Te turu nei te aai o te Diluvi i te aamu a te Bibilia

E AAMU mau te Diluvi rahi i tupu i te tau o Noa. Te vai ra te mau faatiaraa o te aamu i roto i te aai a te mau nunaa taa ê e rave rahi ati aˈe te ao nei. I roto i te fenua Afirika no Tchad, te faataa nei te opu taata Moussaye i te Diluvi mai teie:

‘I te hoê taime, i te hoê vahi atea, te ora ra te hoê utuafare. I te hoê mahana, ua hinaaro ihora te metua vahine o teie utuafare e faaineine i te hoê maa au roa na to ˈna utuafare. Ua rave ihora oia i te hoê farii e te hoê penu no te pâpâhia i te huero millet ei faraoa ota. I taua tau ra, e mea piri roa ˈˈe mai te raˈi i teie nei. Inaha, ia amo outou i to outou rima i nia, e nehenehe ta outou e tapea atu. Ua pâpâhia aˈera oia i te huero ma to ˈna puai atoa, e ua riro oioi mai te huero millet ei faraoa ota. I to ˈna râ pâpâhiaraa, ua amo te vahine i te penu i nia roa ma te ore e haapao, e puta ihora te raˈi ia ˈna! Ua haamata oioi atura te pape pue i te manii mai i nia i te fenua nei. E ere i te hoê ûa matauhia. Ua ûahia e hitu mahana e e hitu rui e tae noa ˈtu i te îraa te fenua taatoa i te pape. I te toparaa mai te ûa, ua haamata ˈtura te raˈi i te maraa e tae noa ˈtu i te vahi to reira oia i teie nei—i nia roa. Auê ïa ati no te huitaata nei! Mai reira mai, ua erehia tatou i te haamaitairaa taa ê e tapea i te raˈi e to tatou rima.’

Te vahi anaanatae, te itehia ra te mau faatiaraa tahito no nia i te hoê diluvi rahi ati aˈe te ao nei. E mau aamu ta te mau nunaa tumu no Marite e te feia no Auteralia no nia i te reira. Mea taa ê te mau faataaraa, tera râ, te vai ra i roto i te rahiraa o te mau aamu te manaˈo e ua poˈi na te fenua i te pape e te tahi noa feia tei ora mai i roto i te hoê pahi hamanihia e te taata. Te turu faahou nei teie tumu parau tei parare i te mea e ua tupu te hoê Diluvi i nia i te fenua taatoa, mai tei faatiahia i roto i te Bibilia.—Genese 7:11-20.