Ia haere anaˈe mai te mau ite no Iehova

Eaha te tia i te mau Katolika ia rave ia haere anaˈe mai te hoê Ite no Iehova i to ratou fare? Te faaite ra te hoê papai apî i faaineinehia e te Piha Haapiiraa Sabati a te Hau no te Apooraa a te mau Epikopo Italia: “Te oreraa e paraparau, ma te au, ma te papu râ hoi, e ere ïa i te mea ino i roto i teie tupuraa.”

E ere o te taatoaraa o te mau Katolika te farii ra i te reira, mai tei faaitehia e te hoê rata i faataehia ˈtu i te vea ra Gazzetta del Mezzogiorno e te hoê taata o te noho ra i Foggia, i te fenua Italia:

“E ere au i te Ite no Iehova. E Katolika vau. Teie râ, ua maere au i te tahi mau ture ta te ekalesia e faahepo ra i nia i te mau melo ekalesia, ma te parau atu ia ratou ia tapiri i te mau parau faaara i nia i to ratou mau opani eita e fariihia te mau Ite no Iehova. Te poro noa ra hoi teie mau taata i te Parau a te Atua, e te tauturu ra ratou ia vetahi ê ia noaa i te hoê ite hohonu atu â o te Bibilia. Te faahaamanaˈo ra teie mau faaueraa ia ˈu i te taime a roohia ˈi te fenua Italia i te maˈi choléra e ua horoahia mai te mau aˈoraa nafea ia tinai i teie maˈi.

“I to ˈu manaˈoraa, te faaite ra te reira e te haamau ra te ekalesia i ta ˈna iho mau ture ma te ore e tâuˈa i te mau hinaaro o te mau melo ekalesia. Teie râ, e tau matahiti i teie nei, ua ite au e te haere atoa ra te mau Katolika i tera e tera fare, i te mau fare a te mau Ite no Iehova atoa; e te farii ra ratou i te mau Katolika, e paraparau e o ratou, ma te ore e patoi i te taata.”

Aita te mau Ite no Iehova e faahepo ra i te mau taata ia farii i ta ratou poroi. Area ra, te tutava nei ratou i te tufa na vetahi ê i te tiaturiraa e vai ra i roto i te Parau a te Atua o ta ratou iho i ite e mea tamahanahana i roto i teie tau arepurepu. Na roto i te haereraa i tera e tera fare, oia atoa, na roto i te paraparauraa i te feia o ta ratou e farerei na te aroâ, te tufa ra te mau Ite no Iehova i te parau apî maitai i te feia e hinaaro ra e faaroo.—Mataio 24:14; Ohipa 5:42; 17:17.