“Ua pahono Iehova i ta ˈu mau pure!”
ATI aˈe te ao nei, te faatere nei te mau Ite no Iehova fatata e pae mirioni haapiiraa Bibilia i te fare o te mau taata o tei anaanatae i te noaaraa mai i te ite papu no nia i te Atua e ta ˈna opuaraa faahiahia no te huitaata nei. Te apiti atoa ra te mau tamarii i rotopu i te mau Ite no Iehova i roto i teie ohipa. A rave na i te hiˈoraa o te hoê tamaroa o Joel te iˈoa. Ua pûpû oia ia ˈna no Iehova e ua bapetizohia oia i te ivaraa o to ˈna matahiti. Hoê matahiti i muri iho, e ohipa ta ˈna i farerei:
“I roto i te taviniraa, ua farerei au i te hoê vahine o Candy te iˈoa. Ua pûpû atu vau ia ˈna te vea ra ‘Inaha, te faaapî nei au i te mau mea atoa nei.’ Ua roaa aˈena ta ˈna, ua pûpû atura vau ia ˈna te buka ra E nehenehe oe e ora e a muri noa ˈtu i roto i te paradaiso i nia i te fenua nei. Ua roaa aˈena atoa ta ˈna. I muri iho ua manaˈo vau e, ‘E pûpû vau i taua vahine ra i te hoê haapiiraa Bibilia.’ Ua farii oia!
“Ua haere mai te tuahine o Candy, o tei pohehia hoi i te mariri ai taata, e ora i pihai iho ia ˈna. Hau atu, te haapii ra Candy no te riro ei vahine utuutu maˈi. No reira ua faaea ˈtura te haapiiraa Bibilia no te hoê area taime. Teie râ, ua atuatu to ˈu mau metua e o vau i te taairaa e o ˈna ma te vaiihoraa ˈtu ia ˈna i te mau vea aore ra i ta ˈna ra tane o Dick. Ua parau mai oia ia matou e ua vaiiho o ˈna i te mau vea i pihai iho i to ˈna roi e e taio o ˈna i te po.
“I te pae hopea, ua pohe te tuahine o Candy. Ua paraparau to ˈu Papa e to ˈu Mama e o vau ia Candy no nia i te huru o te feia pohe. Ua faaoti oia i te haamata faahou i ta ˈna haapiiraa Bibilia. I te tahi atu mahana ê, ua ani matou ia Dick e e hinaaro anei o ˈna e haapii na muri iho ia Candy e ia riro te reira ei haapiiraa utuafare. Ua feruri oia e e manaˈo maitai te reira. E i teie nei, na muri i to ˈu Papa, te haapii ra vau e o Dick raua Candy. Te haere maitai nei raua i mua e te faaite nei i to raua mauruuru no te haapiiraa Bibilia.
“Ua pure au no te hoê haapiiraa Bibilia, e ua pahono Iehova i ta ˈu mau pure!”