Ua turu te Tiribuna Teitei no Connecticut i te tiamâraa o te taata maˈi

I te 16 no Eperera 1996, ua turu te Tiribuna Teitei no Connecticut, Hau Amui no Marite, i te tiamâraa o te mau Ite no Iehova e patoi i te mau pâmuraa toto. Ua taui teie nei ohipa i te faaotiraa i ravehia na mua ˈtu e te Piha Haavaraa Matamua.

I te avaˈe Atete 1994, ua haamata o Nelly Vega, e Ite no Iehova oia, i te tapahi i muri aˈe i to ˈna fanauraa i ta ˈna tamarii matamua. Aita te mau tamataraa no te tapea i te toto i manuïa. A ino noa ˈi te huru o Vega Vahine, ua titau atura te fare maˈi i te hoê faaotiraa a te tiribuna e faatia ia ratou ia pâmu ia ˈna i te toto. Ua tarima aˈena o Vega Vahine i te parau e faatiamâ i te mau taote, ma te faaue e ia ore te toto aore ra te mau taoˈa no roto mai i te toto ia pâmuhia i roto ia ˈna i te taime e tapeahia ˈi oia i te fare maˈi, no reira, aita ta te fare maˈi e hopoia e amo no te mau faahopearaa o ta ˈna faaotiraa. Noa ˈturâ, ua parau te fare maˈi e ia faahepo ratou i te hoê pâmuraa toto, te ohipa ra ïa ratou no te maitai o te aiû fanau apî, o tei hinaaro hoi i to ˈna mama, o ta te fare maˈi ïa i haapapu faahou. Ua tapitapi atoa te Piha Haavaraa Matamua e, taa ê atu i to ˈna tapahi, e vahine apî e te itoito maitai o Vega Vahine. No reira, noa ˈtu te mau patoiraa a te tane a Vega Vahine e a to ˈna paruru, ua horoa ˈtura te tiribuna i te parau faatia e ua pâmuhia ˈtura oia i te toto.

I muri iho, ua hopoihia ˈtura teie ohipa i mua i te Tiribuna Teitei no Connecticut. I reira, ua faaoti te taatoaraa e, ua ofati te ohipa i ravehia e te fare maˈi i te tiamâraa o Vega Vahine. Teie te faaotiraa i ravehia: “Te uiuiraa i mua i te Piha Haavaraa Matamua, ua ravehia ïa i te maororaa po, i roto i te mau tupuraa ru roa o tei ore i faatia i na paeau e piti ia vauvau maitai i ta ratou mau parau.”

E mea faufaa roa teie nei faaotiraa a te Tiribuna Teitei no Connecticut no te feia atoa e ere i te Ite no Iehova. “E mea faufaa roa no te feia maˈi atoa o te ore e farii ra i te mau faaotiraa a to ratou taote,” o ta Donald T. Ridley ïa e parau ra, oia te paruru o Vega Vahine. “E tapea teie faaotiraa i te mau fare maˈi ia taataahi i te mau faufaa morare o te mau taata maˈi, i te pae faaroo aore ra i te tahi atu.”