Mau uiraa a te feia taio

Ia au i te tahi mau parau apî, ia fanauhia mai te hoê aiû, e faaherehere te tahi mau fare maˈi i te pufenua e te taura pito, no te rave mai i te tahi mau mea no roto mai i te toto o teie mau taoˈa. E tia anei i te hoê Kerisetiano ia haapeapea no teie ohipa?

I roto i te rahiraa o te mau fare maˈi, aita teie huru ohipa e ravehia nei, no reira, aita e faufaa ia haapeapea te mau Kerisetiano. Mai te peu e te manaˈohia ra e te rave-mau-hia ra teie nei peu i roto i te fare maˈi i reira te hoê vahine kerisetiano e fanau ai, e tano ïa ia ani noa ˈtu i te taote ia faaruehia te pufenua e te taura pito, e ia ore roa ˈtu ia faaohipahia.

E rave rau taoˈa rapaauraa, no roto mai ïa i te tahi mau taoˈa o te tino, to te animala anei aore ra to te taata. Ei hiˈoraa, no roto mai vetahi mau oromona i te omaha o te mau puaarehenua hapû. Ua faaohipahia na te toto puaarehenua no te hamani i te terumu rapaau i te maˈi tétanos, e mea maoro te hutiraahia na te taoˈa gamma-globuline no te aro i te maˈi, no roto mai i te toto o te pufenua o te vahine. E haaputu na vetahi mau fare maˈi i te mau pufenua a faatoetoe atu ai, e i muri iho, e tiihia mai na na te hoê vahi hamaniraa raau ia nehenehe te toto tei î i te mau taoˈa e aro i te maˈi e ravehia ia noaa mai te taoˈa gamma-globuline.

I teie noa iho nei, ua faatiatia te feia maimi e ua manuïa ratou i te faaohipa i te toto no roto mai i te pufenua, no te rapaau i te tahi huru maˈi leucémie, e ua manaˈohia e e nehenehe teie huru toto e faaohipahia no te rapaau i te mau maˈi o te ravea parururaa o te tino, aore ra no te mono i te mau tauiraa puo ivi. No reira, ua faahiti-rahi-hia te parau o te mau metua o tei ani e ia iritihia te toto no roto mai i te pufenua, ia faatoetoehia, e ia faahereherehia, ia hinaaro-noa-hia ˈtu no te rapaau i ta ratou tamarii i te mau matahiti a muri aˈe.

E ere roa ˈtu teie huru faaohiparaa i te toto o te pufenua i te ravea tano no te mau Kerisetiano mau, o te faatu nei i to ratou manaˈo ia au i te ture tia a te Atua. E taoˈa moˈa te toto no to tatou Poiete, te faataipe ra hoi i te ora no ǒ mai i te Atua ra. Hoê anaˈe faaohiparaa i te toto i faatiahia e ana, i nia ïa i te fata, ia rave-anaˈe-hia te mau tusia. (Levitiko 17:10-12; a faaau e te Roma 3:25; 5:8; Ephesia 1:7.) Taa ê atu i te reira, te toto no roto mai i te hoê mea ora, e tia ïa ia faatahehia i raro i te repo, oia hoi ia faaruehia.—Levitiko 17:13; Deuteronomi 12:15, 16.

Ia aˈuaˈu anaˈe te mau Kerisetiano i te hoê animala aore ra ia tupai ratou i te hoê moa aore ra te hoê puaa, e faatahe e e faarue ratou i te toto. Eita e titauhia ia manii roa ˈtu ratou i nia i te repo, no te mea te vahi faufaa, ia faarue ïa ratou i te toto, eiaha râ ratou ia faaohipa noa ˈˈe.

Ua papu i te mau Kerisetiano o tei tapeahia i te fare maˈi e, te faaruehia nei te mau taoˈa no roto mai i to ratou tino, mai te tutae e te omaha anei, te mau vaehaa i maˈihia, aore ra te toto. Parau mau, peneiaˈe e hinaaro te hoê taote e rave na mua i te tahi mau hiˈopoaraa, mai te hiˈopoaraa omaha, te hiˈopoaraa ahiri e ua maˈihia anei te hoê puu, aore ra te hiˈopoaraa toto. I muri iho râ, e faaruehia teie mau taoˈa ia au i te ture o te fenua. Eita hoi e titauhia e ia ani taa ê te taata maˈi ia na reira-mau-hia, no te mea e tano iho â ia faaruehia teie mau taoˈa, e mea papu aˈe atoa i te pae rapaauraa. Mai te peu e te feaa ra te hoê taata maˈi e te na reira-mau-hia ra, e nehenehe ïa oia e faahiti atu i teie parau i te taote ma te haapapu e, no te tahi mau tumu i te pae faaroo, te hinaaro nei oia e ia faaruehia teie mau taoˈa atoa.

Teie râ, mai tei faahitihia ˈtu nei, e mea varavara roa ia titauhia te rahiraa o te feia maˈi ia haapeapea, no te mea i roto e rave rahi fare maˈi, aita teie huru faaherehereraa e te faaohipa-faahou-raa i te pufenua aore ra i te tahi atu taoˈa o te tino, e ferurihia nei, e e ere atoa i te peu matauhia.

E au ra e ua tuu te tumu parau ra “Ia riaria anaˈe tatou i te ino,” i vauvauhia i roto i “Te Pare Tiairaa” o te 1 no Tenuare 1997, i te tapao i nia i te peu faahinaaro i te tamarii. Eaha mau na teie peu?

Te faataa ra te hoê titionare (Webster’s Ninth New Collegiate Dictionary) i te “peu faahinaaro i te tamarii” mai te “taatiraa faufau, i reira, o te tamarii te taoˈa au-roa ˈˈe-hia no te taatiraa.” Ua faahapahia vetahi o teie mau peu i roto i te Deuteronomi 23:17, 18. I reira, te faahapa ra te Atua i te riroraa ei faaturi i te hiero (“aore ra, ei tamaroa i faahereherehia no te raveraa i vetahi mau taatiraa faufau,” nota i raro i te api, MN). Te opani atoa ra teie mau irava e ia hopoihia mai i roto i ‘te fare o Iehova’ te hoo o “te urî” (“peneiaˈe e tane e taati i te tamarii; e tane e taati na roto i te ohure, e te hoê tamaroa iho â râ,” nota i raro i te api, MN). Te haapapu maitai ra teie mau faahororaa no roto mai i te mau Papai e te tahi titionare e, te parau i tuatapapahia i roto i Te Pare Tiairaa, no nia ïa i te hoê tamarii i hamani-ino-hia i te pae taatiraa, e oia atoa i mirimirihia, e te hoê taata paari.