Ua mau maite ratou i mua i te hamani-ino-raa a te Nazi

TE ITE-PAPU-HIA ra te taa-ê-raa rahi i rotopu i te tiaraa taiva ore e te mǎtaˈu ore o te mau Ite no Iehova i Helemani Nazi ra, e te tiaraa i ravehia e te mau ekalesia a te Amuiraa faaroo kerisetiano. O ta te orometua haapii i te tuatapaparaa aamu ra o John Weiss ïa i papai i roto i ta ˈna buka Tuatapaparaa manaˈo no nia i te pohe (Beretane). Te papai ra oia e:

“I te matahiti 1934 ra, ua titau onoono te ekalesia Evanelia e ia ‘farii-popou-hia [te mau Nazi] na te faaroo Lutero,’ e ua haamauruuru oia i ‘te Fatu ra o te Atua’ i to ˈna horoaraa mai na to Helemani i te hoê ‘fatu paieti e te papu’ [oia hoi o Hitler]. . . . Ua papai atu te hoê orometua Porotetani i to ˈna mau upoo faatere e, ‘na te Atua i tono mai ia [Hitler] ia tatou nei.’” Te na ô râ o Weiss Tane e: “Ua farii te ekalesia Methodiste Helemani . . . i te manaˈo o te Orometua Dibelius e na Hitler i faaora ia Helemani i te hoê orureraa hau Bolchevik i fatata roa i te tupu, e ua hopoi mai oia i te hau e te vai-maitai-raa . . . Ua faaue te ekalesia Momoni i to ˈna mau melo e, ia patoi noa ˈtu te tahi ia Hitler, te ofati ra ïa oia i te ture Momoni.” E te na ô faahou ra oia e: “Ua parauhia i te mau Katolika e, e hopoia moˈa te auraroraa i te hau apî [Nazi], e hopoia te ore roa ˈtu hoi i faaorehia i muri iho, noa ˈtu e ua ite te mau upoo faatere haapaoraa i te mau ohipa hairiiri atoa i ravehia [e te mau Nazi] i te pae hitia o te râ.”

E te mau Ite no Iehova? Te faahiti ra te Orometua Weiss e “ei pǔpǔ, o te mau Ite no Iehova anaˈe o tei patoi atu i te mau Nazi.” E mau tausani tei tuuhia i roto i te vahi tapearaa, o ta te Orometua Weiss ïa e parau faahou ra, “teie râ, e nehenehe te Ite tataitahi i hopoihia i roto i te hoê aua tapearaa e faatiamâhia ahiri noa e ua tarima oia i te hoê parau e na ô ra e te faarue ra oia i to ˈna faaroo.”

No nia i te tiaraa taiva ore o te mau Ite no Iehova, te faataa ra te Orometua Weiss e: “Te faaite maitai ra to ratou hiˈoraa i te tiaraa papu e te mǎtaˈu ore taa ê roa i ravehia na e te Kerisetianoraa matamua, hou te Kerisetianoraa i riro mai ai ei faaroo tumu e i hema ˈi i te faanahoraa totiale, na te reira hoi i faaore i te hinaaro e tapea i te hoê oraraa taiva ore. Mai ta te hoê orometua Porotetani i papai no nia ia ratou, ‘E ere taua mau ekalesia tuiroo ra, o teie râ nunaa iti faainohia e faaooohia, te feia i mau maite no te aro atu i te hae o te demoni Nazi ra, e o tei ore i mǎtaˈu i te patoi atu ma te tapea i to ratou faaroo.’”