Mau uiraa a te feia taio

Tau matahiti i teie nei te faaite ra te mau tabula e ua maraa rii mai te numera o te feia i rave i te mau taoˈa taipe i te oroa Haamanaˈoraa. Te faaite ra anei te reira e te faatavaihia ra e te varua moˈa e rave rahi feia apî?

Te vai ra te mau tumu papu no te tiaturi e ua naeahia te numera o te mau 144 000 Kerisetiano faatavaihia tau ahuru matahiti i teie nei.

I roto i te Ohipa 2:1-4, te taio ra tatou no nia i te feia matamua no teie pǔpǔ taotiahia: “E tae mau atura i te mahana Penetekose, ua tairuru maite aˈera ratou atoa i te vahi hoê ma te hinaaro hoê. E aore i mahia, o te haruru maira no nia mai i te raˈi mai te mataˈi rahi uˈana ra, i roa aˈera te fare i parahihia e ratou ra. Ua fa maira te arero maa ia ratou ra mai te ahi ra te huru, e faaea ihora i nia iho ia ratou atoa ra, e î aˈera ratou atoa i te [v]arua [moˈa], e ua parau ihora i te parau ěê, i ta te [v]arua i horoa mai i te parau ia ratou ra.”

I muri aˈe, ua maiti Iehova i te tahi pae, e ua faatavai oia ia ratou e to ˈna varua moˈa. Ua amuihia mai tau tausani feia i te mau matahiti matamua mai â o te Kerisetianoraa. I te oroa Haamanaˈoraa i to tatou nei tau, e huti pinepine te taeae orero i te ara-maite-raa i nia i te mau parau a te aposetolo Paulo i te Roma 8:15-17, o te faahiti ra e e “noaa” i te feia faatavaihia “te [v]arua faatamarii.” Te parau faahou ra o Paulo e o te varua moˈa tei noaa ia ratou o ‘te faaite e to ratou varua e, e tamarii ratou na te Atua, e e feia tufaa ratou e te Mesia.’ Ua ite papu te feia i faatavai-mau-hia e te varua i te reira. E ere te reira i te hoê noa mea e hinaarohia aore ra te hoê faaiteraa o te hoê manaˈo putapû e te tano ore no nia ia ratou iho.

Te taa ra ïa ia tatou e ua tamau noa â teie piiraa no te haere i nia i te raˈi i te roaraa o te mau senekele, i roto râ i te mau tau tei pii-atoa-hia te mau Tau Pouri, ua iti roa mai te numera o te feia faatavaihia, i te tahi paha mau taime.a Maoti te haamau-faahou-raa o te Kerisetianoraa mau fatata i te hopea o te senekele i mairi aˈenei, ua piihia e ua maitihia e rave rahi atu â. Teie râ, e au ra e i roto i te afaraa o te mau matahiti 1930 ua naeahia ïa te numera taatoa o te mau 144 000. I reira râ ua haamata i te iteahia mai te hoê pǔpǔ Kerisetiano haapao maitai e tiaturi nei e ora i nia i fenua nei. Ua pii o Iesu ia ratou te mau “mamoe ê atu,” o te tahoê ra i roto i te haamoriraa e te feia faatavaihia mai te hoê nǎnǎ tei fariihia.—Ioane 10:14-16.

Te haapapu maira te mau ohipa i tupu i te mau ahuru matahiti i mairi, i te hoperaa o te piiraa o te feia faatavaihia e te haamaitairaa a Iehova i nia i te “feia rahi roa” e maraa noa ra, o te tiaturi nei e ora i te “ati rahi.” (Apokalupo 7:9, 14) Ei hiˈoraa, i te oroa Haamanaˈoraa i te matahiti 1935, ua tae mai e 63 146 taata, e 52 465 tei rave i te mau taoˈa taipe no te haapapuraa i to ratou tiaturiraa ei melo faatavaihia. Toru ahuru matahiti i muri iho, aore ra i te matahiti 1965, 1 933 089 feia i amui mai a iti ai te mau taata e rave i te mau taoˈa taipe i nia i te faito 11 550. E 30 matahiti i muri iho, i te matahiti 1995, ua maraa te feia i amui mai i te faito 13 147 201, e 8 645 anaˈe râ tei rave i te pane e te uaina. (Korinetia 1, 11:23-26) Oia mau, a mairi noa ˈi te mau ahuru matahiti, ua iti roa ˈtura te numera o te feia e parau ra e no roto ratou i te toea—tau 52 400 i te matahiti 1935; 11 500 i te matahiti 1965; 8 600 i te matahiti 1995. Teie râ, ua haamaitaihia te feia o te tiaturi ra e ora i nia i te fenua nei, e ua maraa rahi roa to ratou numera.

No te matahiti 1995 mai te tabula apî roa ˈˈe tei neneihia, e te faaite nei oia e e 28 feia hau atu i te matahiti i mairi aˈenei o tei rave i te mau taoˈa taipe, noa ˈtu e ua iti mai te faito i rotopu i te feia e rave e te feia i mataitai noa. Ia hiˈopoa-anaˈe-hia te mau mea atoa, aita e tumu to tatou ia haapeapea i te mea e ua maiti tau taata hau atu i te rave i te mau taoˈa taipe. I te roaraa o te mau matahiti, ua haamata vetahi ma te maere hoi, noa ˈtu e e feia bapetizo-apî-hia ratou, i te rave i te mau taoˈa taipe. No e rave rahi, i muri iho, ua taa ia ratou e ua hape ratou. Ua farii vetahi e ua rave ratou i te mau taoˈa taipe na roto i te tahi horuhoruraa to ratou i te pae tino anei aore ra i te pae feruriraa. Teie râ, ua farii ratou e aita ratou i piihia no te oraraa i nia i te raˈi. Ua ani ratou i te aroha hamani maitai o te Atua. E te tavini noa ra ratou ia ˈna ei mau tavini maitatai taiva ore, ma te fanaˈo i te tiaturiraa no te ora mure ore i nia i te fenua nei.

Aita e faufaa no tatou ia tapitapi ia haamata anaˈe aore ra ia faaea anaˈe te hoê taata i te rave i te mau taoˈa taipe. E ere na tatou e faaoti e ua faatavai-mau-hia anei te hoê taata e te varua moˈa e e ua piihia anei oia no te oraraa i nia i te raˈi aore ra eita. A haamanaˈo na i te haapapuraa a Iesu: “O vau te tiai mamoe maitai ra, ua ite au i ta ˈu iho.” Papu maitai atoa, ua ite Iehova i te feia o ta ˈna i maiti ei mau tamarii i te pae varua. Te vai ra e rave rahi tumu no te tiaturi e tamau noa te numera o te mau melo faatavaihia i te iti mai a hope ai i to ratou oraraa i nia i te fenua nei no te ruhiruhiaraa e no te mau tupuraa manaˈo-ore-hia. Teie râ, mai ta teie feia faatavai-mau-hia e tapea i to ratou haapao maitai e tae noa ˈtu i te pohe, ia noaa ia ratou te korona o te ora, e nehenehe te mau mamoe ê atu, tei horoi i to ratou ahu i roto i te toto o te Arenio, e tiaturi i te ora i te ati rahi e fatata maira.—Timoteo 2, 4:6-8; Apokalupo 2:10.

[Nota i raro i te api]