O vai ma te riro ei taata poro Evanelia?
I TE hoê rururaa a te Apooraa a te mau Ekalesia o te ao nei tau 40 matahiti i teie nei, ua faaitoitohia te mau melo ia “tupu i roto i te hoê feruriraa poro evanelia” e ia haapii i ta ratou mau nǎnǎ “ia haere e poro i te evanelia.” E pae matahiti i muri iho, ua papai te ekalesiatiko Katolika ra o John A. O’Brien no nia i te hinaaro i te afai mai i te mau pǐpǐ apî “na roto i te haere-roa-raa ˈtu ia ratou ra” e eiaha noa “na roto i te parahiraa i roto i to tatou mau fare.” E i te avaˈe Tenuare 1994, ua parau te Pâpa Ioane Paulo II e e “ere te taime no te haama i te Evanelia, e taime râ teie no te poro i te reira mai nia mai i te mau tapoˈi fare.”
E au ra e aita teie mau piiraa tuutuu no te mau taata poro evanelia i faaroohia. Te faatia ra te hoê tumu parau i roto i te vea Auteralia ra Illawarra Mercury e: “Eita te mau Katolika tiaraa teitei no te pae Apatoa no Auteralia e hinaaro i te farii i te huru raveraa a te mau Ite no Iehova no to ratou faaroo.” Ua parau te hoê taata e “e ere” noa te pororaa evanelia “i te hoê tuhaa o te huru feruriraa Katolika.” Ua feruri te tahi e: “E mea maitai no te Ekalesia ia faahaere ia ˈna iho i mua, eiaha râ na roto i te patotoraa ˈtu i te mau opani. E mea maitai aˈe paha na roto i te mau fare haapiiraa aore ra na roto i te haaponoraa ˈtu i te mau rata.” Aita atoa te tavana perepitero no te hoê fare pure o taua vahi ra i papu maitai e nafea ia tatara i te mau manaˈo a te pâpa. “Te faaitoito nei matou i te mau taata ia ora i te Evanelia o ta ratou i ite na roto i to ratou iho oraraa,” o ta ˈna ïa i parau. “Oia hoi noa ˈtu e ravea ê te patotoraa i te opani.” Te faaite maitai nei te upoo parau a te vea i te reira: “Eita te mau Katolika e pee i te piiraa o te Pâpa e poro.”
Noa ˈtu te manuïa-ore-raa a te Amuiraa faaroo kerisetiano i te pororaa i te evanelia, te pee ra hau atu i te pae mirioni mau Ite no Iehova i te faaueraa a Iesu e “haere . . . e e faariro i te mau fenua atoa ei pǐpǐ.” (Mataio 28:19, 20; a faaau e te Ohipa 5:42.) I teie nei, te ravehia nei ta ratou pororaa i tera e i tera fare i roto hau atu i te 230 fenua. Te poroi o ta ratou e afai ra o te hoê ïa poroi faaitoito, o te haamatara ra i te mau parau tǎpǔ faahiahia a te Bibilia no te tau a muri aˈe. No te aha e ore ai e paraparau e o ratou i te taime i mua nei ia pii anaˈe mai ratou?