Te faatia ra te feia poro i te Basileia

Te mana o te Parau a te Atua no te tamâ

TE PARAUHIA ra e te rave faahou ra te rahiraa o te feia i faaohipa na i te raau taero i ta ratou mau peu iino, i muri aˈe i to ratou matararaa mai i te fare maˈi rapaauraa. Tera râ, e nehenehe ta te Parau a te Atua e faatupu i te mea aita te mau fare maˈi e manuïa ra i te rave. (Hebera 4:12) E rave rahi tei tauturuhia e te Parau e te varua a te Atua no te faaore i te raau taero e no te faaohipa i te aˈoraa e: “E tamâ hua tatou ia tatou iho i te mau viivii atoa o te tino e te varua, ma te faatupu hua i te maitai i te mǎtaˈuraa ˈtu i te Atua.”—Korinetia 2, 7:1.

Te faahohoˈahia ra te reira na roto i te hoê hiˈoraa i Myanmar. Te faatia nei te hoê taata o tei aro na i te raau taero e rave rahi matahiti te maoro e: “Ua haamata vau i te faaohipa i te raau taero i to ˈu apîraa. E rave rahi taime to ˈu tamataraa i te faaore, aita râ i manuïa. No te haamâha i to ˈu hiaai i te raau taero, ua haamata ˈtura vau i te eiâ. I te pae hopea, i te matahiti 1988 ra, ua tapeahia vau i te fare auri hoê matahiti te maoro.

“I muri aˈe i to ˈu matararaa mai i te fare auri, ua haere faahou vau e farerei i to ˈu mau hoa tahito. I muri noa ˈˈe, ua faaohipa faahou vau i te raau taero. No teie haerea e faaino ra ia ˈu, aita te mau melo o to ˈu utuafare i amuimui e o vau. Hau atu, e rave rahi i roto i te oire i riaria ia ˈu no to ˈu huru orure hau, e ua haamata atoa ˈtura ratou i te ape mai ia ˈu.

“E i te hoê mahana, ua tupu te ohipa o te ore e nehenehe e ape—ua rahi roa te raau taero ta ˈu i rave. Ua tapea-faahou-hia vau i te fare auri, e toru matahiti i taua taime ra. Noa ˈtu e mea fifi roa te oraraa i roto i te fare auri, ua nehenehe râ vau e ora mai.

“I muri aˈe i to ˈu hoˈiraa i te fare mai te fare auri mai, ua ani au i to ˈu utuafare ia faaore mai i ta ˈu mau hapa tahito. Ua farii faahou mai ratou ia ˈu ma te aroha, tera râ, ua ramâ te mau hoa ia ˈu ia rave faahou i ta ˈu mau peu tahito.

“I te pae hopea, ua ani to ˈu mama ruau i te orometua no reira e ia apiti au i te tahi haapiiraa Bibilia. Ua farii te orometua. Tera râ, hou vau a haamata ˈi i te apiti, ua parau mai to ˈu metua vahine fetii, e Ite no Iehova oia, e mai te peu e e hinaaro mau â vau e haapii i te Bibilia, e tia ïa ia ˈu ia haapii e te mau Ite.

“Ua haere atura vau i te Piha no te Basileia, e ua faaitehia vau i te hoê taata i farii i te haapii te Bibilia e o vau. Ua aroha mai e rave rahi taata i tae mai ma te mahanahana e ua farii maitai mai ratou ia ˈu.

“I muri aˈe i to ˈu haapiiraa i te Bibilia e to ˈu haereraa i te mau putuputuraa kerisetiano, ua monohia to ˈu hiaai i te raau taero e te hinaaro e haafatata ˈtu i te Atua. Hoê matahiti i muri iho, ua haere au i mua e tae noa ˈtu i te pûpûraa i to ˈu oraraa no te Atua ra o Iehova, e ua faataipe au i ta ˈu euhe na roto i te bapetizoraa i roto i te pape.

“Aita i maoro aˈenei, a poro ai au na tera e tera fare, ua farerei au i te hoê o to ˈu mau hoa tahito e faaohipa ra i te raau taero. Aita o ˈna i taa e mea nafea to ˈu taui-rahi-raa. Ua nehenehe ïa vau e poro ia ˈna, e e tauaparau ia ˈna no nia i te tiaturiraa o te Basileia.

“Inaha, ua iteahia mai ia ˈu te tumu e te auraa mau o te oraraa. Auaa hoi te tauturu a te Atua e te mau aˈoraa i roto i ta ˈna Parau, e nehenehe au i teie nei e tauturu ia vetahi ê ia faaore i te peu ino e faaohipa i te raau taero.”