Te mau tairururaa nunaa rau no te matahiti 2003
I TE Mahana maa 6 no Atopa 2001, ua tupu te apooraa matahiti a te mau melo no te Watch Tower Bible and Tract Society of Pennsylvania i Jersey City, i New Jersey, i Marite. I muri aˈe i taua apooraa ra, ua fanaˈo te mau melo e ta ratou mau manihini i te hoê porotarama taa ê. I te poipoi aˈe, i te tahi atu â mau apooraa i tupu i roto e maha oire i Kanada e i te mau Hau amui no Marite, ua horoa te mau melo o te Tino aratai a te mau Ite no Iehova i teie parau faaite i muri aˈe i ta ratou oreroraa parau hopea:
“A hiˈo ai tatou i te tau no a muri aˈe, e mea faufaa roa ia ore te nunaa atoa o te Atua ia faarue i ta ratou mau haaputuputuraa. Ua aˈo te aposetolo Paulo e ia na reira, e ia faaitoito te tahi i te tahi no te mea te hiˈo na tatou i te mahana rahi e te riaria o Iehova i te fatataraa mai. (Hebera 10:24, 25) Ia au i teie faaueraa o te mau Papai, te manaˈo nei matou e e tupu te mau tairururaa mataeinaa i te mau fenua atoa o te ao nei i te matahiti i mua [2002]. E i te matahiti 2003, mai te peu e e hinaaro o Iehova, e nehenehe e faatupu i te mau tairururaa nunaa rau taa ê i te tahi mau fenua o te ao nei. Teie te taime no te vai ara, ia hiˈohia te mau tupuraa na te ao nei.”
Noa ˈtu e te maraa noa ra te papu ore e te mau fifi a piri ai teie nei faanahoraa i to ˈna hopea, e tia i te ohipa a te nunaa o te Atua ia haere i mua. E tia ia faaitehia te parau apî maitai o te Basileia, tae noa ˈtu i te poroi faaara o te Bibilia, i te mau fenua atoa, i te mau opu atoa, i te mau reo atoa, e i te mau nunaa atoa, ma te titau ia ratou ia ‘mǎtaˈu i te Atua e ia faahanahana ˈtu ia ˈna no te mea ua tae i te hora faautuaraa na ˈna ra.’ (Apokalupo 14:6, 7) No reira, ia au i te hinaaro o to tatou Metua i te raˈi ra e to ˈna manaˈo hamani maitai, te faanahohia ra te tahi mau tairururaa nunaa rau i te mau tuhaa fenua rau o te ao nei no te matahiti 2003.
Na mua roa, te tamatahia ra i te faanaho i taua mau haaputuputuraa ra i te tahi mau oire i Marite Apatoerau e i muri iti noa ˈˈe i Europa. I muri rii aˈe i te matahiti 2003, e ravehia te tahi mau faanahoraa no te mau pǔpǔ tia o te reva i te tahi mau oire no Asia; e i te pae hopea o te matahiti, e haere te tahi atu â mau pǔpǔ i Afirika, i Marite Apatoa, e i te mau tuhaa fenua no Patitifa. E anihia i te tahi mau amaa ia tono i te hoê numera taotiahia o te mau tia i te mau vahi tairururaa taa maitai, no reira eita e nehenehe e titau manihini i te taatoaraa. Teie râ, e mea faaitoito ia tae te mau pǔpǔ tia taotiahia no te mau fenua rau i tera e i tera vahi.
E fatata e faataehia ˈtu te mau haamaramaramaraa no nia i teie mau haaputuputuraa i te mau amuiraa a te mau Ite no Iehova. Na ta ratou mau amaa taitahi e horoa i te mau haamaramaramaraa no nia i te taio mahana tia e te mau oire faataahia i reira te mau tia i titau-manihini-hia e apiti atu ai. No reira, te anihia ˈtu nei ia outou eiaha e papai aore ra e ani mai no nia i teie tuhaa i teie taime.
Te mau tia e maitihia, e mau Ite pûpûhia e te bapetizohia ïa o te horoa i te mau hiˈoraa maitatai e o te faaite i te aroha taeae i te mau taeae no reira. I to ratou aˈe pae, e mau taime maitatai te reira no ratou ia faaite i te manava î i te here e te farii maitai mau i te mau ratere. (Hebera 13:1, 2) E horoa mai te reira i te “mahanahana.” (Roma 1:11, 12) Na te mau amaa, o te titauhia ra e tono i te mau tia i te tahi fenua aore ra mau fenua taa maitai, e horoa ˈtu i te tahi atu â mau haapapuraa no nia i teie mau faanahoraa.
E faanahohia e toru mahana tairururaa mataeinaa no te matahiti 2003 i roto i te rahiraa o te mau fenua mai tei matauhia. Ma te haaputuputu amui, e taime maitai to te taatoaraa no te ‘ite, te haapii, e te mahanahana.’ (Deuteronomi 31:12; Korinetia 1, 14:31) E nehenehe ïa te nunaa atoa o te Atua e ‘tamata e e ite i te maitai o Iehova.’ (Salamo 34:8) I te mau tairururaa nunaa rau atoa, e i te mau tairururaa mataeinaa e rave rahi, te vai ra te mau mitionare, e e apiti te tahi o ratou i roto i te porotarama.
I te roaraa o teie matahiti, te fanaˈo nei tatou i te mau tairururaa mataeinaa “Feia poro itoito rahi i te Basileia,” o te faaitoito ia tatou ia horoa i te hoê faaiteraa rahi atu â. A na reira ˈi tatou, e rahi atu â to tatou hinaaro ru i ta Iehova e faataa ra no te matahiti e haere maira. E tauturu te reira ia tatou ia ‘ara, ia vai ara, e ia parahi ineine noa’ ia au i teie tau fifi e te faufaa roa.—Mataio 24:42-44.