Te tuatapapa nei te mau taote aravihi i te mau ravea monoraa i te toto
TAU 200 taote aravihi no te mau Hau Amui no Marite taatoa tei putuputu i Cleveland, i te hau no Ohio, i te Mahana maa 7 no Atopa 1995 no te tuatapapa i te hoê tumu parau faufaa roa no te toroa rapaauraa: te rapaauraa e te tâpûraa ma te ore e faaohipa i te toto.
E rave rau tupuraa atâta tei tuatapapahia. Ei hiˈoraa, eaha ïa ahiri e e paruparu roa te toto o te taata maˈi? Nafea ia rapaau i te hoê aiû aita i taeahia te avaˈe ma te ore e faaohipa i te toto? E manuïa anei ia tâpû i nia i te mafatu ma te ore e faaohipa i te pâmuraa toto? Te vahi anaanatae oia hoi ua rave-aˈena-hia te mau tâpûraa ma te ore e faaohipa i te toto—mea pinepine ma te faaohipa i te mau ravea o te tauturu i te tino ia hamani faahou i to ˈna iho toto—i roto i teie mau huru tupuraa atoa e ua noaa mai te mau faahopearaa maitatai.a
No te aha e hinaarohia ˈi te mau ravea monoraa i te pâmuraa toto? “Ua haapii mai matou e te haaparare nei te mau pâmuraa toto i te mau maˈi, te maˈi upaa (hépatite) iho â râ,” o ta Sharon Vernon ïa e faaite ra, oia te raatira o te Pu no te Rapaauraa e te Tâpûraa ma te ore e faaohipa i te Toto i te Fare maˈi St. Vincent Charity i Cleveland. Te na ô râ oia e: “E noa ˈtu e eita te toto e haaparare i te maˈi, e nehenehe te reira e haaparuparu i te ravea paruru o te tino o te taata maˈi.” Noa ˈtu e ua iti mai te parareraa o te maˈi SIDA auaa te mau ravea titiaraa i te toto, e rave rahi â mau maˈi te ore e itehia na roto i teie mau ravea. E noa ˈtu e mea rahi aˈe te faaineineraa i titauhia, mea mâmâ aˈe te tâpûraa ma te faaohipa ore i te toto no te mau fare maˈi, inaha e faaore teie huru raveraa i te mau fifi i te pae haavaraa e noaa mai ia pâmuhia te feia maˈi i te toto viivii.
E tumu faufaa roa ˈtu â no reira te mau Ite no Iehova e haapae ai i te toto: te opani ra te ture a te Atua i te reira. (Ohipa 15:29) Teie râ, te hinaaro atoa nei ratou e fanaˈo i te rapaauraa maitai roa ˈˈe. No reira, ua tahoê ratou e te mau taote e faahaere nei i te mau maimiraa i mua no nia i te mau ravea rapaauraa faaohipa ore i te toto. E ere noa te mau Ite no Iehova o te fanaˈo i teie mau rapaauraa, o te feia ê atu atoa râ e rave rahi e tapitapi nei no te atâtaraa o te mau pâmuraa toto.
[Nota i raro i te api]
a A hiˈo i te A ara mai na! o te 22 no novema 1993, mau api 24-7, e o te 22 no tenuare 1996, api 31 (farani).
[Faaiteraa i te fatu o te hohoˈa i te api 32]
WHO photo by P. Almasy