Te haerea tia—Mai tera noa anei aore ra mea maitihia?
“NOA ˈTU e e ere to ˈu i te haerea tia, e nehenehe râ ta ˈu e na reira i te tahi taime mai tera noa.” O ta te taata ohipa ino ra o Autolycus ïa e parau ra i roto i te buka ra The Winter’s Tale a William Shakespeare. Te faataa ra te reira i te hoê paruparu rahi o te taata—to tatou hinaaro e rave i te hara, no roto mai i te hoê ‘mafatu haavare.’ (Ieremia 17:9; Salamo 51:5; Roma 5:12) Teie râ, teie anei te auraa e aita ta tatou e maitiraa i roto i taua tupuraa ra? E tupu anei te haerea maitai mai tera noa? Eita roa ˈtu!
Hou te mau tamarii Iseraela a tomo ai i roto i te Fenua Tǎpǔhia, ua paraparau atu o Mose ia ratou a puhapa ˈi ratou i te mau vahi papu no Moabi. Ua tuu atu oia i mua ia ratou e piti maitiraa papu maitai. E nehenehe ratou e auraro i te mau ture a te Atua, e e fanaˈo i ta ˈna haamaitairaa, aore ra e patoi i te reira, e e ooti i te mau hotu iino o te hara. (Deuteronomi 30:15-20) Na ratou e maiti i te reira.
I te mea hoi e tiamâraa to tatou, e nehenehe atoa ta tatou e maiti. Aita hoê aˈe taata—e tae noa ˈtu i te Atua—e faahepo ra ia tatou ia rave i te maitai aore ra ia rave i te ino. Teie râ, e ani paha vetahi ma te tano e, ‘Mai te peu e te turai ra to tatou mafatu ia rave i te ino, nafea ïa tatou e nehenehe ai e rave i te maitai?’ E hiˈopoa maitai te hoê taote niho i te mau niho no te ite i te vahi ino aore ra te vahi pê hou a ino roa ˈi. Oia atoa, e tia ia tatou ia hiˈopoa i to tatou mafatu taipe no te imi i te mau paruparu e te mau pê i te pae morare. No te aha? No te mea “no roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino,” o ta Iesu ïa i parau.—Mataio 15:18-20.
No te paruru i te hoê niho, e tia i te hoê taote niho ia iriti roa i te pê i nia iho. Oia atoa, e titauhia ia ohipa papu no te tamâ i te mau “manaˈo iino” e te mau hinaaro iino i roto i te mafatu. Na roto i te taioraa e te feruri-maite-raa i nia i te Parau a te Atua, te Bibilia, eita noa tatou e ite i te mau eˈa a to tatou Poiete, e haapii atoa râ tatou ia rave i te maitai.—Isaia 48:17.
Ua fanaˈo te Arii o Iseraela, o Davida, i te tahi atu â tauturu titauhia i roto i te aroraa no te rave i te maitai. Ua pure oia e: “E faaau na oe i te aau mâ i roto ia ˈu nei, e tau Atua. E faahou na hoi oe i te aau manaˈo tia [“apî,” MN] i roto ia ˈu nei.” (Salamo 51:10) Oia, na roto i te turuiraa i nia i te Atua ra o Iehova na roto i te pure, e nehenehe atoa ta tatou e haapae i to tatou hinaaro e rave i te ino, e e faahotu i te hoê “manaˈo tia apî” ia rave i te maitai. Ia na reira tatou, eita ïa tatou e faaite i te haerea parau-tia mai tera noa. Mea maitihia râ e tatou.
[Hohoˈa i te api 21]
Mai ia Davida ra, e nehenehe te pureraa ia Iehova e tauturu ia tatou ia rave i te maitai