“Teihea roa ta outou fare pure?”

TEIE te uiraa e ui-pinepine-hia ra i te mau Ite no Iehova no Mozambique. Ma te haavare ore, mea fifi ia pahono i tera uiraa aita i maoro roa ˈˈenei. No te mea aita te mau Ite no Iehova i fariihia i mua i te ture i roto i taua fenua ra e tae noa ˈtu i te matahiti 1991. Aita ïa i nehenehe e faanaho i te tahi mau vahi taa maitai e te papu no te haamoriraa.

Tera râ, ua taui taua huru tupuraa ra i te 19 no Febuare 1994. I taua mahana maitai e te veavea ra, ua avarihia na Piha matamua e piti no te Basileia i hamanihia aˈenei i Mozambique. E 602 taata tei haere mai i te avariraa o teie mau vahi maitatai roa no te putuputuraa i te oire tapaeraa pahi no Beira, fatata i te afaraa o Mozambique na te pae miti. E haamâha te reira i te mau hinaaro o na amuiraa e toru i taua oire ra.

Hoê matahiti e e piti avaˈe te maoro te raveraahia te paturaa taatoa ma te rohi, mai te haamauraa i te niu e tae noa ˈtu i te faaoti-roa-raa i te mau fare. E pinepine e 30 rima tauturu aore ra hau atu no Zimbabwe mai, te oire tapiri mai, tei haere mai e tei rohi amui e te mau Ite no reira. I te mea e eita ratou e ô pauroa i roto i te fare mitionare i Beira, i reira hoi e faanahohia ˈi te mau ohipa, ua puhapa vetahi ati aˈe te fare i te mau hopea hebedoma e i te tahi mau taime, i te roaraa o te mau hebedoma.

To nia te vahi o te Piha no te Basileia no te mau Amuiraa no Massamba e no Munhava i te purumu rahi no Beira. Ua parau te hoê mitionare e: “I te hoê mahana ohipa roa, ia rave-vitiviti-hia te ohipa e ia ite-maitai-hia e te haere maira te paturaa i mua, e ite matou i te mau pereoo ia fatata roa i te û no te mea e hiˈo noa mai te feia faahoro i te Piha no te Basileia, eita e hiˈo faahou i mua.” E rave rahi tei tapea roa i to ratou pereoo no te mataitai i te ohipa, e ua maere iho â ratou i te mau nunaa huru rau e ohipa amui ra.

Ua titau-rahi-hia te faaineineraa e te faanahonahoraa. Taa ê atu i te tahi atu mau paturaa e rave rahi i roto i teie tuhaa o te ao nei, mea varavara roa te mau tauihaa materia e te mau faufaa i reira, aita roa ˈtu te hamaniraa i te mau Piha no te Basileia i mau no te ereraahia i te tahi mau tauihaa. I te hoê taime, ua hinaarohia e 800 pute tima, e te vahi noa e nehenehe e horoa mai, aita ïa e pute hinaarohia no te farii i te tima. Ua ani atura te mau taeae i te amaa a te Taiete Watch Tower i te oire pu no Maputo; ua haponohia te mau pute na nia i te manureva, ua afaihia i te fare hamaniraa tima, e ua faaîhia te mau pute. Aita te ohipa i faaea.

I te tahi atu taime, i te tamauraahia te mau ahô fare, aita e pou auri faahou ta te pǔpǔ rave ohipa. No te mea e mea varavara roa, ua haponohia mai te auri no te paturaa e 600 kilometera mai te atearaa! Ua paraparau atu te hoê o te pǔpǔ rave ohipa i te hoê taata e mataitai noa ra e ua ani e ua ite anei o ˈna e ihea e itehia mai ai ia ratou i te auri no te faaoti i te ohipa. Ua pahono atura te taata e: “Ua hau atu i te hoê hora i teie nei to ˈu tia-noa-raa i ǒ nei, e e tupuraa opuahia hoi teie e au. Eita ta ˈu e nehenehe e eiaha e haapopou i ta outou ohipa e rave ra e te huru feruriraa o teie paturaa. Te vai ra ta ˈu te auri ta outou e hinaaro ra, e e oaoa vau i te pûpû atu na outou ei ô.” Ua riro te reira ei faanahoraa tano roa ˈˈe.

E rave rahi feia mataitai tei uiui e eaha te taiete paturaa rahi e haapao ra i te ohipa. Parau mau, ua oaoa roa te pǔpǔ rave ohipa i te parau atu ia ratou e o teie mau Ite no Iehova o te pûpû nei i ta ratou tauturu. Na te aha iho â râ i haamaere i te feia mataitai? “E feia tahoê outou,” o ta te hoê ïa i parau. “Noa ˈtu e ua rau te nunaa, te ohipa amui nei outou mai te mau taeae.” Te faahopearaa, e rave rahi tei haere mai e ani i te haapiiraa Bibilia. Ua ohipa atoa te reira i nia i te mau putuputuraa. Ei hiˈoraa, te faito au noa o te feia e haere ra i te putuputuraa o te Amuiraa no Manga, ua hau atu ïa i te tataipiti i te numera o te mau Ite.

Ua riro mau te mau Piha no te Basileia ei haamaitairaa rahi no te mau Ite no reira. Ua putuputu na te rahiraa na mua ˈˈe i roto i te mau fare nahonaho ore, ma te tafare aihere aore ra maa punu i nia mai, i roto i te hoê aua i muri mai i te fare, aore ra i roto i te hoê piha nainai o te fare o te tahi taata. E pinepine ratou i te rari ia ûa anaˈe; ua haere noa râ ratou i te mau putuputuraa ma te haapao maitai. Tau ahuru matahiti te maoro, teie anaˈe te “mau Piha no te Basileia” a te mau Ite no Mozambique. Ua parau o Taeae Caetano Gabriel, te hoê matahiapo i roto i te Amuiraa no Massamba e: “Te haamauruuru nei tatou i to tatou mau taeae na te ao nei o tei turu mai i te manuïaraa o teie paturaa.” Ua haamanaˈo te hoê taurearea Ite e: “I to matou faaearaa i Carico (i roto i te “mau aua haapii-faahou-raa” i reira te mau Ite no Iehova i te tapearaahia te tahi 12 matahiti te maoro), ua parau noa na matou e, ‘E faaitoito noa matou ma te taiva ore, e e haamaitai mai o Iehova ia tatou.’ O te Piha no te Basileia apî te haamaitairaa no ǒ mai ia Iehova ra.” Ua faaite ta ratou mau parau i to ratou mauruuru hohonu e ta ratou opuaraa e arue ia Iehova.

E rave rahi taurearea, o tei apiti mai i roto i te paturaa, tei faaitoitohia e te feruriraa pionie e i muri iho, ua rave ratou i te taviniraa pionie tamau. Ua parau te potii ra o Isabel, te hoê pionie tamau i roto i te Amuiraa no Manga, a ite ai oia e mea mâ roa te Piha no te Basileia i te mahana na mua ˈˈe to ˈna avariraa, e: “No ˈu nei, teie te vahi nehenehe roa ˈˈe i te oire no Beira. Te oaoa rahi nei au i te taeraa mai i ǒ nei.” Ua faataa o Adão Costa, te hoê mitionare, e ua turu rahi atoa mai te mau mana faatere no reira, na roto i te faatiaraa i te mau ravea haponoraa tauihaa taa ê no te mea ua ite ratou e e haerea parau-tia to te mau Ite. Ua na ô oia i muri iho e: “Noa ˈtu e ua rohirohi roa matou, ua oaoa râ matou i te iteraa i te mau faahopearaa o teie ohipa taatoa no te faateitei e no te faahanahana ia Iehova.”

I teie nei, ia ani noa mai te tahi taata maitai no te oire no Beira e, “Teihea roa ta outou fare pure?” e faaite atu ïa te mau Ite i te hoê o na Piha no te Basileia apî e piti e e pahono atu mai teie e, “To nia ïa i te Purumu Rahi, Avenida Acordo de Lusaka, i mua noa i te Maharaa o te Fare Mutoi.” Ma te faaafaro i muri iho e, “Tera noa râ, e ere i te hoê fare pure. E Piha no te Basileia râ!”

[Hohoˈa fenua/Hohoˈa i te api 20]

(Hiˈo i te papai)

AFIRIKA

Mozambique

Beira

Maputo

[Faaiteraa i te tumu]

Map: Mountain High Maps® Copyright © 1995 Digital Wisdom, Inc.