ia tuu mai i te mau uiraa. Ua ani atura te hoê taata e: “Te vai nei e piti faaroo i roto i to tatou oire iti—te Ekalesia Amui e te mau Ite no Iehova. Eaha te tia ia matou ia rave ia haere mai te mau Ite i to matou fare?” I muri aˈe i te hoê taime faafaaearaa maoro, ua pahono atura te epikopo e: “Ua ite outou, aita mau â vau i ite e eaha te parau atu. Aita i maoro aˈenei, ua haere mai e piti Ite apî i to ˈu fare. Ua ui mai raua i te hoê uiraa, e noa ˈtu te ite atoa i noaa mai ia ˈu i te fare haapiiraa tuatoru, aita vau i ite i te pahonoraa. Area raua ra, ua pahono mai raua ma te ohie na roto i te Bibilia. No reira, te parau atu nei au ia outou e eaha ta outou e rave—na outou iho e faaoti. Mai te peu e eita outou e hinaaro e faaroo atu, eiaha iho â ïa, tera râ, eiaha e hamani ino atu ia ratou.”
Ua faatia te hoê tia ratere a te Taiete Watch Tower, o tei haere i muri iho e farerei i teie pǔpǔ Ite, e: “Fatata o te taata atoa o te oire iti tei faaroo i te mau Ite i to ratou haereraa e poro. Ua ani roa mai vetahi ia ratou ia tomo i roto i to ratou fare. I teie nei, ua riro teie oire iti ei paradaiso no te pororaa.”