A haere mai i te Tairururaa Mataeinaa “Te faaroo i roto i te Parau a te Atua”!
E RAVE rahi mirioni taata o te haere atu i te mau hanere vahi tairururaa na te ao nei. I Polinesia nei, e 5 tairururaa o tei faaineinehia. E tupu te tairururaa matamua i te 18-20 no Tiurai e te tairururaa hopea ra, i te 15-17 no Atete. Mea papu e e tupu te hoê o teie mau haaputuputuraa e toru mahana te maoro—mai te Mahana pae e tae atu i te Sabati—i te hoê oire i pihai iho noa i to outou vahi faaearaa.
Mea rahi te mau haapiiraa Bibilia tano maitai o ta outou e haapii mai. I te rahiraa o te mau vahi, e haamata te porotarama i te mau poipoi atoa i te hora 9 e te afa na roto i te tahi upaupa. I te poipoi Mahana pae, e 25 minuti te maoro, e uiuihia te tahi mau taata ua taui roa to ratou oraraa na roto i to ratou faaroo i roto i te Parau a te Atua. E hope teie tuhaa matamua na roto i te oreroraa parau rahi ra, “E haerea faaroo to tatou, e ere i te haerea ite mata.”
E tuatapapa te oreroraa parau matamua i te avatea o te Mahana pae, i te tuhaa faufaa roa a te mau taurearea i roto i te amuiraa kerisetiano. E vauvau mai te oreroraa parau e toru tuhaa no muri iho i te mau titauraa a te Bibilia no nia i te haerea kerisetiano i te pae no te paraparauraa, te mau peu, e te huru faanehenehe. I muri iho, e tuu te mau oreroraa parau ra “E ara i te ereraa i te faaroo” e “E mea ora te Parau a te Atua,” i te tapao i nia i te mau aˈoraa maitatai roa i roto i te Hebera pene 3 e te 4. E hope te porotarama no te Mahana pae na roto i te oreroraa parau ra “E buka no te mau taata atoa.”
Teie te oreroraa parau matamua no te poipoi Mahana maa, “Te faaroo aore e ohipa ra, e mea pohe ïa.” E faataa mai te tahi atu oreroraa parau faufaa roa i taua poipoi ra, “Ia aahia outou e ia vai papu i roto i te parau mau,” e nafea ia tupu i te rahi i te pae varua. E hope teie tuhaa poipoi na roto i te hoê oreroraa parau matauhia i te tairururaa, “E aratai te faaroo i roto i te Parau a te Atua i te bapetizoraa,” e i muri iho, e bapetizohia ïa te mau pǐpǐ apî.
E faataa mai te oreroraa parau matamua i te avatea o te Mahana maa, “A rave i te aroraa puai no te faaroo,” i te mau aˈoraa e horoahia ra i roto i te buka Bibilia a Iuda. E tuatapapa te mau oreroraa parau tatuhaahia i roto i te area hoê hora, “E haere anaˈe i te fare o Iehova,” i te mau haamaitairaa o te mau putuputuraa kerisetiano. E hope te porotarama o taua mahana ra na roto i te oreroraa parau ra “Te maitai o to outou faaroo—Te tamatahia ra i teie nei.”
I roto i te porotarama o te Sabati poipoi, te vai ra te hoê oreroraa parau e toru tuhaa, o te vauvau mai i te buka Bibilia a Ioela, e tae noa ˈtu i to ˈna faaohiparaa i teie nei tau. I muri iho, o te darama ïa “A tapea i te mata maitai.” Te hoê taime faufaa roa o te tairururaa, o te oreroraa parau huiraatira ïa i te avatea, “Te faaroo e to outou oraraa no a muri aˈe.”
Oia mau e faufaahia outou i te pae varua ia tae mai outou. E farii-popou-hia outou i te mau tuhaa atoa o te tairururaa. A faanaho ia outou i teie nei ia tae atu iho â outou. No te ite e ihea roa e tupu ai te tairururaa fatata aˈe i to outou vahi, a ani atu i te Piha no te Basileia a te mau Ite no Iehova aore ra a papai atu i te feia nenei i teie vea. E ite atoa outou i te mau vahi tairururaa e tupu i Polinesia nei, i Farani, i Niu Zelani, i Rarotoa, i Taratoni, e i Vanuatu, i roto i te A ara mai na! o te 8 no Tiunu.