Te Bibilia—E buka otahi roa

Ua parauhia e, oia te buka hoo-rahi-roa ˈˈe-hia na te ao nei, e ua tano roa teie nei parau. Te taiohia nei e te poiherehia nei te Bibilia hau atu i te tahi atu buka. E tae roa mai i teie nei, te manaˈohia ra e ua operehia e maha miria Bibilia (te taatoaraa aore ra te hoê tuhaa) na roto hau atu i te 2 000 reo.

Te mea hau atu râ i te anaanatae i te numera taatoa o te mau Bibilia i operehia, o ta ˈna ïa parau e mea faauruahia mai oia e te Atua. Ua papai te aposetolo kerisetiano ra o Paulo e: “Te mau parau moˈa atoa i papaihia ra e mea faaurua mai ïa e te Atua.” (Timoteo 2, 3:16) Eaha ïa te auraa? Te auraa mau o te pereota ra ‘e mea faaurua mai e te Atua’ (Heleni, the·oʹpneu·stos), oia ïa “puhipuhihia mai e te Atua.” Te auraa o te tahi atu taˈo Heleni, pneuʹma, i taaihia i teie nei parau, e “varua” ïa. No reira, te na ôhia ra e, na te varua moˈa o te Atua i turai i te mau taata papai, mai te mea ra e ua puhipuhi oia i nia ia ratou, ia nehenehe te buka e noaa mai i te pae hopea, e parau-mau-hia e e Parau na te Atua, eiaha râ na te taata. Oia mau, e rave rahi taata tei haapii i te Bibilia, o te haafaahiahia nei i te au-maite-raa i rotopu i to ˈna mau buka atoa, to ˈna tanoraa i te pae ite aivanaa, te haavare ore e te huna ore o to ˈna mau taata papai, e te mea faufaa roa ˈtu â, ta ˈna mau parau tohu i tupu—e mau tumu anaˈe ïa i tiaturi ai te mau mirioni taata taio tuatapapa maite e, no ǒ mai teie buka i te hoê pu teitei aˈe i te taata nei.a

Ua aratai râ te Atua i te papairaa o te Bibilia i roto i teihea faito? Te parau nei vetahi e, ua faahiti mai oia i te mau taˈo tataitahi o te Bibilia. Te na ô ra te tahi pae e, ua faaurua noa mai oia i te mau manaˈo e vai ra i roto i te Bibilia, eiaha râ te mau parau. I te tanoraa mau râ, eita e nehenehe e parau e hoê anaˈe ravea faauruaraa no te mea, “e rave rahi te huru o te parauraa mai [te Atua] i te feia tupuna i te mau peropheta.” (Hebera 1:1; a faaau e te Korinetia 1, 12:6.) I roto i te tumu parau i muri nei, e tuatapapa mai tatou i te mau ravea i parau mai ai te Atua i te tahi tau 40 taata i papai na i te Bibilia.

[Nota i raro i te api]