Te faaroo i te Atua—E titau anei te reira i te hoê semeio?
I TO Albert haamataraa i te imi i te Atua, e 20 matahiti to ˈna. Ua hiˈopoa oia e rave rau haapaoraa, aita râ oia i mauruuru. Na roto i te taioraa i te tahi mau tuhaa o te Bibilia, ua haapii oia i te mau raveraa a te Atua i nia i te mau taata mai ia Noa, Aberahama, Sara, e ia Mose. Ua turaihia o Albert ia haafatata ˈtu i te Atua o te Bibilia. Tera râ, e papu anei ia ˈna e te vai mau ra te Atua?
I te hoê po, ua haere atura o Albert na nia i to ˈna pereoo i te hoê vahi moemoe i reira to ˈna pureraa, “E te Atua e, a horoa mai na i te hoê tapao—te mau huru mea atoa no te haapapu e te vai mau ra oe.” Ua tiai e ua tiai â o Albert. Te haamanaˈo ra oia e aita e ohipa i tupu, ua “faatupu [to ˈna tiairaa] i te inoino, te manaˈo faufaa ore, te riri atoa.”
Mai ia Albert, e rave rahi o te manaˈo nei e ua imi ratou i te Atua ma te faufaa ore. Ua haafeaahia paha ratou e te mau aˈoraa a te mau ekalesiatiko aore ra ua inoino ratou i te haerea tapihoo a te feia poro evanelia i roto i te tele. No to ratou hitimahuta i te haavare rahi i rotopu e rave rahi o to ratou taata-tupu faahua Kerisetiano, aita vetahi e taa faahou ra e eaha mau na te tiaturi. Tera râ, ua haapapu te Arii no Iseraela i tahito ra, o Davida, i ta ˈna tamaiti ra o Solomona e: “Ia imi oe [i te Atua] ra, e itea ˈtu oia e oe.”—Paraleipomeno 1, 28:9.
No reira, nafea te Atua ia faaite mai ia ˈna? E tia anei ia outou ia tiai i te hoê tapao—te tahi tupuraa hau aˈe i te natura, o te haapapu mai ia outou e te vai mau ra te Atua? Ia au i te hoê titorotororaa apî i tapaohia i roto i te vea ra Time, hau atu i te piti Marite i nia i te toru o te tiaturi ra i te mau semeio. Ua tapao atoa te tumu parau e “o te mau amuiraa Charismatique e Penetekose, te mau ekalesia maraa oioi roa ˈˈe i Marite, e te taaihia ra ta ratou haamoriraa i ‘te mau tapao e te mau semeio.’”
Te titau-mau-hia ra anei “te mau tapao e te mau semeio” no te tiaturi atu i te Atua? Ua faaohipa na oia i te mau semeio i mutaa ihora. Ei hiˈoraa: Ua farerei o Saulo no Tareso, o tei hamani ino na i te mau pǐpǐ a te Tamaiti a te Atua, o Iesu Mesia, i te hoê ohipa maere roa i nia i te purumu mai Ierusalema mai i Damaseko. Na teie farereiraa semeio e o Iesu i faatiahia mai, i turai ia Saulo ia taui oia. (Ohipa 9:1-22) Ua riro mai te hoê taata hamani ino tahito ei aposetolo o Paulo te iˈoa—te hoê o te mau taata faufaa roa ˈˈe tei turu i te Kerisetianoraa!
Teie râ, te faatupu noa ra anei te mau semeio i teie huru faahopearaa oaoa? Ua niuhia anei te faaroo mau i te Atua, i nia i te fanaˈoraa i te tahi tupuraa semeio?
[Hohoˈa i te api 3]
Ua paraparau semeio te Tamaiti a te Atua ia Saulo no Tareso. E tia anei ia outou ia tiai i te hoê semeio?