E faatupu te mau Ite no Iehova i te mau Tairururaa Nunaa
Te opua ra te Tino Aratai a te mau Ite no Iehova e faatupu i te mau tairururaa nunaa i te matahiti 1998. Ua fariihia teie parau faaite ma te oaoa rahi i te rururaa matahiti a te Watch Tower Bible and Tract Society of Pennsylvania, i tupu i te Fare Tairururaa no Jersey City, i te Mahana maa 5 no Atopa 1996.
Taa ê atu i te mau tairururaa mataeinaa matauhia, e faatupuhia e rave rau tairururaa nunaa i Marite Apatoerau i te afaraa o te matahiti 1998. Te manaˈohia ra e e mau hanere tausani Ite no ǒ mai i te mau fenua huru rau o te ao nei, te tae mai i teie mau haaputuputuraa. Ia nehenehe te mau tia no te rahiraa o te mau fenua e tae mai, e faataehia i te mau amaa tataitahi e 100 tiahapa a te Taiete Watch Tower, te hoê numera taotiahia o te mau tia e haere atu i te hoê oire tairururaa nunaa faataahia i Marite Apatoerau.
Papu maitai, eita pauroa te feia e hinaaro paha e ratere i Marite Apatoerau, e tae. Teie râ, e nehenehe â te mau tausani taata e haere i te hoê tairururaa nunaa piri atu i to ratou fenua. Te ravehia nei te mau faanahoraa no te faatupu i te mau tairururaa nunaa i roto e piti aore ra e toru fenua i Europa e vetahi i Afirika, Asia, Marite Latino, Patitifa Apatoa, e te mau motu Antilles.
I te taime e au, na te mau amaa a te Taiete e faaara ˈtu i te mau amuiraa o ta ratou mau tuhaa fenua, no nia i te oire aore ra te mau oire tairururaa i faataahia no ratou. E horoahia ˈtu te mau haamaramaramaraa no nia i te mau taio mahana o te tairururaa e te mau faanahoraa no te maitiraa i te mau tia. Te feia e opua ra e faaî i te parau aniraa no te maitiraa i te mau tia, e nehenehe ïa ratou e haamata i te haaputu i te moni no teie mau ohipa taa ê.
E nehenehe te mau Ite no Iehova atoa na te ao nei e tiai ru i te mau mea i faaineinehia na tatou i teie mau haaputuputuraa nunaa i te matahiti 1998. Hoê â porotarama no te mau tairururaa mataeinaa i roto i te mau fenua atoa.