Mau uiraa a te feia taio

Ua parau Te Pare Tiairaa o te 15 no Atete 1996 e: “I te tuhaa hopea o te ati rahi, e ora te ‘taata’ i horo i te paeau o Iehova.” Te auraa anei ïa, e i muri aˈe i te tuhaa matamua o te ati rahi, e rave rahi feia apî o te haere tia ˈtu i te paeau o te Atua?

E ere te reira te manaˈo e horoahia ra.

E tupu na mua te mau parau a Iesu i roto i te Mataio 24:22, i te tau a muri aˈe, na roto i te hoê faaoraraa i roto i te tuhaa matamua o te ati rahi i mua nei, oia hoi te haamouraa o te mau haapaoraa. Ua na ô te tumu parau e: “A haamanaˈo na e ua ora aˈena te ‘taata,’ to te toea o te feia faatavaihia e to te ‘feia rahi roa,’ i te taime e topa ˈi o Babulonia Rahi ma te oioi e ma te taatoa, i roto i te tuhaa matamua o te ati rahi.”

Eita teie feia haapao maitai e fifihia, ia ohipa mai o Iesu e ta ˈna nuu i nia i te raˈi i te tuhaa hopea o te ati. Tera râ, o vai te ora mai i taua tuhaa ra o te ati? Te faaite ra te Apokalupo 7:9, 14 e o te hoê ïa nahoa rahi, e tiaturi ra e ora i nia i te fenua nei. E te mau Kerisetiano faatavaihia i te varua? Ua faahiti te “Mau uiraa a te feia taio” i roto i Te Pare Tiairaa o te 15 no Atete 1990 (Farani), e no te aha eita e tia ia tatou ia faaetaeta i nia i te taime e haere ai te toea faatavaihia i nia i te raˈi. No reira, aita te tumu parau apî (15 no Atete 1996) i haapapu roa i te tumu parau, ma te parau noa e: “Oia atoa, i te tuhaa hopea o te ati rahi, e ora te ‘taata’ i horo i te paeau o Iehova.”

A tapao na i te mau parau a Iesu i roto i te Mataio 24:29-31, no te ite e e nehenehe anei ta te feia apî atoa e haapii i te parau mau e e haere tia ˈtu i te paeau o te Atua i muri aˈe te ati rahi e haamata ˈi. I muri aˈe i te haamataraa o te ati, e fa mai te tapao a te Tamaiti a te taata. Ua parau o Iesu e e oto te mau fetii atoa o te fenua nei. Aita roa ˈtu oia i parau e e taa i te taata i te auraa o te huru tupuraa, e tatarahapa ratou, e haere ratou i te paeau o te Atua, e e riro mai ratou ei mau pǐpǐ mau.

Oia atoa, i roto i te parabole o te mamoe e te puaaniho, e fa mai te Tamaiti a te taata, e ma te haava e faataa oia i te mau taata ia au i te mau mea o ta ratou i rave aore ra i ore i rave i mutaa iho. Aita roa ˈtu o Iesu i parau e e taui taue noa te feia, i faaite noa na i te mau huru e au i to te puaaniho, e e riro mai ratou ei mamoe. E haava oia i te mau taata ia au i to ratou huru i mutaa iho.—Mataio 25:31-46.

Teie râ, i roto i teie hiˈoraa, aita e faufaa ia faaetaeta tatou i nia i teie manaˈo. Ua ite te nunaa a te Atua, te toea e te feia rahi roa, e eaha te tia ia ratou ia rave i teie nei—ia poro e ia faariro i te taata ei pǐpǐ. (Mataio 28:19, 20; Mareko 13:10) Teie mau â te tau no tatou ia haafaufaa i teie aˈoraa: “E teie nei te aˈo atoa ˈtu nei matou, te rave ohipa amui nei, ia outou, e eiaha outou e farii faufaa ore noa i te aroha mau o te Atua ra; te parau ra hoi oia e, Ua faaroo vau ia oe i te anotau au ra, e ua turu atu vau ia oe i te mahana faaoraraa ra: e inaha, teie taua anotau au ra; inaha, teie taua mahana faaoraraa ra.”—Korinetia 2, 6:1, 2.