Te faatia ra te feia poro i te Basileia

Ua iteahia e ana te hoê “poe maitai roa”

“E AU te basileia o te ao ra i te hoê taata hohoo tei imi i te poe maitatai: e itea ihora ia ˈna te hoê poe maitai roa ra; haere atura hoo atura i te mau taoˈa atoa na ˈna ra, e ua hoo atura i taua poe ra.” Na roto i teie mau parau, ua faahohoˈa o Iesu i te faufaaraa rahi o te Basileia o te Atua. (Mataio 13:45, 46) Te rave pinepine nei te feia o te farii ra i te faufaaraa o te Basileia i te mau haapaeraa rahi no te tapea maite i te reira. Ua faahohoˈahia te reira i roto i te hiˈoraa i muri nei i Pingtung County, i Taiwan.

I te matahiti 1991 ra, ua haamata o Lin Tane e ta ˈna vahine i te haapii i te Bibilia e te mau Ite no Iehova. I to te hoê ekalesiatiko o taua vahi ra iteraa i te reira, ua tamata ˈtura oia i te faahaere mai ia raua i ta ˈna ekalesia. I te mea e ohipa hooraa toto puaa e te toto moora ta Lin ma i te matete o taua vahi ra, ua opua ˈtura raua e ani i te manaˈo o te ekalesiatiko no nia i te reira. “Te mau mea atoa ta te Atua i hamani, e nehenehe ïa te taata e amu,” o ta ˈna ïa i pahono. I te tahi aˈe pae, ua faaitoito te mau Ite ia raua ia hiˈo e eaha ta te Parau a te Atua e faaite ra. Ua haapii atura raua e mea moˈa te toto no te Atua ra o Iehova, no te mea “tei te toto hoi te maa ora e ora ˈi te mau mea atoa ra.” (Levitiko 17:10, 11) No reira, “eiaha” te mau Kerisetiano mau “e rave i . . . te toto.” (Ohipa 15:20) I muri aˈe i to raua hiˈopoaraa i te mau Papai i nia i teie tumu parau, ua opua ˈtura o Lin ma e faaea i te hoo i te toto, noa ˈtu e o te reira ta raua imiraa moni matamua. Maa taime poto noa râ, ua faaruru raua i te hoê tamataraa rahi atu â.

Hou raua a haapii ai i te parau mau, ua tanu o Lin ma 1 300 tumu tamara betel i nia i to raua fenua. Noa ˈtu e e titauhia e pae matahiti e hotu mai ai te mau tumu, ia horoa maitai anaˈe mai râ teie mau tumu, e nehenehe e noaa ia Lin ma 77 000 dala Marite i te matahiti hoê. I te fatataraa mai te taime auhuneraa matamua, ua tia ia Lin ma ia rave i te hoê faaotiraa faufaa. Ua haapii raua na roto i to raua tuatapaparaa i te Bibilia e e tia i te mau Kerisetiano ia tamâ ia ratou “i te mau viivii atoa o te tino e te varua” na roto i te aperaa i te faaohipa, aore ra i te faaitoito, ia rave i te mau peu viivii mai te puhipuhiraa i te avaava, te raau taero, e te auauraa i te huero betel. (Korinetia 2, 7:1) Eaha ïa ta raua e rave?

Faateimahahia e te hoê haava manaˈo peapea, ua opua ˈtura o Lin Tane i te faaea i te haapii. I te hoê â taime, ua hoo o Lin Vahine i te mau huero betel no ǒ mai i te tahi o ta raua mau tumu tamara tahito e ua noaa mai ia ˈna hau atu i te 3 000 dala Marite. E hiˈoraa noa teie o te moni e noaa mai i muri iho mai te peu e e vaiiho noa raua i ta raua mau tumu tamara. Tera râ, ua tamau noa te haava manaˈo o Lin Tane i te haapeapea ia ˈna.

Ua hauti noa to ˈna haava manaˈo e tae noa ˈtu i te hoê mahana ani atura oia i te mau Ite o to ˈna vahi ia tâpû i ta ˈna mau tumu tamara betel no ˈna. Ua faataa ˈtura te mau Ite e na ˈna e rave i te faaotiraa; e tia ïa ia ˈna ia ‘amo i ta ˈna iho hopoia’ e na ˈna iho e tâpû i te mau tumu raau. (Galatia 6:4, 5) Ua faaitoito ratou ia ˈna ia haamanaˈo i te parau tǎpǔ i roto i te Korinetia 1, 10:13 e na ô ra e: “Aita outou i roohia e te ati maori râ mai ta te taata nei â; e parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.” Ua haaferuri atoa te mau Ite ia ˈna e: “Mai te peu e e tâpû matou i ta oe mau tumu raau no oe, e nehenehe oe e tatarahapa e e faahape oe ia matou no te mau pau.” Maa taime i muri iho, ua faaarahia o Lin Vahine e te haruru o te matini tâpû raau. Te tâpû ra ta ˈna tane e te mau tamarii i te mau tumu tamara betel!

Ua ite o Lin Tane e e tapea iho â o Iehova i Ta ˈna parau tǎpǔ. Ua noaa mai ia ˈna te hoê ohipa o tei vaiiho ia ˈna ma te hoê haava manaˈo mâ, e nehenehe ïa o ˈna e arue ia Iehova. Ua bapetizohia oia i te hoê rururaa haaati a te mau Ite no Iehova i te avaˈe Eperera ra 1996.

Oia, ua “hoo” mau â o Lin Tane “i te mau taoˈa atoa na ˈna ra” e hoo maira i te hoê “poe maitai roa.” I teie nei, te fanaˈo ra oia i te haamaitairaa faufaa roa e faatupu i te hoê taairaa piri e te Atua ra o Iehova e e tavini i te mau faufaa a To ˈna Basileia.