O vai te faahapahia no te tamaˈi?
O TE Atua anei te faahapahia no te mau tamaˈi e faatupuhia e te taata nei? “Eita, eita te Atua e hinaaro i te tamaˈi.” Mea na reira to Martin Niemöller, te hoê orometua Porotetani Helemani matau-maitai-hia, pahonoraa ˈtu i teie uiraa i muri noa i te hopearaa o te Piti o te Tamaˈi Rahi. Ua neneihia to ˈna mau manaˈo i te matahiti 1946 i roto i te hoê buka oia hoi Ach Gott vom Himmel sieh darein—Sechs Predigten (E te Atua, a hiˈo mai na oe mai te raˈi mai—E ono aˈoraa).a Te na ô ra teie buka e:
“Te taata e hinaaro ra e faahapa i te Atua no te [mau tamaˈi], aita ïa o ˈna i ite aore ra e hinaaro ra e ite i te Parau a te Atua. Parau mau, e tupuraa ê mai te peu e o tatou te mau Kerisetiano te faahapa-rahi-hia ra aore ra aita no te mau tamaˈi hopea ore. E eita ta tatou e nehenehe e ape ohie noa i teie nei tupuraa. . . . E nehenehe atoa e faahaamanaˈohia ma te tano roa e ua horoa pinepine te mau ekalesia kerisetiano, i te roaraa o te mau anotau, ia ratou iho no te haamaitai i te mau tamaˈi, te mau nuu, e te mau mauhaa tamaˈi e ua pure ratou ma te ore roa ˈtu e tia i te haerea kerisetiano no te haamouraa o to ratou mau enemi i roto i te tamaˈi. Na tatou e na to tatou mau tupuna te hape atoa, e ere roa ˈtu râ o te Atua te tia ia faahapahia. E te haama nei tatou te mau Kerisetiano no teie mahana i mua i te hoê pǔpǔ tei piihia te Feia Haapii Bibilia Haapao maitai [te mau Ite no Iehova], e mau hanere e e mau tausani tei afaihia i roto i te mau aua tapearaa e tei pohe [roa] no te mea aita ratou i rave i te tau faehau e ua patoi ratou i te haapohe i te mau taata.”
I teie mahana, tau 50 matahiti i muri aˈe i te Piti o te Tamaˈi Rahi, te horoa nei te mau parau a Martin Niemöller i te feia e here ra i te hau i te tahi mau manaˈo e au ia feruri-maitai-hia. Eita, e ere o te Atua te faahapahia no te haamaniiraa toto o te mau nunaa! Inaha hoi, na roto i ta ˈna mau taata haamori mau, o te ore e faaô nei i roto i te mau aroraa o teie ao, te faaite nei te Atua e te fatata maira te hopea o te mau tamaˈi atoa.—Salamo 46:9; Ioane 17:16.
[Nota i raro i te api]
a I muri iho te neneiraahia te mau aˈoraa a Martin Niemöller na roto i te reo Beretane i roto i te buka ra Te faahapa e te tiaturiraa. Teie râ, mea taa ê te tatararaa Beretane i te papai Helemani tumu, no reira ïa teie faaiteraa parau i huri-roa-hia ˈi mai roto mai i te reo Helemani.
[Faaiteraa i te fatu o te hohoˈa i te api 32]
USAF photo